TeamViewer ຜູ້ສະໜັບສະໜູນຫຼັກຂອງ ແມນເຊສເຕີ ຢູໄນເຕັດ ຈະບໍ່ຕໍ່ສັນຍາໃໝ່ອອກໄປ ຕາມລາຍງານຈາກສື່ມວນຊົນອັງກິດເມື່ອວັນພະຫັດທີ່ຜ່ານມານີ້.
ບໍລິສັດຊອຟແວຂອງເຢຍລະມັນ ເຊັນສັນຍາ 5 ປີ ມູນຄ່າ 235 ລ້ານປອນກັບແມນເຊສເຕີ ຢູໄນເຕັດ ເມື່ອເດືອນມີນາ 2021 ທີ່ຜ່ານມາ ແຕ່ຫຼັງຈາກຜ່ານໄປພຽງແຕ່ 18 ເດືອນ TeamViewer ເບິ່ງເຖິງການບໍ່ຕໍ່ສັນຍາໃໝ່ເມື່ອເຖິງປີ 2026.
ປັດໄຈສໍາຄັນທີ່ເຮັດໃຫ້ TeamViewer ພິຈາລະນາບໍ່ຕໍ່ສັນຍາໃໝ່ ເນື່ອງຈາກວ່າຮຸ້ນຂອງບໍລິສັດຫຼຸດລົງຢ່າງຕໍ່ເນື່ອງ ເຊິ່ງມາຈາກກໍລະນີທີ່ເກີດຂໍ້ສົງໄສຈາກກຸ່ມນັກລົງທຶນໃນຕະຫຼາດຫຸ້ນເຢຍລະມັນ ລວມໄປເຖິງສົງຄາມລະຫວ່າງ ຣັດເຊຍ – ອູແກຣນ ແລະ ຜົນກະທົບຫຼັງຈາກການແຜ່ລະບາດຂອງໂຄວິດ-19.
ໂດຍໃນຖະແຫຼງການ ລະບຸວ່າ ບໍລິສັດໄດ້ຮັບຮູ້ເຖິງຜົນກະທົບທີ່ສົ່ງຜົນຕໍ່ “ຍີ່ຫໍ້” ໃນໄລຍະປີທີ່ຜ່ານມາ ທີ່ເກີດຂຶ້ນກັບພັນທະມິດທາງການຄ້າ (Man Utd) ເຊິ່ງຕອນນີ້ ບໍລິສັດ ໄດ້ຕັດສິນໃຈນໍາກົນລະຍຸດທາງການຕະຫຼາດໃນໄລຍະຍາວໆກັບມາພິຈາລະນາອີກຄັ້ງ.
ທັງນີ້ ນັກວິເຄາະເຊື່ອວ່າ ສ່ວນຫນຶ່ງໃນການຕັດສິນໃຈຂອງ TeamViewer ມາຈາກຜົນງານໃນສະໜາມຂອງ ແມນເຊສເຕີ ຢູໄນເຕັດ ນອກຈາກນັ້ນ ຍັງມີກໍລະນີຂອງກອງເຊຍບານທີ່ມີໂຄງການຫ້າມສິນຄ້າ ຫຼືຜູ້ສະໜັບສະໜູນສະໂມສອນ ຫາກວ່າຕະກູນ ເກລເຊີ ຍັງຄົງເປັນເຈົ້າຂອງທີມຕໍ່ໄປ
ແນວໃດກໍຕາມ ເດລີເມລ ລະບຸວ່າ ຈາກການສອບຖາມທີມງານລະດັບສູງໃນຖິ່ນ ໂອລ ແທຣບຟອດ ທີມແມນເຊສເຕີ ຢູໄນເຕັດ ຍັງຄົງບໍ່ເປັນຫ່ວງກັບເລື່ອງທີ່ເກີດຂຶ້ນ ແລະ ໝັ້ນໃຈວ່າຈະສາມາດຊອກຫາຜູ້ສະໜັບສະໜູນຫຼັກມາແທນທີ່ ຫຼັງຈາກສັນຍາກັບ TeamViewer ໝົດລົງໄດ້ຢ່າງແນ່ນອນ.
