ພິທີເປີດໂຮງໝໍຫຼັກໄຊ ເປັນທາງການ ຈັດຂຶ້ນວັນທີ 28 ທັນວາ 2022 ຢູ່ພັດຕະຄານດາວວຽງ 2 ໂດຍມີທ່ານ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມດ້ວຍບັນດາຮອງລັດຖະມົນຕີ ຮອງເຈົ້າຄອງນະຄອນຫຼວງວຽງຈັນ ບັນດາກົມ ອໍານວຍການໂຮງໝໍ ພ້ອມດ້ວຍຄະນະບໍລິຫານໂຮງໝໍຫຼັກໄຊ ແລະ ພາກສ່ວນກ່ຽວຂ້ອງ ເຂົ້າຮ່ວມ. ທ່ານ ບຸນມີ ສົມສະໝຸດ ຜູ້ອຳນວຍການໃຫຍ່ໂຮງໝໍຫຼັກໄຊ ກ່າວວ່າ: ໂຮງໝໍຫຼັກໄຊ ເປັນໂຮງໝໍເອກະຊົນ ໄດ້ຮັບອະນຸຍາດຈາກກະຊວງແຜນການ ແລະ ການລົງທຶນ ແລະ ກະຊວງສາທາລະນະສຸກ ເລີ່ມກໍ່ສ້າງ ປີ 2019 ແລະ ເປີດໃຫ້ບໍລິການວັນທີ 14 ກັນຍາ 2020 ໃນຮູບແບບຄລີນິກ ຊື່ວ່າ: ຫຼັກໄຊ ຄລີນິກ ຫຼື ຫ້ອງກວດພະຍາດຫຼັກໄຊ ໂດຍເຫັນໄດ້ຄວາມຕ້ອງການ ແລະ ການຕອບ-ຮັບຂອງສັງຄົມ ກໍຄືຜູ້ມາໃຊ້ບໍລິການນັບມື້ເພີ່ມຫຼາຍຂຶ້ນ ຈຶ່ງໄດ້ຂໍອະນຸຍາດເລື່ອນຈາກຄລີນິກ ມາເປັນການໃຫ້ບໍລິການແບບໂຮງໝໍຢ່າງເຕັມຮູບແບບ ແລະ ໄດ້ຮັບໃບອານຸຍາດໃຫ້ເປັນໂຮງໝໍຫຼັກໄຊ ວັນທີ 23 ກັນຍາ 2022 ພ້ອມທັງໄດ້ຈັດພິທີເປີດປ້າຍເປັນທາງການໃນມື້ນີ້ ປັດຈຸບັນຄົນສ່ວນຫຼາຍໄດ້ຫັນມາໃສ່ໃຈດູແລສຸຂະພາບຂອງຕົນ ແລະ ຄົນໃກ້ຊິດນັບມື້ຫຼາຍຂຶ້ນ ແຕ່ສູນການໃຫ້ບໍລິການດ້ານສຸຂະພາບພັດມີບໍ່ຫຼາຍ ແລະ ເປັນລັກສະນະກະແຈກກະຈາຍ ເຊິ່ງຕອບສະ ໜອງຄວາມຕ້ອງການຂອງຜູ້ມາໃຊ້ບໍລິການບໍ່ໄດ້ດີເທົ່າທີ່ຄວນ ຈຶ່ງເຮັດໃຫ້ຄົນລາວ ຫຼື ຊາວຕ່າງດ້າວທີ່ອາໃສຢູ່ໃນລາວ ໄປໃຊ້ບໍລິການຢູ່ປະເທດເພື່ອນບ້ານເປັນຈຳນວນຫຼວງຫຼາຍ ຄະນະບໍລິຫານໂຮງໝໍຫຼັກໄຊ ຈຶ່ງວາງວິໃສທັດ ຄື: ພັດທະນາບຸກຄະລາກອນແພດຢ່າງເປັນມືອາຊີບ ຕິດພັນກັບວິທະຍາສາດ ກ້າວສູ່ຄວາມເປັນເລີດການໃຫ້ບໍລິການສຸຂະພາບ ສັງຄົມຍອມຮັບ ຜູ້ໃຊ້ບໍລິການມີຄວາມເພິ່ງພໍໃຈ ເພື່ອເປັນທາງເລືອກໃຫ້ຜູ້ມາໃຊ້ບໍ ລິການ ແລະ ເພື່ອຫຼຸດຜ່ອນການຮົ່ວໄຫຼເງິນຕາອອກນອກປະເທດ ເຕົ້າໂຮມບັນດາທ່ານໝໍຊ່ຽວຊານສະເພາະທາງສາຂາວິຊາຊີບປີ່ນປົວຕ່າງໆມາລວມກັນໃຫ້ກາຍເປັນສູນບໍລິການສຸຂະພາບແບບຄົບວົງຈອນ ແລະ ມືອາ ຊີບ ເພື່ອພັດທະນາໜ່ວຍງານຫ້ອງວິເຄາະ ບົ່ງມະຕິພະຍາດໃຫ້ມີຄວາມແມັນຍຳ ໜ້າເຊື່ອຖື ເພື່ອໃຫ້ທ່ານໝໍນຳໃຊ້ໃນການປີ່ນປົວຄົນເຈັບ ພັດທະນາໜ່ວຍແພດ ພະຍາບານ ລົດຮັບ-ສົ່ງຄົນເຈັບເຄື່ອນທີ່ເພື່ອລົງຕິດຕາມປິ່ນປົວຄົນເຈັບກັບທີ່ ພັດທະນາລະບົບສື່ສານລະຫວ່າງແພດກັບຄົນເຈັບໃຫ້ທັນໄໝ.
ເພື່ອພັດທະນາໂຮງໝໍຫຼັກໄຊ ໃຫ້ເປັນຈຸດສູນກາງຕິດຕໍ່ເຊື່ອມສານບັນດາແພດຊ່ຽວຊານທຸກສາຂາທີ່ສັງກັດຢູ່ໂຮງໝໍຕ່າງໆປະກອບສ່ວນໃນການບົ່ງມະຕິ ການປີ່ນປົວພະຍາດໃຫ້ຖືກເປົ້າໝາຍ ທັນສະພາບການ ເພື່ອໃຫ້ຜູ້ມາໃຊ້ບໍລິການໄດ້ຮັບຜົນປະໂຫຍດສູງສຸດ ໃນນີ້ພວກເຮົາໄດ້ເລືອກບາງພະຍາດທີ່ເປັນບັນຫາຕໍ່ສັງຄົມ ແລະ ຕໍ່ຄົນເຈັບໂດຍສ່ວນຫຼາຍ ເຊັ່ນ: ໜ່ວຍງານອາຍຸລະສາດ (ພະຍາດພາຍໃນ) ພະຍາດເບົາຫວານ ພະຍາດຫົວ ໃຈຫຼອດເລືອດ ພະຍາດລະບົບປະສາດ ພະຍາດລະບົບລະລາຍ ໜ່ວຍງານເດັກ (ພະຍາດພັນທຸກຳ ພະຍາດເລືອດ ການຈະເລີນໂຕບໂຕເດັກ ສັກວັກຊີນປ້ອງກັນ) ໜ່ວຍງານປະສູດພະຍາດຍິງ (ຕິດຕາມຄວາມຜິດປົກ ກະຕິເດັກໃນຄັນ ເບົາຫວານ ພະຍາດທາງພັນທຸກຳ ຄວາມພິການເດັກໃນຄັນ ຕິດຕາມແມ່ຕັ້ງຄັນ ເກີດລູກຮູບແບບທຳມະຊາດ ແລະ ຜ່າຕັດ ກວດຫາພະຍາດຊີຟີລິດ ເອດ ອັກເສບຕັບ ໄວຣັດບີ ໄວຣັດຊີ ໃນຄູ່ບ່າວສາວກ່ອນແຕ່ງງານ ກວດ ແລະ ປິ່ນປົວພະຍາດຕິດຕໍ່ທາງເພດສຳພັນ) ໜ່ວຍງານພາຍນອກ (ກະທົບ ຕົບແຕ່ງຄວາມພິການຕ່າງໆ) ສໍາລັບແຜນພັດທະນາໃນຕໍ່ໜ້າ ຈະຂະຫຍາຍໂຮງໝໍຫຼັກໄຊ ຈາກ 30 ຕຽງ ເປັນ 70 ແລະ 100 ຕຽງ ຕາມລໍາດັບ ນຳເຂົ້າອຸປະກອນການແພດທີ່ທັນສະໄໝ ເພື່ອສົມທົບການບົ່ງມະຕິພະຍາດ ແລະ ການປີ່ນປົວໃຫ້ທັນສະພາບການ ພັດທະນາບຸກຄະລາກອນແພດໃຫ້ເປັນມືອາຊີບທຽບເທົ່າກັບພາກພື້ນ ແລະ ສາກົນ.
ທ່ານ ຄຳໄຊ ບຸນມີສີດາວົງ ປະທານກຸ່ມບໍລິສັດ ຫຼັກໄຊ ແລະ ປະທານໃຫຍ່ຜູ້ຖືຮຸ້ນໂຮງໝໍຫຼັກໄຊ ກ່າວວ່າ: ຂະແໜງສາທາລະນະສຸກ ບໍລິການດ້ານສຸຂະພາບ ແມ່ນນອນຢູ່ໃນແຜນການພັດທະນາຂອງບໍລິສັດ ຫູັກໄຊລົງທຶນ ເຊິ່ງບໍລິສັດໄດ້ລົງທຶນຫຼາຍຂະແໜງການ ແລະ ມີບໍລິສັດໃນເຄືອຂ່າຍ ເປັນຕົ້ນບໍລິສັດ ຫຼັກໄຊກໍ່ສ້າງຂົວ-ທາງ ບໍລິສັດ ພູແຮ່ມາຍນິງ ບໍລິສັດ ທະວີໄຊ ເທຣດດິງ ໂຮງໝໍຫຼັກໄຊ ລົງທຶນໃນຮຸ້ນຂອງທະນາຄານການຄ້າຕ່າງປະເທດລາວ ມະຫາຊົນ ໂດຍຜ່ານຕະຫຼາດຫຼັກຊັບລາວ ນອກນີ້ຍັງດໍາເນີນທຸລະກິດດ້ານການບໍລິ ການອະສັງຫາລິມະຊັບ ສາງສິນຄ້າ ອາຄານ ແລະ ທີ່ດິນ ໂດຍຍຸດທະສາດທຸລະກິດຂອງພວກເຮົາແມ່ນລົງ ທຶນຕາມປັດໃຈພື້ນຖານຂອງມະນຸດຄື: ອາຫານ ເຄື່ອງນຸ່ມຫົມ ທີ່ຢູ່ອາໄສ ຢາປົວພະຍາດ ແລະ ອື່ນໆ ດ້ວຍຍຸດທະສາດນີ້ພວກເຮົາຈຶ່ງໄດ້ຮ່ວມມືກັບບັນດາຊ່ຽວຊານທາງການແພດ ຜູ້ທີ່ມີຄວາມຕ້ອງການພັດທະນາດ້ານນີ້ຢ່າງເອົາຈິງເອົາຈັງ ແລະ ໄດ້ສຶກສາຄົ້ນຄວ້າແລ້ວວ່າສັງຄົມມີຄວາມຕ້ອງການຫຼາຍ ຄົນລາວມັກນິຍົມໄປໃຊ້ບໍລິ ການດ້ານການແພດຢູ່ຕ່າງປະເທດ ເນື່ອງຈາກໂຮງໝໍທາງເລືອກຢູ່ປະເທດເຮົາມີໜ້ອຍ ພວກເຮົາຈຶ່ງຕັ້ງໃຈຢາກແກ້ໄຂ ຫຼື ຫຼຸດຜ່ອນຈຸດນີ້ ເພາະການເດີນທາງໄປຕ່າງປະເທດຕ້ອງໃຊ້ເວລາ ອາດສ່ຽງຕໍ່ການປິ່ນປົວຊັກຊ້າ ແລ້ວຍັງມີຄ່າໃຊ້ຈ່າຍສູງຫຼາຍເທົ່າທຽບໃສ່ການປິ່ນປົວຢູ່ປະເທດເຮົາ.
(ສະບາໄພ 29/12/2022)
