ກອງປະຊຸມສະຫລຸບວຽກງານຈັດຕັ້ງ, ກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ທົ່ວປະເທດ ປະຈຳປີ 2022 ແລະ ວາງທິດທາງແຜນການ ປີ 2023 ໄດ້ຈັດຂຶ້ນໃນວັນທີ 27-28 ທັນວາ 2022 ທີ່ຄະນະຈັດຕັ້ງສູນກາງພັກ (ຄຈສພ) ພາຍໃຕ້ການເປັນປະທານຂອງ ທ່ານ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີຄະນະພັກ ຄຈສພ, ຜູ້ຕາງໜ້າກົມຈັດຕັ້ງ-ພະນັກງານຂອງບັນດາກະຊວງ-ອົງການ, ແຂວງ-ນະຄອນຫລວງວຽງຈັນ ເຂົ້າຮ່ວມ.
ກອງປະຊຸມ, ທ່ານ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າ ຄຈສພ ໃນປີ 2022 ຜ່ານມາ, ຄະນະພັກແຕ່ລະຂັ້ນ ໄດ້ເປັນເຈົ້າການຈັດຕັ້ງເຜີຍແຜ່, ຄົ້ນຄ້ວາ, ເຊື່ອມຊຶມ ມະຕິກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກ, ກົດລະບຽບພັກ ສະໄໝທີ XI, ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI, ມະຕິກອງປະຊຸມ ຄົບຄະນະບໍລິຫານງານສູນກາງພັກ ສະໄໝທີ XI, ມະຕິວ່າດ້ວຍການເພີ່ມທະວີການນຳພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງວຽກງານພະນັກງານ, ຄຳສັ່ງວ່າດ້ວຍການປັບປຸງກົງຈັກການ ຈັດຕັ້ງຂອງບັນດາ ກະຊວງ-ອົງການ ແລະ ທ້ອງຖິ່ນ ແລະ ມະຕິກອງປະຊຸມໃຫຍ່ຂັ້ນຂອງຕົນ; ຄະນະພັກ, ຄະນະຈັດຕັ້ງແຕ່ລະຂັ້ນ ໄດ້ເອົາໃຈໃສ່ປັບປຸງການຈັດຕັ້ງພັກ ໂດຍຕິດພັນກັບການປັບປຸງກົງຈັກລັດໃຫ້ມີຄວາມສອດຄ່ອງ, ເຄື່ອນໄຫວມີປະສິດທິພາບ ແລະ ປະສິດທິຜົນ; ສຸມໃສ່ການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ, ເອົາໃຈໃສ່ຈັດຕັ້ງປະຕິບັດ ແລະ ຜັນຂະຫຍາຍຄຳສັ່ງຂອງກົມການເມືອງສູນກາງພັກ ເລກທີ 01 ແລະ ຄຳແນະນຳຂອງຄະນະຈັດຕັ້ງສູນກາງພັກ ເລກທີ 291 ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ໄດ້ແຕ່ງຕັ້ງຄະນະຮັບຜິດຊອບ, ນຳພາປັບ ປຸງກໍ່ສ້າງການຈັດຕັ້ງຮາກຖານພັກ, ຊຸກຍູ້ບັນດາໜ່ວຍພັກສ້າງແຜນ, ປະເມີນຜົນ, ສະຫລຸບຖອດຖອນບົດຮຽນ, ສະເພາະປີ 2021 ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນມີ 15.326 ໜ່ວຍ ກວມ 70.61% ຂອງໜ່ວຍພັກທັງໝົດ 21.703, ໜ່ວຍພັກແຂງມີ 3.510 ໜ່ວຍ ກວມ 17%, ໜ່ວຍພັກກາງມີ 668 ໜ່ວຍ ກວມ 3%; ໜ່ວຍພັກອ່ອນ 13 ໜ່ວຍ ກວມ 0.05% ແລະ ບໍ່ໄດ້ຈັດປະເພດ 2.186 ໜ່ວຍ ກວມ 10% (ປີ 2022 ກຳລັງດໍາເນີນການຕີລາຄາປະເມີນຜົນ).
ພ້ອມນີ້, ຄະນະພັກແຕ່ລະຂັ້ນ ໄດ້ຢຶດໝັ້ນ ແລະ ປະຕິບັດຫລັກການລວມສູນປະຊາທິປະໄຕ, ນຳພາເປັນໝູ່ຄະນະ, ປະຕິບັດລະບອບຫົວໜ້າດຽວ, ມີການແບ່ງງານໃຫ້ບຸກຄົນ ຮັບຜິດຊອບ, ສ້າງແຜນດຳເນີນງານ, ເຮັດວຽກມີແຜນງານ, ໂຄງການ ແລະ ແຜນການຈັດຕັ້ງປະຕິບັດແຕ່ລະໄລຍະ, ປະ ຕິບັດລະບອບປະຊຸມ ຄະນະປະຈໍາ, ຄະນະບໍລິຫານງານປົກກະຕິຕາມກົດລະບຽບພັກ; ທຸກວຽກງານທີ່ສໍາຄັນ ແມ່ນໄດ້ມີການຄົ້ນຄວ້າປຶກສາຫາລືຕົກລົງເປັນໝູ່ຄະນະ, ອັນໃດທີ່ຕົກລົງເປັນມະຕິແລ້ວ ພ້ອມກັນສູ້ຊົນຈັດຕັ້ງປະຕິບັດ; ມີການຊຸກຍູ້, ຕິດຕາມ, ກວດກາຄວາມຮັບຜິດຊອບຂອງຄະນະພັກ, ສະມາຊິກພັກ, ມີການສະຫຼຸບຖອດຖອນບົດຮຽນແຕ່ລະໄລຍະ, ປະຕິບັດລະບອບສ່ອງແສງລາຍງານເປັນປົກກະຕິ. ເວົ້າລວມແລ້ວ ຄະນະພັກແຕ່ລະຂັ້ນຍັງສືບຕໍ່ ຢຶດໝັ້ນລະບອບແບບແຜນນຳພາ ແລະ ວິທີເຮັດວຽກຕາມລະບຽບຫຼັກການ ຂອງພັກ; ພ້ອມທັງໄດ້ເອົາໃຈໃສ່ຄົ້ນຄວ້າກຳແໜ້ນ ແລະ ຜັນຂະຫຍາຍ ມະຕິຂອງຄະນະບໍລິຫານງານສູນກາງພັກ ເລກທີ 04 ວ່າດ້ວຍ ເພີ່ມທະວີການນຳພາຂອງພັກເພື່ອສ້າງ ການຫັນປ່ຽນຢ່າງແຂງແຮງ ແລະ ເລິກເຊິ່ງ ໃນວຽກງານພະນັກງານ; ຄະນະຈັດຕັ້ງສູນກາງພັກ ໄດ້ຄົ້ນຄວ້າສະເໜີກົມການເມືອງສູນກາງພັກ ອອກມະຕິ ສະບັບເລກທີ 21 ວ່າດ້ວຍການຕີລາຄາພະນັກງານ ແລະ ອອກແຈ້ງການ ເລກທີ 322/ຄຈສພ ກ່ຽວກັບການປະຕິບັດແຜນກໍານົດພະນັກງານນໍາພາ-ຄຸ້ມຄອງ, ເລກທີ 309/ຄຈສພ ກ່ຽວກັບການຄາດຄະເນເປົ້າໝາຍພະນັກງານທີ່ຈະອອກພັກການ-ຮັບອຸດໜູນບໍານານ, ໄດ້ສຳເລັດ ການປັບປຸງປຶ້ມຊີວະປະຫວັດພະນັກງານນໍາພາ-ຄຸ້ມຄອງ, ໄດ້ປັບປຸງໂປຣແກຣມຄຸ້ມຄອງຂໍ້ມູນພະນັກງານຂັ້ນສູນກາງ ຄຸ້ມຄອງຢ່າງເປັນລະບົບ, ສະດວກວ່ອງໄວ ແລະ ຊັດເຈນ; ຄະນະພັກແຕ່ລະຂັ້ນໄດ້ເອົາໃຈໃສ່ຊີ້ນໍາການສ້າງແຜນ ກຳນົດພະນັກງານນຳພາ-ຄຸ້ມຄອງທີ່ຂຶ້ນກັບສິດຄຸ້ມຄອງຂອງຕົນ ແລະ ຂັ້ນສູນກາງຄຸ້ມຄອງຕາມລະບຽບ-ຫລັກການ ທີ່ນິຕິກຳໄດ້ກຳນົດໄວ້ ແລະ ໄດ້ເອົາໃຈໃສ່ປັບປຸງ ກົງຈັກການຈັດຕັ້ງ ຕາມຄຳສັ່ງ 190 ຂອງຄະນະເລຂາທິການສູນກາງພັກ ແລະ ຄຳແນະນໍາ 01 ຂອງນາຍົກ ລັດຖະມົນຕີ ຕາມທິດກະທັດຮັດ, ສົມເຫດສົມຜົນ, ເຄື່ອນໄຫວມີປະສິດທິພາບ, ປະຕິບັດຕາມທິດ 3 ສ້າງ; ໄດ້ດໍາເນີນການປັບປຸງກົງຈັກ ແລະ ພາລະບົດບາດອົງການເສນາທິການຂອງພັກ, ແນວລາວສ້າງຊາດ ແລະ ອົງການຈັດຕັ້ງມະຫາຊົນ ສໍາເລັດ 6 ພາກສ່ວນ. ນອກຈາກນີ້, ຍັງໄດ້ປັບປຸງກົງຈັກການຈັດຕັ້ງ ແລະ ການເຄື່ອນໄຫວ ຄະນະຈັດຕັ້ງແຂວງ-ນະຄອນຫຼວງ, ຂັ້ນເມືອງ-ນະຄອນ ຕື່ມອີກ.
ສຳລັບທິດທາງໜ້າທີ່ປີ 2023 ຄະນະພັກແຕ່ລະຂັ້ນ ສືບຕໍ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI, ກົດລະບຽບຂອງພັກ ໃຫ້ເຂົ້າສູ່ລວງເລິກ ແລະ ມີຜົນສໍາເລັດກວ່າເກົ່າ; ສຸມໃສ່ການດໍາເນີນຊີວິດການເມືອງປັບປຸງປົວແປງພັກຕິດພັນການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ ແລະ ກອງປະຊຸມຮາກຖານພັກ; ສືບຕໍ່ປັບປຸງ-ກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນການນໍາພາ ເພື່ອຍົກສູງບົດບາດຄວາມສາມາດນຳພາຂອງຄະນະພັກ, ໜ່ວຍພັກ ແລະ ຄວາມເປັນແບບຢ່າງນຳໜ້າຂອງຖັນແຖວສະມາຊິກພັກ; ຈັດຕັ້ງປະຕິບັດວຽກງານພະນັກງານໃຫ້ມີຄຸນນະພາບໃໝ່, ໃຫ້ຖືກຕ້ອງສອດຄ່ອງກັບລະບຽບການທີ່ກຳນົດໄວ້; ຈໍາກັດ, ແກ້ໄຂປະກົດການຫຍໍ້ທໍ້ຕ່າງໆພາຍໃນການຈັດຕັ້ງ, ຄະນະພັກ ແລະ ຖັນແຖວສະມາຊິກພັກ-ພະນັກ ງານຢ່າງທັນການ ແລະ ເດັດຂາດ-ເຂັ້ມງວດ; ປັບປຸງກົງຈັກການຈັດຕັ້ງຄະນະຂອງພັກ, ອົງການຈັດຕັ້ງມະຫາຊົນແຕ່ລະຂັ້ນໃຫ້ມີຄວາມເຂັ້ມແຂງ ແລະ ເຄື່ອນໄຫວມີປະສິດທິຜົນສູງ.
ຂ່າວ: ຄຈສພ
