ຄວາມກົດດັນສູງຂອງອາກາດເຢັນ ຍັງປົກຄຸມຢູູ່ພາກເໜືອ ລົງຫາ ພາກກາງຂອງປະເທດລາວ ດ້ວຍກໍາລັງອ່ອນ, ສົມທົບກັບກະແສລົມຕາເວັນອອກພັດປົກຄຸມ. ຊຶ່ງຈະເຮັດໃຫ້ອາກາດຍັງຈະເຢັນໃນຕອນເຊົົ້າຢູູ່ແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ ແລະ ຍັງຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຢູູ່ບາງທ້ອງຖິ່ນ ພ້ອມຈະມີລົມພັດແຮງເປັນບາງໂອກາດ ຢູູ່ໃນແຕ່ລະພາກ.

ໃນວັນທີ 15 ຕຸລາ 2024  ອົງການຢູນິີເຊັບ, ອົດສະຕຣາລີ, ອົງການ USAID ແລະ ນອກແວ ປະຈໍາ ສປປ ລາວ ໄດ້ມອບຖົງເປ້ ນັກຮຽນ ພ້ອມອຸປະກອນການຮຽນ ແລະ ເຄື່ອງໃຊ້ໃນການຮັກສາອະນາໄມພື້ນຖານ ຂອງນັກຮຽນ ໃນບັນດາໂຮງຮຽນອະນຸບານ ແລະ ໂຮງຮຽນປະຖົມ ໄດ້ຮັບຜົນກະທົບຈາກໄພນໍ້່າຖ້ວມ ໃຫ້ແກ່ ກະຊວງສຶກສາທິການ ແລະ ກິລາ ພາຍໃຕ້ການຮ່ວມມືເພື່ອສະໜັບສະໜູນການຟື້ນຟູການສຶກສາໃນເຂດທີ່ໄດ້ຮັບຜົນກະທົບຈາກໄພນ້ຳຖ້ວມ ໃນ ສປປ ລາວ. ອົງການຢູນິເຊັບ ປະຈຳລາວ, ລັດຖະບານອົດສະຕຣາລີ, ນອກແວ ແລະ ສະຫະລັດອາເມຣິກາ ຜ່ານອົງການພັດທະນາລະຫວ່າງປະເທດ ຫຼື  ອົງການ USAID ເຄື່ອງອຸປະກອນການຮຽນດັ່ງກ່າວ ແມ່ນແນໃສ່ເພື່ອຊ່ວຍເຫຼືອນັກຮຽນຊັ້ນອະນຸບານ 1, ອະນຸບານ 2 ແລະ ອະນຸບານ 3  ຈໍານວນ 813 ຄົນ ແລະ ນັກຮຽນຂັ້ນປະຖົມ

ປ 1 ແລະ ປ 2 ຈໍານວນ 840 ຄົນ ລວມທັງໝົດ  1,653 ຄົນ ໃນພິທີມອບຮັບອຸປະກອນການຮຽນ ໂດຍປະກອບມີ ທ່ານ ປອ ສໍາລານ ພັນຄະວົງ, ຮອງລັດຖະມົນຕີກະຊວງສຶກສາທິການ ແລະ ກິລາ, ຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ແລະ ວິຊາການຈາກກົມການສຶກສາກ່ອນໄວຮຽນ ແລະ ຜູ້ຕາງໜ້າຈາກສະຖານທູດອົດສະຕຣາລີ, ອົງການ USAID ແລະ ອົງການ ຢູນິເຊັບ ປະຈຳລາວ.

ໃນວັນ​ທີ 7 ກັນຍາ 2024​ ທີ່ຜ່ານມາ, ພາຍຸ​ໃຕ້​ຝຸ່ນຢາກິ ເຊິ່ງ​ເປັນ​ພາຍຸ​ທີ່​ຮຸນແຮງ​ທີ່​ສຸດ​ໃນ​ພາກ​ພື້ນ​ອາຊີ ໃນ​ຮອບ​ຫຼາຍ​ສະຕະວັດ ໄດ້​ພັດ​ເຂົ້າ​ຝັ່ງ​ທາງ​ພາກ​ເໜືອ​ ຂອງ ສປປ ລາວ. ປະຊາຊົນປະມານ 200,000 ຄົນ ລວມທັງເດັກນ້ອຍຢ່າງໜ້ອຍ 48,500 ຄົນ ໄດ້ຮັບຜົນກະທົບຈາກພາຍຸດັ່ງກ່າວ, ເດັກນ້ອຍຢ່າງໜ້ອຍ 24,000 ຄົນ ຕ້ອງການການການຊ່ວຍເຫຼືອ. ຍ້ອນຜົນກະທົບຈາກພາຍຸ​ໃຕ້​ຝຸ່ນຢາກິ ເຮັດໃຫ້ເກີດໄພນ້ຳຖ້ວມ, ຫຼາຍໂຮງຮຽນ​ປິດການຮຽນການສອນປະມານ 77 ແຫ່ງ​ ​ເຮັດ​ໃຫ້​ເດັກນ້ອຍ​ຫຼາຍ​ພັນ​ຄົນ​ບໍ່​ໄດ້​ຮັບ​ການ​ສຶກສາ, ຂາດການ​ຮຽນ​ ແລະ ໄດ້ຮັບຜົນກະທົບດ້ານສະພາບ​ຈິດ​ໃຈ. ດັ່ງນັ້ນ, ຈຶ່ງເປັນສະພາວະອັນຮີບດ່ວນໃນການຈັດສົ່ງອຸປະກອນການຮຽນ-ການສອນ ໂດຍສະເພາະເຄື່ອງອຸປະກອນການຮຽນ.

ຊຸດອຸປະກອນການຮຽນ ແມ່ນອອກແບບມາສະເພາະ ເພື່ອຕອບສະໜອງຕໍ່ຄວາມຕ້ອງການ ຂອງເດັກນ້ອຍໃນຊັ້ນອະນຸບານສຶກສາ ແລະ ປະຖົມສຶກສາ ໂດຍປະກອບມີເຄື່ອງຮຽນທີ່ຈຳເປັນເຊັ່ນ: ກະເປົາເປ້, ປຶ້ມຂຽນ, ສໍ, ສີທຽນ, ຜະລິດຕະພັນສຸຂະອະນາໄມ ແລະ ອຸປະກອນເຄື່ອງໃຊ້ອື່ນໆ. ການລິເລີ່ມດັ່ງກ່າວນີ້, ເປັນສ່ວນໜຶ່ງຂອງຄຳໝັ້ນສັນຍາໃນການສະໜັບສະໜູນ ກະຊວງສຶກສາທິການ ແລະ ກິລາ ຕໍ່ການສ້າງລະບົບການສຶກສາທີ່ເຂັ້ມແຂງ ແລະ ຮັບປະກັນວ່າ ພວກເຮົາຈະບໍ່ປ່ອຍເດັກນ້ອຍຄົນໃດຄົນໜຶ່ງໄວ້ຢູ່ຂ້າງຫຼັງໃນເວລາເກີດວິກິດ.

ທ່ານ ປອ ສຳ​ລານ ພັນຄະວົງ ຮອງ​ລັດຖະມົນຕີ​ກະຊວງ​ສຶກສາ​ທິການ ​ແລະ ກິລາ ​ໄດ້​ສະ​ແດງ​ຄວາມ​ຂອບ​ໃຈ​ຕໍ່ອົງການ​ສາກົນ ​ທີ່​ໄດ້​ໃຫ້ການ​ສະໜັບສະໜູນ ແລະ ໄດ້ກ່າວຄຳເຫັນໃນພິທີໂດຍ​ເນັ້ນ​ໜັກ​ວ່າ “ຊຸດ​ອຸປະກອນການຮຽນ​ແມ່ນ​ຊັບພະຍາກອນ​ອັນ​ສຳຄັນ​ຂອງ​ນັກ​ຮຽນຂອງພວກເຮົາ ເນື່ອງຈາກພວກເຂົາກຳລັງ​ຟື້ນ​ຟູ​ຄວາມ​ຫຍຸ້ງຍາກ​ທີ່​ເກີດ​ຈາກ​ໄພ​ນ້ຳ​ຖ້ວມ. ພວກເຮົາຂໍຂອບໃຈ ຢ່າງຍິ່ງ ຕໍ່ການສະໜັບສະໜູນຈາກ ອົງການ ຢູນິເຊັບ ປະຈຳລາວ, ລັດຖະບານອົດສະຕຣາລີ, ນອກແວ ແລະ ອົງການ USAID ເຊິ່ງສະແດງເຖິງການຮັບປະກັນວ່າການສຶກສາຍັງຄົງເປັນບູລິມະສິດໃນຊ່ວງເວລາທີ່ຫຍຸ້ງຍາກນີ້”.

ທ່ານ ນາງ ເບັນນິຕາ ຊໍາເມີວິວ, ຮອງເອກອັກຄະລັດຖະທູດອົດສະຕຣາລີແຫ່ງ ສປປ ລາວ ໄດ້ຍົກໃຫ້ເຫັນເຖິງຄວາມເອົາໃຈໃສ່ຂອງ ລັດຖະບານອົດສະຕຣາລີ ໃນການສະໜັບສະໜູນ ວຽກງານການສຶກສາ. ໂດຍກ່າວວ່າ, “ອົດສະຕຣາລີ, ມີຄວາມພູມໃຈທີ່ໄດ້ຢືນຄຽງຂ້າງ ສປປ ລາວ ໃນຍາມຍາກລຳບາກ. ພ້ອມດຽວກັນກັບ ອົງການ ຢູນິເຊັບ ປະຈຳລາວ, ສະຫະລັດອາເມຣິກາ ແລະ ນອກແວ ໄດ້ຢັ້ງຢືນວ່າເດັກນ້ອຍຈະສາມາດສືບຕໍ່ສຶກສາຮ່ໍາຮຽນ ເຖິງແມ່ນວ່າຈະມີສິ່ງທ້າທາຍທີ່ພວກເຂົາກຳລັງປະເຊີນຢູ່ກໍ່ຕາມ “

ທ່ານ ນາງ ແຮັດເຕີ ວາເຣຍອາວາ, ເອກອັກຄະລັດຖະທູດອາເມຣິກາປະຈຳ ສປປ ລາວ, ໄດ້ເນັ້ນຫນັກເຖິງ ບົດບາດຄວາມສຳຄັນຂອງການສຶກສາ ໃນລະຫວ່າງການຟື້ນຟູຂອງໄພພິບັດ ແລະ ໄດ້ສະແດງຄວາມຊົມເຊີຍຕໍ່ການຍົກລະດັບການຮ່ວມມືລະຫວ່າງ ສະຫະລັດອາເມຣິກາ, ສປປ ລາວ ແລະ ຄູ່ຮ່ວມມືໃນຂະແໜງການການສຶກສາ. “ການສຶກສາມີບົດບາດສໍາຄັນໃນການຟື້ນຟູໄພພິບັດ ແລະ ລັດຖະບານຂອງສະຫະລັດອາເມຣິກາ ຮູ້ສຶກເປັນກຽດທີ່ໄດ້ຮ່ວມມືກັບຄູ່ຮ່ວມງານຂອງພວກເຮົາ ໃນການສະໜອງຊັບພະຍາກອນທີ່ຈໍາເປັນເພື່ອຊ່ວຍໃຫ້ເດັກນ້ອຍໄດ້ສືບຕໍ່ຮ່ຳຮຽນ. ເຄື່ອງອຸປະກອນການຮຽນດັ່ງກ່າວ, ແມ່ນມີຄວາມໝາຍຄວາມສໍາຄັນ ເພາະອຸປະກອນການຮຽນເຫຼົ່ານີ້ຖືເປັນຕົວແທນຂອງຄວາມຫວັງ ແລະ ຄວາມໝັ້ນຄົງໃນອະນາຄົດ.ໃນໂອກາດດຽວກັນນີ້, ທ່ານ ໄມເຄິລ ແມັກຄອດ “ໃນຖານະພົນລະເມືອງຂອງອາເມຣິກາ, ອົງການ USAID ມີຄວາມຕັ້ງໃຈທີ່ຈະລົງທຶນໃຫ້ກັບການສຶກສາຂອງເດັກນ້ອຍລາວ ເພື່ອເປັນການກະກຽມເສັ້ນທາງແຫ່ງຄວາມສໍາເລັດໃນຮົ້ວໂຮງຮຽນ ແລະ ໃນອະນາຄົດຂອງພວກເຂົາ.”

ທ່ານ ບິລາລ ອູແຣັງ ເຊັບ ດູຣານິິ, ຜູ້ຕາງໜ້າຈາກ ອົງການ ຢູນິເຊັບ ປະຈໍາລາວ, ໄດ້ເນັ້ນໜັກເຖິງຄຳໝັ້ນສັນຍາຂອງ ອົງການ ຢູນິເຊັບ ໃນການຮັບປະກັນຄວາມຕ້ອງການດ້ານການສຶກສາຂອງເດັກນ້ອຍ, ເຊິ່ງໄດ້ກ່າວໄວ້ວ່າ “ການສຶກສາ ແມ່ນສິດທິພື້ນຖານຂອງເດັກທຸກໆຄົນ ແລະ ທີ່ບໍ່ຄວນປ່ອຍປະລະເລີຍ ເຖິງຈະຢູ່ໃນພາວະສຸກເສີນກໍ່ຕາມ. ດ້ວຍການຮ່ວມມືຂອງ ອົດສະຕຣາລີ, ສະຫະລັດອາເມຣິກາ ແລະ ນອກແວ, ພວກເຮົາຢັ້ງຢືນວ່າເດັກນ້ອຍ ໃນ ສປປ ລາວ ມີເຄື່ອງອຸປະກອນການຮຽນທີ່ພວກເຂົາຕ້ອງການເພື່ອສືບຕໍ່ການຮ່ຳຮຽນຂອງເຂົາເຈົ້າ ແລະ ມີຄວາມເຂັ້ມແຂງເພື່ອປະເຊີນໜ້າກັບຄວາມຫຍຸ້ງຍາກ.”

ການແຈກຢາຍຊຸດອຸປະກອນດັ່ງກ່າວ ເປັນສ່ວນໜຶ່ງທີ່ສຳຄັນໃນການຕອບສະໜອງຢ່າງຕໍ່ເນື່ອງ ເພື່ອຊ່ວຍເຫຼືອຊຸມຊົນທີ່ໄດ້ຮັບຜົນກະທົບຈາກໄພນໍ້າຖ້ວມ ໃນ ສປປ ລາວ. ອົງການ ຢູນິເຊັບ ປະຈຳລາວ ຮ່ວມມືກັບ ກະຊວງສຶກສາທິການ ແລະ ກິລາ ຈະສືບຕໍ່ຮ່ວມມືກັນຢ່າງໃກ້ຊິດກັບອຳນາດປົກຄອງທ້ອງຖິ່ນ ແລະ ຄູ່ຮ່ວມມືສາກົນ ເພື່ອຢັ້ງຢືນວ່າເດັກນ້ອຍໄດ້ຮັບການສຶກສາທີ່ພວກເຂົາຕ້ອງການ ແລະ ບຸລິມະສິດການຟື້ນຟູດັ່ງກ່າວ ເພື່ອການພັດທະນາແບບຍືນຍົງ ແລະ ການສ້າງຄວາມເຂັ້ມແຂງ.

ໃນວັນທີ 15 ຕຸລາ 2024 ນີ້, ທ່ານ ນາງ ສວນສະຫວັນ ວິຍາເກດ ລັດຖະມົນຕີກະ ຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ໄດ້ຕ້ອນຮັບ ທ່ານ ບິລາ ອຸລັງ ເຊບ ດູລານີ (Bilal Aurang Zeb Durrani) ຫົວໜ້າອົງການອຸຍນີເຊບ (UNICEF) ປະຈຳ ສປປ ລາວ ໃນໂອກາດມາດຳລົງຕຳແໜ່ງເປັນ ຫົວໜ້າອົງການອຸຍນິເຊັບ ຄົນໃໝ່ ປະຈຳ ສປປ ລາວ.

ທ່ານ ນາງ ສວນສະຫວັນ ວິຍະເກດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຊົມ ເຊີຍທ່ານ ບິລາ ອຸລັງ ເຊບ ດູລານີ ທີ່​ໄດ້ຖືກແຕ່ງຕັ້ງມາປະຕິບັດໜ້າທີ່ ຢູ່ ສປປ ລາວ, ພ້ອມ​ທັງຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມືອັນດີ ລະຫວ່າງ ສປປ ລາວ ແລະ ອົງການອຸຍນີເຊບ ໃນໄລະຍະຜ່ານມາ. ພ້ອມນີ້, ທ່ານລັດຖະມົນຕີ ຍັງເຊື່ອໝັ້ນວ່າ ໃນໄລຍະທີ່ທ່ານມາປະຕິບັດໜ້າທີ່ຢູ່ ສປປ ລາວ ຈະມີການຮ່ວມມືຢ່າງໃກ້ຊິດໃນຂະແໜງຖະແຫລງຂ່າວ ເພື່ອສົ່ງເສີມການຮ່ວມມືຂອງສອງຝ່າຍ ໃຫ້ນັບມື້ກວ້າງຂວາງ ແລະ ເປັນຮູບປະທຳຫລາຍຂຶ້ນ.

ທ່ານ ບິລາ ອຸລັງ ເຊບ ດູລານີ ໄດ້ສະແດງຄວາມຂອບໃຈຕໍ່ ທ່ານລັດຖະມົນຕີ ກະຊວງ ຖວທ ພ້ອມຄະນະ ທີ່ໄດ້ຕ້ອນຮັບຢ່າງໃນຄັ້ງນີ້, ພ້ອມທັງໃຫ້ຄໍາໝັ້ນສັນຍາວ່າ ຈະພະຍາຍາມຢ່າງສຸດຄວາມສາ ມາດ ເພື່ອຊຸກຍູ້ການພົວພັນຮ່ວມມື ລາວ-ອຸຍນີເຊບ ກໍຄື ຊຸກຍູ້ການພົວພັນຮ່ວມມື ໃນຂະແໜງຖະແຫລງຂ່າວ ໃຫ້ສືບຕໍ່ໄດ້ຮັບການເສີມຂະຫຍາຍຍິ່ງໆຂຶ້ນໃນຕໍ່ໜ້າ.

ຂ່າວ: ສົມຫວັງ

ພາບ: ອ່າຍຄໍາ

…………

ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ທີ່ ສປປ ລາວ ເປັນເຈົ້າພາບ ໄດ້ດໍາເນີນມາແຕ່ວັນທີ 8 ຕຸລາ 2024 ໄດ້ປິດລົງດ້ວຍຜົນສຳເລັດອັນຈົບງາມ ໃນວັນທີ 11 ຕຸລາ 2024 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ມີບັນດາປະມຸກລັດ, ຫົວໜ້າລັດຖະບານປະເທດສະມາຊິກອາຊຽນ ແລະ ຕີມໍແລັສເຕ, ບັນດາລັດຖະມົນຕີ ແລະ ເຈົ້າຫນ້າທີ່ອາວຸໂສຂອງສາມເສົາຄໍ້າປະຊາຄົມອາຊຽນ ແລະ ຕີມໍແລັສເຕ, ເລຂາທິການໃຫຍ່ອາຊຽນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດນີ້, ທ່ານ ສອນໄຊ ສີພັນດອນ ໄດ້ສະຫຼຸບຜົນກອງປະຊຸມສຸດຍອດອາຊຽນຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ຊຶ່ງມີທັງໝົດ 16 ກອງປະຊຸມສຸດຍອດ ພາຍໃຕ້ການເປັນເຈົ້າພາບ ແລະ ປະທານອາຊຽນຂອງ ສປປ ລາວ ພາຍໃຕ້ຄຳຂວັນ “ເພິ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”. ໃນນີ້, ທ່ານ ສອນໄຊ ສີພັນດອນ ໄດ້ຍົກໃຫ້ເຫັນຄວາມຄືບໜ້າຂອງການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ຜົນສໍາເລັດຂອງການຈັດຕັ້ງປະຕິບັດ 9 ຂົງເຂດບູລິມະສິດສໍາລັບການເປັນປະທານອາຊຽນຂອງ ສປປ ລາວ ຊຶ່ງປະກອບສ່ວນເຂົ້າໃນຂະບວນການເສີມສ້າງປະຊາຄົມອາຊຽນ ໃຫ້ມີການເຊື່ອມຈອດ ແລະ ເຂັ້ມແຂງຫຼາຍກວ່າເກົ່າ. ນອກຈາກນີ້, ທ່ານ ສອນໄຊ ສີພັນດອນ ໄດ້ຢໍ້າເຖິງຄວາມສຳຄັນຂອງຄວາມພະຍາຍາມລວມຂອງອາຊຽນ ເພື່ອຮັບ ປະກັນຂະບວນການສ້າງປະຊາຄົມອາຊຽນໃຫ້ມີຄວາມຕໍ່ເນື່ອງ ແລະ ສະແດງຄວາມຊົມເຊີຍຕໍ່ຄວາມຄືບໜ້າໃນການສ້າງບັນດາແຜນຍຸດທະສາດ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2045 ໂດຍບັນດາຂະແໜງການທີ່ກ່ຽວຂ້ອງຂອງສາມເສົາຄໍ້າປະຊາຄົມອາຊຽນ ແລະ ການເຊື່ອມຈອດອາຊຽນ ພາຍໃຕ້ການເປັນປະທານຂອງ ສປປ ລາວ ແນໃສ່ຈັດຕັ້ງປະຕິບັດວິໄສທັດປະຊາຄົມອາຊຽນ 2045 ເພື່ອສ້າງປະຊາຄົມອາຊຽນໃຫ້ເປັນປະຊາຄົມທີ່ເຂັ້ມແຂງ, ມີນະວັດຕະກໍາ, ຄ່ອງແຄ້ວ ແລະ ມີປະຊາຊົນເປັນແກນກາງ ແລະ ແຈ້ງໃຫ້ຊາບຄວາມຄືບໜ້າການກະກຽມຄວາມພ້ອມ ສຳລັບການເປັນສະມາຊິກສົມບູນອາຊຽນຂອງ ຕີມໍແລັສເຕ ແລະ ການເສີມຂະຫຍາຍການພົວພັນຮ່ວມມືກັບພາຍນອກ.

ກອງປະຊຸມສຸດຍອດອາຊຽນໃນຄັ້ງນີ້, ໄດ້ຮັບຮອງ ແລະ ຮັບຊາບເອກະສານຫຼາຍກວ່າ 90 ສະບັບ ຊຶ່ງເອກະສານເຫຼົ່ານີ້ຈະເປັນພື້ນຖານໃຫ້ບັນດາຂະແໜງການຂອງອາຊຽນ ເພື່ອນຳໄປຈັດຕັ້ງຜັນຂະຫຍາຍ ເພື່ອເຮັດໃຫ້ອາຊຽນມີການເຊື່ອມຈອດ ແລະ ຄວາມເຂັ້ມແຂງຫຼາຍຂື້ນ ແລະ ກ້າວໄປສູ່ປະຊາຄົມທີ່ເຂັ້ມແຂງ, ມີນະວັດຕະກໍາ, ຄ່ອງແຄ້ວ ແລະ ມີປະຊາຊົນເປັນແກນກາງ ກໍຄືການປະກອບສ່ວນເຂົ້າໃນພາລະກິດລວມແຫ່ງການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມຈະເລີນກ້າວໜ້າໃນພາກພື້ນ ແລະ ໃນໂລກ.

ທ່ານ ສອນໄຊ ສີພັນດອນ ໄດ້ຖືໂອກາດນີ້ ສະແດງຄວາມຂອບໃຈ ແລະ ຮູ້ບຸນຄຸນຢ່າງຈິງໃຈຕໍ່ການສະໜັບສະໜູນ, ການຮ່ວມມື ແລະ ການປະກອບສ່ວນຂອງປະເທດສະມາຊິກອາຊຽນ, ຄູ່ຮ່ວມມືພາຍນອກຂອງອາຊຽນ ແລະ ກອງເລຂາອາຊຽນ ພ້ອມທັງໄດ້ສະແດງຄວາມຊົມເຊີຍ ແລະ ຂອບໃຈຢ່າງຈິງໃຈມາຍັງພະນັກງານ, ທະຫານ, ຕຳຫຼວດ, ນັກທຸລະກິດ, ພໍ່ຄ້າຊາວຂາຍ ແລະ ປະຊາຊົນລາວບັນດາເຜົ່າທຸກຖ້ວນໜ້າ ທີ່ໄດ້ປະກອບສ່ວນຢ່າງຫ້າວຫັນຕາມພາລະໜ້າທີ່ ແລະ ຄວາມຮັບຜິດຊອບຂອງຕົນ ອັນໄດ້ເຮັດໃຫ້ ບັນດາກອງປະຊຸມສຸດຍອດໃນຄັ້ງນີ້ ກໍຄືການເປັນປະທານອາຊຽນຂອງ ສປປ ລາວ ໄດ້ຮັບຜົນສຳເລັດອັນຈົບງາມ.

ໃນຕອນທ້າຍຂອງພິທີດັ່ງກ່າວ, ທ່ານ ສອນໄຊ ສີພັນດອນ ໄດ້ມອບຄ້ອນສັນຍາລັກປະທານອາຊຽນ ໃຫ້ແກ່ທ່ານ ອານວາ ອິບຣາຮີມ ນາຍົກລັດຖະມົນຕີ ແຫ່ງ ມາເລເຊຍ ເພື່ອເປັນປະທານອາຊຽນ ໃນປີ 2025.

ສປປ ລາວ ຈະສຶບຕໍ່ເປັນປະທານອາຊຽນໄປຈົນຮອດວັນທີ 31 ທັນວາ 2024 ແລະ ມາເລເຊຍ ຈະເລີ່ມເປັນປະທານອາຊຽນແຕ່ວັນທີ 1 ມັງກອນ-31 ທັນວາ 2025 ເປັນຕົ້ນໄປ.

(ຂ່າວ: ວັນເພັງ, ພາບ: ສຸກສະຫວັນ)

……….

ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ຫຼີ ສຽງ, ນາຍົກລັດຖະມົນຕີ ແຫ່ງ ສປ ຈີນ ພ້ອມຄະນະໃນວັນທີ 11 ຕຸລາ 2024, ທີ່ ທໍານຽບປະທານປະເທດ, ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດ ອາຊຽນ-ຈີນ ຄັ້ງທີ 27 ແລະ ກອງປະຊຸມສຸດຍອດອາຊຽນທີ່ກ່ຽວຂ້ອງ ຢູ່ ນະຄອນຫຼວງວຽງຈັນ ໃນວັນທີ 11-12 ຕຸລາ 2024.

ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ແລະ ເຂົ້າຮ່ວມກອງປະຊຸມຄັ້ງນີ້, ຊຶ່ງຈະເປັນການປະກອບສ່ວນສໍາຄັນຕໍ່ການຊຸກຍູ້ເສີມຂະຫຍາຍການພົວພັນຮ່ວມມືສອງຝ່າຍ ໃນຖານະເປັນປະເທດຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ໃຫ້ຂະຫຍາຍຕົວດ້ວຍມາດຕະຖານ, ດ້ວຍຄຸນນະພາບ ແລະ ດ້ວຍລະດັບໃໝ່, ພ້ອມທັງໄດ້ຝາກຄໍາອວຍພອນອັນອົບອຸ່ນ ແລະ ຄວາມຢື້ຢາມຖາມຂ່າວ ເຖິງ ສະຫາຍ ເລຂາທິການໃຫຍ່, ປະທານປະເທດ ສີ ຈິ້ນຜິງ ແລະ ບັນດາສະຫາຍການນໍາພັກ, ລັດຖະບານ ແລະ ປະຊາຊົນຈີນອ້າຍນ້ອງ ເນື່ອງໃນໂອກາດສະເຫຼີມສະຫຼອງວັນສະຖາປະນາ ສາທາລະນະລັດ ປະຊາຊົນຈີນ ຄົບຮອບ 75 ປີ ໃນວັນທີ 1 ຕຸລາ 2024 ຜ່ານມາ.

ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ, ການເປັນຄູ່ຮ່ວມຍຸດທະສາດ ຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ທີ່ໄດ້ຮັບການເສີມຂະຫຍາຍດ້ວຍມາດຕະຖານຄຸນນະພາບ ແລະ ລະດັບໃໝ່ຢ່າງບໍ່ຢຸດຢັ້ງ ທັງທາງກວ້າງ ແລະ ທາງເລິກ, ອັນໄດ້ປະກອບສ່ວນສໍາຄັນ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຂອງສອງຊາດ ໄດ້ຢ່າງໝັ້ນຄົງ, ພ້ອມທັງໄດ້ຕີລາຄາສູງຕໍ່ການພົວພັນຮ່ວມມືດ້ານຕ່າງໆ ກໍຄື ບັນດາໂຄງການຮ່ວມມືສອງຝ່າຍ ໂດຍສະເພາະໂຄງການລົດໄຟ ລາວ-ຈີນ ທີ່ໄດ້ນໍາຜົນປະໂຫຍດອັນໃຫຍ່ຫຼວງມາສູ່ປະຊາຊົນສອງຊາດ ລາວ-ຈີນ ນັບຕັ້ງແຕ່ໄດ້ເປີດນໍາໃຊ້ຢ່າງເປັນທາງການເປັນຕົ້ນມາ, ການຮ່ວມມືດ້ານການຄ້າ-ການລົງທຶນ ໄດ້ຮັບການຂະຫຍາຍຕົວຢ່າງບໍ່ຢຸດຢັ້ງ ແລະ ບັນດາໂຄງການຊ່ວຍເຫຼືອລ້າຂອງຝ່າຍຈີນ ກໍໄດ້ຮັບການຈັດຕັ້ງປະຕິບັດ ຢ່າງມີປະສິດທິຜົນ, ຊຶ່ງປະກອບສ່ວນສໍາຄັນເຂົ້າໃນແຜນພັດທະນາເສດຖະກິດ-ສັງຄົມຂອງ ສປປ ລາວ.

ສະຫາຍ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ສະເໜີໃຫ້ຝ່າຍຈີນ ສືບຕໍ່ຊຸກຍູ້ບັນດາວິສາຫະກິດຂອງຈີນ ໃຫ້ເຂົ້າມາລົງທຶນຢູ່ ສປປ ລາວ ຫຼາຍຂຶ້ນ ໂດຍສະເພາະໃນຂະແໜງການທີ່ ສປປ ລາວ ມີທ່າແຮງ, ພ້ອມທັງຊຸກຍູ້ພາກທຸລະກິດຂອງຈີນ ທີ່ມີຄວາມສົນໃຈ ແລະ ມີທ່າແຮງ ເພື່ອສົມທົບກັບພາກສ່ວນກ່ຽວຂ້ອງຂອງ ສປປ ລາວ ຮ່ວມກັນພັດທະນາ ແລະ ຮ່ວມກັນຊຸກຍູ້ໃຫ້ການທ່ອງທ່ຽວ ລະຫວ່າງສອງປະເທດ ໃຫ້ມີບັນຍາກາດໃຫມ່ ໂດຍສະເພາະໃນປີທ່ອງທ່ຽວລາວ 2024 ນີ້. ພ້ອມນີ້, ສະຫາຍ ເລຂາທິການໃຫຍ່, ປະທານປະເທດ ທອງລຸນ ສີສຸລິດ ໄດ້ຕາງໜ້າພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ພັກ, ລັດຖະບານ ແລະ ປະຊາຊົນຈີນ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າ ແລະ ທັນການແກ່ ສປປ ລາວ ຕະຫຼອດມາ ລວມທັງການຊ່ວຍເຫຼືອໃຫ້ແກ່ການເປັນປະທານໝູນວຽນອາຊຽນຂອງ ສປປ ລາວ ໃນປີ 2024 ນີ້, ພ້ອມທັງໄດ້ອວຍພອນໃຫ້ການເດີນທາງຢ້ຽມຢາມທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ ຢູ່ ສປປ ລາວ ຂອງ ສະຫາຍ ນາຍົກລັດຖະມົນຕີ ແຫ່ງ ສປ ຈີນ ແລະ ຄະນະ ໃນຄັ້ງນີ້ ປະສົບຜົນສໍາເລັດຕາມລະດັບຄາດໝາຍ.

ໃນຂະນະດຽວກັນ, ສະຫາຍ ນາຍົກລັດຖະມົນຕີ ຫຼີ ສຽງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ຢືນຢັນຈະສືບຕໍ່ສົ່ງເສີມສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດ ຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ຄູ່ຮ່ວມຊາຕາກໍາ ຈີນ-ລາວ, ລາວ-ຈີນ ໃຫ້ຈະເລີນງອກງາມຂຶ້ນເລື້ອຍໆ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ກໍຄື ເພື່ອສັນຕິພາບ ແລະ ການພັດທະນາຂອງພາກພື້ນ ແລະ ສາກົນ.

ຂ່າວ: ກະຊວງການຕ່າງປະເທດ

ໂດຍຕອບສະໜອງຕາມການເຊື້ອເຊີນຂອງ ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ, ທ່ານ ລໍເຣັນສ ວອງ (H.E. Mr. Lawrence WONG), ນາຍົກລັດຖະມົນຕີ ແລະ ລັດຖະມົນຕີກະຊວງການເງິນ ແຫ່ງ ສາທາລະນະລັດ ສິງກະໂປ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງມາຢ້ຽມຢາມທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມທີ່ກ່ຽວຂ້ອງອື່ນໆ ທີ່ ສປປ ລາວ ໃນລະຫວ່າງວັນທີ 8-12 ຕຸລາ 2024 ເພື່ອເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ລາວ ແລະ ສິງກະໂປ ໃຫ້ເລິກເຊິ່ງກວ່າເກົ່າ.

ພິທີຕ້ອນຮັບ ທ່ານ ລໍເຣັນສ ວອງ ພ້ອມດ້ວຍພັນລະຍາ ແລະ ຄະນະ ຢ່າງເປັນທາງການ ໄດ້ຈັດຂຶ້ນຢ່າງສົມກຽດ ທີ່ ສໍານັກງານນາຍົກລັດຖະມົນຕີ, ໂດຍການຕ້ອນຮັບຂອງ ທ່ານ ສອນໄຊ ສີພັນດອນ ພ້ອມດ້ວຍພັນລະຍາ ແລະ ຄະນະ. ພາຍຫຼັງສໍາເລັດພິທີຕ້ອນຮັບ, ສອງຝ່າຍ ໄດ້ດໍາເນີນການພົບປະສອງຝ່າຍຢ່າງເປັນທາງການ. ໃນໂອກາດນີ້, ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ມີຄວາມປິຕິຍິນດີທີ່ໄດ້ຕ້ອນຮັບ ທ່ານ ລໍເຣັນສ ວອງ ແລະ ຄະນະ ໃນຄັ້ງນີ້, ຊຶ່ງຖືວ່າເປັນການຢ້ຽມຢາມ ສປປ ລາວ ຄັ້ງທໍາອິດ ພາຍຫຼັງດໍາລົງຕໍາແໜ່ງ ນາຍົກລັດຖະມົນຕີ ແຫ່ງ ສ ສິງກະໂປ ໃນເດືອນພຶດສະພາ 2024 ທີ່ຜ່ານມາ.

ໃນການພົບປະຄັ້ງນີ້, ສອງຝ່າຍ ໄດ້ແຈ້ງສະພາບການພັດທະນາເສດຖະກິດ-ສັງຄົມ ຂອງແຕ່ລະປະເທດໃຫ້ກັນຊາບ, ພ້ອມທັງໄດ້ຕີລາຄາ ແລະ ທົບທວນຄືນສາຍພົວພັນມິດຕະພາບອັນຍາວນານ ແລະ ການຮ່ວມມືທີ່ເຕັມໄປດ້ວຍໝາກຜົນ ລະຫວ່າງ ສປປ ລາວ ແລະ ສ ສິງກະໂປ ຕະຫຼອດໄລຍະ 5 ທົດສະວັດຜ່ານມາ ທີ່ໄດ້ຮັບການຊຸກຍູ້ສົ່ງເສີມ ແລະ ພັດທະນາຂຶ້ນເປັນກ້າວໆ, ສະແດງອອກໃນການພົບປະແລກປ່ຽນຢ້ຽມຢາມຊຶ່ງກັນ ແລະ ກັນ ຂອງຄະນະຜູ້ແທນຂັ້ນສູງສອງປະເທດ ຢ່າງເປັນປົກກະຕິ, ການໄປມາຫາສູ່ລະຫວ່າງປະຊາຊົນດ້ວຍກັນ, ການຮ່ວມມືດ້ານເສດຖະກິດ, ການຄ້າ-ການລົງທຶນ, ການພົວພັນຮ່ວມມືຂອງບັນດາຫົວໜ່ວຍທຸລະກິດ, ການສຶກສາ, ການພັດທະນາຊັບພະຍາກອນມະນຸດ, ສາທາລະນະສຸກ, ການສະໜັບສະໜູນ ແລະ ຊ່ວຍເຫຼືອຊຶ່ງກັນ ແລະ ກັນ ໃນເວທີພາກພື້ນ ແລະ ສາກົນ ໂດຍສະເພາະ ໃນຂອບອາຊຽນ ແລະ ອົງການ ສປຊ. ສອງຝ່າຍ ໄດ້ສະແດງຄວາມຊົມເຊີຍມາຍັງພາກສ່ວນກ່ຽວຂ້ອງຂອງສອງປະເທດ ທີ່ໄດ້ຮ່ວມກັນສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລະຫວ່າງ ສປປ ລາວ ແລະ ສ ສິງກະໂປ ຄົບຮອບ 50 ປີ ໃນປີ 2024 ນີ້ຢ່າງຄຶກຄື້ນ ແລະ ມີຄວາມຫມາຍ ໂດຍສະເພາະການຈັດກິດຈະກໍາຕ່າງໆເປັນຕົ້ນແມ່ນ ການອອກແບບ ແລະ ການປະກາດຮອງຮັບສັນຍາລັກ (LOGO) 50 ປີ, ການຈັດງານລ້ຽງ ແລະ ການສະແດງສິລະປະດົນຕີຮ່ວມກັນຂອງນັກສິນລະປິນຈາກສິງກະໂປ ແລະ ສປປ ລາວ. ພ້ອມນີ້, ສອງຝ່າຍໄດ້ຕີລາຄາສູງຕໍ່ໝາກຜົນຂອງການພົບປະກັນ ທີ່ ສິງກະໂປ ໃນເດືອນກໍລະກົດ 2024 ຜ່ານມາ ແລະ ຢືນຢັນຄືນຄວາມໝາຍໝັ້ນ ໃນການສືບຕໍ່ເຮັດວຽກຢ່າງໃກ້ຊິດຮ່ວມກັນ ເພື່ອສືບຕໍ່ເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ ໃຫ້ກ້າວສູ່ລວງເລິກຍິ່ງຂຶ້ນໃນຊຸມປີຕໍ່ໜ້າ.

ສຳລັບທິດທາງໃນຕໍ່ໜ້າ, ສອງຝ່າຍ ເຫັນດີຈະສືບຕໍ່ຊຸກຍູ້ຂະແໜງການກ່ຽວຂ້ອງຂອງຕົນເພື່ອຈັດຕັ້ງປະຕິບັດບັນດາແຜນງານ ແລະ ໂຄງການຮ່ວມມືຂອງສອງລັດຖະບານ ໃຫ້ສໍາເລັດຜົນຕາມຄາດໝາຍ, ໂດຍສະເພາະ ການຮ່ວມມືດ້ານການເມືອງ ແລະ ດ້ານເສດຖະກິດ ກໍຄືການຄ້າ, ການລົງທຶນ ເປັນຕົ້ນແມ່ນ ການຮ່ວມມືດ້ານພະລັງງານສະອາດ, ດ້ານກະສິກຳ, ດ້ານຊັບພະຍາກອນທໍາມະຊາດ ກໍຄືສິນເຊື່ອກາກບອນ (Carbon Credit), ດ້ານສາທາລະນະສຸກ ແລະ ພັດທະນາຊຸມຊົນ, ການພັດທະນາຊັບພະຍາກອນມະນຸດ, ການທ່ອງທ່ຽວ ແລະ ຂະແໜງການອື່ນໆ ທີ່ເປັນທ່າແຮງບົ່ມຊ້ອນ, ລວມທັງການຮ່ວມມືໃນການພັດທະນາຂົງເຂດພາກພື້ນ ແລະ ສາກົນ ໂດຍສະເພາະການສ້າງຄວາມເຂັ້ມແຂງໃຫ້ແກ່ປະຊາຄົມອາຊຽນ ເພື່ອຜົນສໍາເລັດສໍາລັບການເປັນປະທານອາຊຽນຂອງ ສປປ ລາວ ໃນປີ 2024. ນອກນັ້ນ, ສອງຝ່າຍ ຍັງໄດ້ແລກປ່ຽນຄໍາຄິດເຫັນກ່ຽວກັບສະພາບການພົ້ນເດັ່ນໃນພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ.

ໃນໂອກາດດຽວກັນນີ້, ທ່ານ ສອນໄຊ ສີພັນດອນ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ກໍຄືໃນນາມສ່ວນຕົວ ສະແດງຄວາມຂອບໃຈຢ່າງຈິງໃຈມາຍັງ ທ່ານ ລໍເຣັນສ ວອງ ກໍຄືລັດຖະບານ ແລະ ປະຊາຊົນສິງກະໂປ ທີ່ໄດ້ໃຫ້ການສະໜັບສະໜູນ ແລະ ຮ່ວມມືຊ່ວຍເຫຼືອ ສປປ ລາວ ຕະຫຼອດໄລຍະຜ່ານມາ, ໂດຍສະເພາະ ການເປັນປະທານອາຊຽນ ໃນປີ 2024 ໃຫ້ສໍາເລັດຢ່າງຈົບງາມ, ລວມເຖິງການຊ່ວຍເຫຼືອເຄື່ອງບັນເທົາທຸກໃນເຫດການໄພພິບັດນໍ້າຖ້ວມ ຢູ່ ບັນດາແຂວງຕ່າງໆຂອງລາວ, ຊຶ່ງເປັນການຊ່ວຍເຫຼືອທາງດ້ານມະນຸດສະທໍາທີ່ມີຄຸນຄ່າ ແລະ ທັນການ.

ໃນຂະນະດຽວກັນ, ທ່ານ ລໍເຣັນສ ວອງ ໄດ້ສະແດງຄວາມຂອບໃຈຢ່າງຈິງໃຈຕໍ່ ທ່ານ ສອນໄຊ ສີພັນດອນ ກໍຄືລັດຖະບານ ແລະ ປະຊາຊົນລາວ ທີ່ໃຫ້ການຕ້ອນຮັບຢ່າງອົບອຸ່ນ, ທັງໄດ້ສະແດງຄວາມຊົມເຊີຍຕໍ່ຜົນສໍາເລັດໃນຖານະເປັນປະທານອາຊຽນຂອງ ສປປ ລາວ ໃນປີ 2024 ຕະຫຼອດເກືອບ 10 ເດືອນຜ່ານມາ ແລະ ໄດ້ຢຶນຢັນຄືນຈະສືບຕໍ່ໃຫ້ການສະໜັບສະໜູນຈົນສໍາເລັດຢ່າງຈົບງາມ ເຊັ່ນດຽວກັນກັບການສືບຕໍ່ເສີມຂະຫຍາຍການພົວພັນຮ່ວມມືຂອງສອງປະເທດ ໃຫ້ໄດ້ຮັບການພັດທະນາຍິ່ງໆຂຶ້ນ.

ຂ່າວ: ກະຊວງການຕ່າງປະເທດ,

ໃນວັນທີ 10 ຕຸລາ 2024 ນີ້, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະ ມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະສອງຝ່າຍກັບ ທ່ານ ຊາວີເອ ເບັດແຕນລ໌ (Mr. Xavier Bettel) ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ການຄ້າສາກົນ, ລັດຖະມົນຕີກະຊວງຮ່ວມມືເພື່ອການພັດທະນາ ແລະ ວຽກງານມະນຸດສະທໍາ ແຫ່ງ ຣາຊະອານາຈັກ ລຸກຊໍາບວກ ພ້ອມດ້ວຍຄະນະ ທີ່ໄດ້ເດີນທາງມາຮ່ວມພິທີເຊັນສົນທິສັນຍາ ໄມຕີຈິດ ແລະ ການຮ່ວມມື ໃນອາຊີຕາເວັນອອກສຽງໃຕ້ (TAC) ໃນໄລຍະກອງປະຊຸມສຸດຍອດອາຊຽນ ຄັ້ງທີ 44 ແລະ 45 ທີ່ ສປປ ລາວ.

ໃນການພົບປະຄັ້ງນີ້, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງ ຕໍ່ການມາເຂົ້າຮ່ວມກອງປະຊຸມ ຢູ່ ສປປ ລາວ ຄັ້ງນີ້ ເຊິ່ງເປັນການເດີນທາງມາ ສປປ ລາວ ຄັ້ງທີສອງ ໃນປີ 2024 ຂອງ ທ່ານ ຮອງນາຍົກລັດຖະມົນຕີ ລຸກຊໍາບວກ ທີ່ມີຄວາມໝາຍຄວາມສຳຄັນຫລາຍ, ທັງເປັນການຢໍ້າຄືນ ໃຫ້ເຫັນເຖິງການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ຣາຊະອານາຈັກ ລຸກຊໍາບວກ ໃຫ້ສືບຕໍ່ຂະຫຍາຍຕົວຍິ່ງໆຂຶ້ນໄປ ໂດຍສະເພາະ ການແລກປ່ຽນການຢ້ຽມຢາມ ເຊິ່ງກັນ ແລະ ກັນ, ລວມເຖິງການຮ່ວມມືເພື່ອການພັດທະນາໃນຂົງເຂດຕ່າງໆ ເປັນຕົ້ນ ການພັດທະນາຊັບພະຍາກອນມະນຸດ, ການສຶກສາ, ວຽກງານສົ່ງເສີມວິຊາຊີບ, ສາທາລະນະສຸກ ແລະ ອື່ນໆ. ທ່ານ ຮອງນາຍົກລັດຖະມົນຕີ ສະເຫລີມໄຊ ກົມມະສິດ ຍັງໄດ້ແຈ້ງສະພາບການພັດທະນາ ເສດຖະກິດ-ສັງຄົມ ຢູ່ ສປປ ລາວ ແລະ ການດໍາເນີນຍຸດທະສາດ ຫັນປະເທດທີ່ບໍ່ມີຊາຍແດນຕິດຈອດທະເລ ເປັນປະເທດເຊື່ອມໂຍງເຊື່ອມຈອດກັບພາກພື້ນ ແລະ ການເປັນປະທານ ອາຊຽນຂອງ ສປປ ລາວ. ພ້ອມນີ້, ທ່ານ ຮອງນາຍົກລັດຖະມົນຕີ ໄດ້ຕາງໜ້າໃຫ້ ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ຕໍ່ຝ່າຍລຸກຊໍາບວກ ທີ່ໄດ້ໃຫ້ການຊ່ວຍເຫລືອອັນລໍ້າຄ່າ ແກ່ ສປປ ລາວ ຕະຫລອດໄລຍະຜ່ານມາ ເຊິ່ງການຊ່ວຍເຫລືອດັ່ງກ່າວ ປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ ກໍຄື ການພັດທະນາຊົນນະບົດ ແລະ ຫລຸດຜ່ອນຄວາມທຸກຍາກຂອງປະຊາຊົນ ແນໃສ່ເຮັດໃຫ້ ສປປ ລາວ ຫລຸດພົ້ນອອກຈາກ ສະຖານະພາບປະເທດດ້ອຍພັດທະນາ ໃນຊຸມປີຕໍ່ໜ້າ ແລະ ຊ່ວຍໃຫ້ ສປປ ລາວ ບັນລຸເປົ້າໝາຍແຜນການພັດທະນາແບບຍືນຍົງຂອງ ອົງການ ສປຊ ໃນປີ 2030.

ພ້ອມກັນນີ້, ສອງຝ່າຍ ໄດ້ປຶກສາຫາລືແລກປ່ຽນຄໍາຄິດເຫັນຢ່າງກົງໄປກົງມາ ແລະ ເຫັນດີຈະສືບຕໍ່ຮ່ວມມືກັນຢ່າງໃກ້ຊິດໃນການຊຸກຍູ້ສົ່ງເສີມການຈັດຕັ້ງປະຕິບັດບັນດາແຜນງານ ແລະ ໂຄງການຮ່ວມມືຂອງສອງລັດຖະ ບານ ທີ່ມີຢູ່ແລ້ວ ໃຫ້ສໍາເລັດຜົນຕາມຄາດໝາຍ, ພ້ອມທັງແລກປ່ຽນຄຳຄິດຄຳເຫັນ ກ່ຽວກັບການສົ່ງເສີມການຮ່ວມມືທາງດ້ານເສດຖະກິດ-ການຄ້າ ແລະ ການລົງທຶນ ໃນ ສປປ ລາວ.

ໂອກາດນີ້, ທ່ານ ຊາວີເອ ເບັດແຕນລ໌ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ໃນຄັ້ງນີ້ ແລະ ຊົມເຊີຍການເປັນປະທານອາຊຽນ ປີ 2024 ຂອງ ສປປ ລາວ, ພ້ອມທັງສະແດງຄວາມຍິນດີທີ່ຈະສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ຣາຊະອານາຈັກ ລຸກຊຳບວກ ໃຫ້ແຕກດອກອອກຜົນຍິ່ງໆຂຶ້ນ, ພ້ອມທັງ ຢືນຢັນຈະສືບຕໍ່ໃຫ້ການຊ່ວນເຫລືອການພັດທະນາຢູ່ ສປປ ລາວ ຕື່ມອີກໃນຕໍ່ໜ້າ.

ນອກຈາກການປຶກສາຫາລືວຽກງານສອງຝ່າຍ, ທັງສອງທ່ານ ຍັງໄດ້ແລກປ່ຽນຄໍາຄິດຄໍາເຫັນ ກ່ຽວກັບ ບັນ ຫາພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ.

——————–

ກອງປະຊຸມສຸດຍອດອາຊຽນ-ສະຫະລັດອາເມຣິກາ ຄັ້ງທີ 12 ໄດ້ຈັດຂຶ້ນໃນວັນທີ 11 ຕຸລານີ້ ທີ່ ຫໍປະຊຸມແຫ່ງຊາດ ໂດຍການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ, ມີບັນດາຜູ້ນໍາອາຊຽນ ແລະ ທ່ານ ແອນໂທນີ ບລິງເກັນ ລັດຖະມົນຕີຕ່າງປະເທດ ສະຫະລັດອາເມຣິກາ ແລະ ນາຍົກລັດຖະມົນຕີ ຕີມໍແລັສເຕເຂົ້າຮ່ວມໃນນາມຜູ້ສັງເກດການ.

ກອງປະຊຸມໄດ້ທົບທວນຄືນ ແລະ ກໍານົດທິດທາງໃນການຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານອາຊຽນ-ສະຫະລັດອາເມຣິກາ ໂດຍສຸມໃສ່ການຈັດຕັ້ງປະຕິບັດບັນດາໂຄງການຮ່ວມມືທີ່ອາຊຽນ ແລະ ສະຫະລັດອາເມຣິກາຮ່ວມມືກັນ ເພື່ອນໍາເອົາຜົນປະໂຫຍດຕົວຈິງມາໃຫ້ປະຊາຊົນຂອງສອງພາກພື້ນ. ສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືອາຊຽນ-ອາເມຣິກາຕະຫຼອດໄລຍະ 47 ປີຜ່ານມາ ທີ່ໄດ້ຮັບການເສີມຂະຫຍາຍ ກວມເອົາການຮ່ວມມືດ້ານການເມືອງ-ຄວາມໝັ້ນຄົງ, ດ້ານເສດຖະກິດ ແລະ ວັດທະນະທໍາ-ສັງຄົມ ອັນໄດ້ສະທ້ອນໃຫ້ເຫັນໝາກຜົນຂອງການຮ່ວມມືໃນໄລຍະຜ່ານມາ ແລະ ທ່າແຮງຂອງການຮ່ວມມືກັນໃນອະນາຄົດ ເພື່ອສືບຕໍ່ປະກອບສ່ວນເຂົ້າໃນຂະບວນການສ້າງປະຊາຄົມອາຊຽນ ກໍຄືການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມື.

ສໍາລັບທິດທາງການຮ່ວມມືໃນຕໍ່ໜ້າ, ສປປ ລາວ ໄດ້ຊຸກຍູ້ໃຫ້ສະຫະລັດອາເມຣິກາສືບຕໍ່ສະໜັບສະໜູນອາຊຽນໃນຂົງເຂດທີ່ສໍາຄັນ ເປັນຕົ້ນແມ່ນການຄ້າ-ການລົງທຶນ, ສາທະລະນະສຸກ, ພະລັງງານທີ່ສະອາດ, ການພັດທະນາຊັບພະຍາກອນມະນຸດ ໂດຍຜ່ານການແລກປ່ຽນດ້ານການສຶກສາ ແລະ ວັດທະນະທໍາ, ການສະໜອງທຶນຝຶກອົບຮົມໃນໄລຍະສັ້ນ ແລະ ຍາວ ແລະ ການສົ່ງເສີມໂຄງການພັດທະນາດ້ານສີມືແຮງງານໃນຂະແໜງການເຕັກໂນໂລຊີທີ່ທັນສະໃໝ, ດ້ານນະວັດຕະກໍາ ກໍຄື ປັນຍາປະດິດ ແລະ ດ້ານອື່ນໆ.

ໃນໂອກາດນີ້, ກອງປະຊຸມສຸດຍອດອາຊຽນ-ອາເມຣິກາ ໄດ້ຮັບຮອງເອົາຖະແຫຼງການຜູ້ນໍາອາຊຽນ-ອາເມຣິກາ ວ່າດ້ວຍປັນຍາປະດິດທີ່ປອດໄພ, ໝັ້ນຄົງ ແລະ ເຊື່ອຖືໄດ້.

ສະຫະລັດອາເມຣິກາ ເປັນຄູ່ເຈລະຈາທີ່ສໍາຄັນຂອງອາຊຽນທີ່ມີການຮ່ວມມືອັນຍາວນານ. ອາຊຽນ ແລະ ສະຫະລັດອາເມຣິກາໄດ້ສ້າງຕັ້ງສາຍພົວພັນໃນປີ 1977, ໄດ້ຍົກລະດັບເປັນຄູ່ຮ່ວມຍຸດທະສາດໃນປີ 2015 ແລະ ເປັນຄູ່ຮ່ວມຍຸດທະສາດຮອບດ້ານໃນປີ 2022.

ຂ່າວ: ກົມການຂ່າວ ກະຊວງການຕ່າງປະເທດ, ພາບ: ຕຸໄລເພັດ

#MediaLaos#massmedia#ASEAN

ໂດຍຕອບສະໜອງຕາມການເຊື້ອເຊີນຂອງ ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ, ພະນະທ່ານ ອິຊິບະ ຊິເງະຣຸ (ISHIBA Shigeru), ນາຍົກລັດຖະມົນຕີ ແຫ່ງ ຍີ່ປຸ່ນ ພ້ອມດ້ວຍຄະນະ ໄດ້ຢ້ຽມຢາມ ສປປ ລາວ ຢ່າງເປັນທາງການ, ໃນໂອກາດເຂົ້າຮ່ວມກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 27 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ, ໃນລະຫວ່າງວັນທີ 10-11 ຕຸລາ 2024 ເພື່ອສືບຕໍ່ເພີ່ມທະວີຮັດແໜ້ນສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີງາມ ພາຍໃຕ້ການເປັນ ຄູ່ຮ່ວມຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ.

ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນໃນຕອນເຊົ້າຂອງວັນທີ 11 ຕຸລາ 2024, ທີ່ສໍານັກງານນາຍົກລັດຖະມົນຕີ. ພາຍຫຼັງສໍາເລັດພິທີ, ພະນະທ່ານ ນາຍົກລັດຖະມົນຕີ ສອນໄຊ ສີພັນດອນ ແລະ ພະນະທ່ານ ນາຍົກລັດຖະມົນຕີ ອິຊິບະ ຊິເງະຣຸ ພ້ອມດ້ວຍຄະນະ ກໍ່ໄດ້ເຂົ້າຮ່ວມກອງປະຊຸມພົບປະສອງຝ່າຍຢ່າງເປັນທາງການ. ໃນການພົບປະ, ຝ່າຍລາວ ໄດ້ສະແດງຄວາມຊົມເຊີຍຕໍ່ຄູ່ຮ່ວມຕຳແໜ່ງຝ່າຍຍີ່ປຸ່ນ ທີ່ໄດ້ຮັບເລືອກຕັ້ງເປັນປະທານພັກເສລີປະຊາທິປະໄຕ (Liberal Democratic Party) ແລະ ໄດ້ຮັບການແຕ່ງຕັ້ງເປັນນາຍົກລັດຖະມົນຕີ ຍີ່ປຸ່ນ ຄົນໃຫມ່ ໃນວັນທີ 01 ຕຸລາ 2024 ຜ່ານມາ, ເຊິ່ງການມາຢ້ຽມຢາມຄັ້ງນີ້ ໄດ້ເປັນຂີດໝາຍສໍາຄັນໃນການເສີມຂະຫຍາຍການພົວພັນຮ່ວມມື ລາວ-ຍີ່ປຸ່ນ ພາຍໃຕ້ການເປັນ ຄູ່ຮ່ວມຍຸດທະສາດ ໃຫ້ແຕກດອກອອກຜົນຍິ່ງຂຶ້ນກວ່າເກົ່າ. ສອງຝ່າຍ ເຫັນດີຈະສືບຕໍ່ແລກປ່ຽນການຢ້ຽມຢາມພົບປະຂອງການນຳຂັ້ນສູງຂອງສອງປະເທດ ລາວ-ຍີ່ປຸ່ນ ຢ່າງເປັນປົກກະຕິ, ສືບຕໍ່ຈັດຕັ້ງປະຕິບັດບັນດາເອກະສານທີ່ໄດ້ລົງນາມກັນແລ້ວ ໃຫ້ປະກົດຜົນເປັນຈິງ, ພ້ອມນັ້ນ ສອງຝ່າຍ ໄດ້ເຫັນດີເປັນເອກະພາບນໍາກັນທີ່ຈະຍົກລະດັບການພົວພັນຮ່ວມມື ຈາກ ຄູ່ຮ່ວມຍຸດທະສາດ ຂຶ້ນເປັນ “ຄູ່ຮ່ວມຍຸດທະສາດຮອບດ້ານ” ແລະ ເຫັນດີຕໍ່ແບບໂລໂກ້ 70 ປີ ໂດຍມີສັນຍາລັກ ຊ້າງ ແລະ ດອກສະກຸຣະ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຍີປຸ່ນ ໃນປີ 2025 ທີ່ຈະມາເຖິງນີ້.

ພ້ອມນີ້ ທ່ານ ນາຍົກ ສອນໄຊ ສີພັນດອນ ກໍ່ໄດ້ຕອບຮັບການເຊື້ອເຊີນ ແລະ ມີຄວາມຍິນດີ ທີ່ຈະເດີນທາງໄປຢ້ຽມຢາມເຮັດວຽກທາງການ (Official Working Visit) ທີ່ ຍີ່ປຸ່ນ ໃນຕົ້ນປີ 2025 ເພື່ອເປີດປີແຫ່ງການສະເຫຼີມສະຫຼອງ ຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດ ລາວ-ຍີ່ປຸ່ນ, ຄົບຮອບ 10 ປີ ແຫ່ງການເປັນ ຄູ່ຮ່ວມຍຸດທະສາດ ແລະ ຄົບຮອບ 60 ປີ ທີ່ ລັດຖະບານຍີ່ປຸ່ນ ໄດ້ສົ່ງອາສາສະຫມັກມາຊ່ວຍເຫຼືອລາວ. ພ້ອມດຽວກັນນີ້, ຝ່າຍຍີ່ປຸ່ນ ຍັງເຫັນດີສືບຕໍ່ຮ່ວມມືກັບຝ່າຍລາວ ເພື່ອແກ້ໄຂເສດຖະກິດ-ການເງິນຂອງລາວ ແລະ ສືບຕໍ່ເພີ່ມທະວີວຽກງານການເຊື່ອມໂຍງ-ເຊື່ອມຈອດ ສປປ ລາວ ອອກສູ່ພາກພື້ນ ໂດຍຈະພິຈາລະນາໃຫ້ການຊ່ວຍເຫຼືອບັນດາໂຄງການບູລິມະສິດຂອງ ສປປ ລາວ ເພື່ອຊຸກຍູ້ໃຫ້ ສປປ ລາວ ສາມາດບັນລຸເປົ້າຫມາຍການຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນຕໍ່ຫນ້າ. ພ້ອມນີ້, ສອງຝ່າຍ ໄດ້ສະແດງຄວາມຍິນດີຈະສືບຕໍ່ຮ່ວມມື ແລະ ສະຫນັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ເປັນຕົ້ນ ຂອບການຮ່ວມມື ອາຊຽນ-ຍີ່ປຸ່ນ, ການຮ່ວມມືຂອບແມ່ນ້ຳຂອງ-ຍີ່ປຸ່ນ, ສປຊ ແລະ ອື່ນໆ; ຝ່າຍລາວ ໄດ້ສະແດງຄວາມຊົມເຊີຍຕໍ່ພາລະບົດບາດຂອງຍີ່ປຸ່ນ ໃນການເປັນເຈົ້າພາບຈັດ ກອງປະຊຸມສຸດຍອດຂອງປະຊາຄົມອາຊີ ເພື່ອຫຼຸດຜ່ອນການປ່ອຍອາຍພິດໃຫ້ເຫຼືອສູນ (ASIA Zero Emission Community – AZEC) ຄັ້ງທີ 2 ໃນໂອກາດກອງປະຊຸມສຸດຍອດອາຊຽນ ທີ່ ສປປ ລາວ ເປັນເຈົ້າພາບປີ 2024, ເຊິ່ງເປັນການຊຸກຍູ້ສົ່ງເສີມການຮ່ວມມືໃນດ້ານພະລັງງານ ໃນຕໍ່ຫນ້າ.

ໃນໂອກາດນີ້, ພະນະທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຕໍ່ການສະໜັບສະໜູນ ແລະ ການຊ່ວຍເຫຼືອອັນລ້ຳຄ່າຈາກ ລັດຖະບານ ແລະ ປະຊາຊົນ ຍີ່ປຸ່ນ ໃນໄລຍະຜ່ານມາ, ໂດຍສະເພາະ ການພັດທະນາຊັບພະຍາກອນມະນຸດ, ການພັດທະນາໂຄງລ່າງພື້ນຖານ, ສາທາລະນະສຸກ, ກໍາສິກໍາ-ປ່າໄມ້, ວຽກງານເກັບກູ້ລະເບີດບໍ່ທັນແຕກ (UXO), ການສົ່ງຊ່ຽວຊານ ແລະ ອາສາສະຫມັກຂອງອົງການ JICA ມາຊ່ວຍເຫຼືອ ສປປ ລາວ, ພິເສດ ໂຄງການຊ່ວຍເຫຼືອປັບປຸງສະໜາມກິລາເຈົ້າອານຸວົງ, ໂຄງການປັບປຸງສະໜາມບິນສາກົນວັດໄຕ ແລະ ການສະໜັບສະໜູນ ສປປ ລາວ ໃນການເປັນປະທານອາຊຽນ ປີ 2024.

ນະຄອນຫຼວງວຽງຈັນ, ວັນທີ 11 ຕຸລາ 2024
ບົດຂ່າວ: ກົມການຂ່າວ,​ ກະຊວງການຕ່າງປະເທດ
ຮູບພາບ: ກົມສື່ມວນຊົນ

ໃນຕອນເຊົ້າວັນທີ 11 ຕຸລາ 2024 ທີ່ ສູນປະຊຸມແຫ່ງຊາດ (NCC), ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂຳ່ນັບ ຂອງ ທ່ານ ຄລາວ ສະວັອບ (Klaus SCHWAB), ຜູ້ກໍ່ຕັ້ງ ແລະ ປະທານບໍລິຫານ ອົງການເວທີເສດຖະກິດໂລກ (WEF) ພ້ອມດ້ວຍຄະນະ ໃນໂອກາດ ມາເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 ແລະ 45, ກອງປະຊຸມສຸດຍອດທຸລະກິດ ແລະ ການລົງທຶນອາຊຽນ ປະຈຳປີ 2024 ແລະ ກອງປະຊຸມທີ່ປິ່ນອ້ອມອື່ນໆ ໃນໄລຍະວັນທີ 09-11 ຕຸລາ 2024 ທີ່ ນະຄອນຫຼວງວຽງຈັນ. 

ຈຸດປະສົງຂອງການພົບປະຢ້ຽມຂຳ່ນັບຄັ້ງນີ້ ເພື່ອເພີ່ມທະວີການຮ່ວມມືເພື່ອສົ່ງເສີມການພັດທະນາເສດຖະກິດແບບຍືນຍົງ ແລະ ເພື່ອຮັດແໜ້ນການຮ່ວມມື ລະຫວ່າງ ສປປ ລາວ ແລະ ອົງການ WEF
ໃນໂອກາດນີ້, ພະນະທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ທ່ານ ຄລາວ ສະວັອບ ແລະ ຄະນະຜູ້ແທນອົງການ WEF ແລະ ຕີ ຕີລາຄາສູງ ຕໍ່ ບົດບາດຂອງ ອົງການ WEF ໃນການສົ່ງເສີມການຮ່ວມມື ລະຫວ່າງ ພາກລັດ ແລະ ພາກເອກະຊົນ ແລະ ໄດ້ປະກອບສ່ວນໃນການແນະນໍາ ແລະ ປຶກສາຫາລື ກ່ຽວກັບ ວຽກງານໃນຂົງເຂດເສດຖະກິດ ຂອງ ພາກພື້ນ ກໍ່ຄືທົ່ວໂລກ ລວມທັງ ສປປ ລາວ. ພ້ອມນັ້ນ, ທ່ານນາຍົກ ສອນໄຊ ສີພັນດອນ ຍັງໄດ້ ຕີລາຄາເຖິງສະພາບເສດຖະກິດ ໂລກ ກໍຄື ອາຊີ ທີ່ຍັງຢູ່ໃນສະພາວະບອບບາງເນື່ອງຈາກຜົນກະທົບຈາກບັນຫາຕ່າງໆທີ່ີເກີດຂຶ້ນໃນໂລກ, ເຊິ່ງໄດ້ກາຍເປັນອຸປະສັກອັນໃຫຍ່ຫຼວງໃຫ້ແກ່ຫຼາຍປະເທດ ໃນຄວາມພະຍາຍາມຟື້ນຕົວຄືນ ໂດຍສະເພາະແມ່ນບັນດາປະເທດກໍາລັງພັດທະນາ ແລະ ປະເທດດ້ອຍພັດທະນາ.

ອົງການ​ເວທີ​ເສດຖະກິດ​​ໂລກ (WEF) ໄດ້ສ້າງຕັ້ງຂຶ້ິນໃນປີ 1971, ​ເປັນອົງການ​ສາກົນ​ອິດສະຫຼະທີ່​ບໍ່​ຫວັງຜົນ​ກຳ​ໄລຂອງ​ສະ​ວິດ ທີ່​ມີ​ຈຸດປະສົງ​ເພື່ອປັບປຸງ​ສະພາບ​ຂອງ​ໂລກ ​ໂດຍ​ການ​ມີ​ສ່ວນ​ຮ່ວມຂອງ​ຜູ້ນຳ​ທາງ​ດ້ານທຸລະກິດ, ການ​ເມືອງ, ສະຖາບັນ ແລະ ຜູ້ນຳທາງດ້ານສັງຄົມຕ່າງໆ ເພື່ອທີ່ຈະກຳນົດຮູບຮ່າງຂອງໂລກ, ພາກພື້ນ ແລະ ອຸດສາຫະກຳ.

ຂ່າວ: ກົມເສດຖະກິດ,​ ກະຊວງການຕ່າງປະເທດ