ກະຊວງເຕັກໂນໂລຊີ ແລະ ການສື່ສານ (ກຕສ) ນຳໂດຍທ່ານ ສັນຕິສຸກ ສິມມາລາວົງ ຮອງລັດຖະມົນຕີ ກຕສ ພ້ອມຄະນະ ໄດ້ເຂົ້າຮ່ວມກອງປະຊຸມສັບປະດາສາກົນດ້ານໄຊເບີຂອງສິງກະໂປ (SICW) ຄັ້ງທີ 7 ແລະ ກອງປະຊຸມລັດຖະມົນຕີອາຊຽນດ້ານຄວາມປອດໄພໄຊເບີ (AMCC) ຄັ້ງທີ 7 ທີ່ປະເທດສິງກະໂປໃນອາທິດຜ່ານມາ ຈັດຂຶ້ນໂດຍອົງການຄວາມປອດໄພທາງໄຊເບີຂອງສິງກະໂປ (Cyber Security Agency of Singapore) ເຊິ່ງເປັນປະທານໂດຍທ່ານນາງ JOSEPHINE TEO ລັດຖະມົນຕີກະຊວງຂໍ້ມູນຂ່າວສານ ແລະ ການສື່ສານ ແລະ ລັດຖະມົນຕີຮັບຜິດຊອບດ້ານຄວາມປອດໄພທາງໄຊເບີ ປະເທດສິງກະໂປ ມີບັນດາລັດຖະມົນຕີດ້ານໄອຊີທີອາຊຽນ ລວມທັງເລຂາທິການໃຫຍ່ອາຊຽນ ອົງການຈັດຕັ້ງສາກົນ ຜູ້ນຳຈາກບັນດາອຸດສາຫະກຳ ສະຖາບັນການສຶກສາ ແລະ ອົງການຈັດຕັ້ງທີ່ບໍ່ຂຶ້ນກັບລັດຖະບານເຂົ້າຮ່ວມ.
ກອງປະຊຸມດັ່ງກ່າວ ຈັດຂຶ້ນພາຍໃຕ້ຄຳຂວັນ “ ຮັກສາຄວາມປອດໄພໃນໂລກດິຈິຕອນ: ການມີຄວາມຮັບຜິດຊອບຮ່ວມກັນ ” (Digital Security: A shared responsibility) ໂດຍກອງປະຊຸມໄດ້ປຶກສາຫາລືແນວທາງ ແລະ ວິທີການຮັບມືຮ່ວມກັບຫຼາຍພາກສ່ວນ ເປັນຕົ້ນ ຂະແໜງອຸດສາຫະກຳ ອົງການຈັດຕັ້ງສາກົນ ແລະ ວິສາຫະກິດຕ່າງໆທີ່ນຳໃຊ້ປະໂຫຍດຈາກການຫັນເປັນດິຈິຕອນ ເພື່ອກຽມພ້ອມຮັບມືກັບໄພຄຸກຄາມທາງໄຊເບີທີ່ນັບມື້ນັບເພີ່ມຂຶ້ນເລື້ອຍໆ ໂດຍສະເພາະ ຄວາມສັບຊ້ອນທີ່ເພີ່ມຂຶ້ນຂອງການນຳໃຊ້ລະຫັດດິຈິຕອນ (digital domain) ການແກ້ໄຂຂໍ້ຂັດແຍ່ງລະຫວ່າງເຂດພູມສັນຖານໃຫ້ມີຄວາມຫົດຢືດ ປອດໄພ ແລະ ຮັບປະກັນໃຫ້ສາມາດຂັບເຄື່ອນປະເທດຊາດກ້າວເຂົ້າສູ່ຍຸກເສດຖະກິດຈິຕອນທີ່ທັນສະໄໝ ແລະ ສະຫງົບສຸກ.
ບັນຫາພົ້ນເດັ່ນທີ່ຍົກເປັນຫົວຂໍ້ບູລິມະສິດໃນການສົນທະນາຮ່ວມກັນຄື: ການເສີມສ້າງຄວາມເຂັ້ມແຂງດ້ານ ການຮ່ວມມືກັບບັນດາຄູ່ຮ່ວມຫຼາຍຝ່າຍ ທີ່ແນໃສ່ການເຮັດວຽກຮ່ວມກັນເພື່ອຈັດການກັບໄພຄຸກຄາມທາງໄຊເບີ ລວມເຖິງບັນຫາທີ່ຕິດພັນ ເປັນຕົ້ນ ການແລກປ່ຽນທັດສະນະ ແລະ ມຸມມອງດ້ານຄວາມປອດໄພທາງໄຊເບີໃນຍຸກປັດຈຸບັນ ປຶກສາຫາລືກ່ຽວກັບການນໍາໃຊ້ ICTs ໃຫ້ມີຄວາມປອດໄພ ທີ່ລວມເຖິງການພັດທະນາບັນດາລະບຽບການນະໂຍບາຍ ແລະ ບັນທັດຖານໃນການຄຸ້ມຄອງໃຫ້ມີຄວາມເຂັ້ມແຂງ ແລະ ອັບເດດຂໍ້ມູນຂ່າວສານກ່ຽວກັບການຈັດຕັ້ງປະຕິບັດບັນດາກິດຈະກຳທີ່ເຮັດຮ່ວມກັນຂອງບັນດາປະເທດສະມາຊິກອາຊຽນ ໂດຍສະເພາະ ການເຂົ້າຮ່ວມໂຄງການເຝິກອົບຮົມ ASCCE ແລະ AJCCBC ທີ່ແນໃສ່ສົ່ງເສີມການສ້າງຂີດຄວາມສາມາດໃນການປ້ອງກັນການໂຈມຕີທາງໄຊເບີ ແລກປ່ຽນຂໍ້ມູນຂ່າວສານດ້ານວິຊາການ ຊອກຫາແນວທາງໃນການແກ້ໄຂບັນຫາຮວ່ມກັນ ປ້ອງກັນ ແລະ ຮັບມືກັບໄພຄຸກຄາມທາງໄຊເບີ ທີ່ອາດຈະເກີດຂຶ້ນທັງໃນປັດຈຸບັນ ແລະ ໃນຕໍ່ໜ້າ ນອກນີ້ທີ່ປະຊຸມຍັງໄດ້ໂອ້ລົມ ແລະ ລາຍງານຄວາມຄືບໜ້າຂອງການຈັດຕັ້ງປະຕິບັດວຽກໃນໄລຍະຜ່ານມາໃຫ້ທີ່ປະຊຸມຮັບຊາບ ເພື່ອລາຍງານຕໍ່ໃນກອງປະຊຸມຂັ້ນ ADGMIN ທີ່ຈະຈັດຂຶ້ນເປັນປະຈຳໃນທຸກໆປີ.
# ຂ່າວ – ພາບ : ຂັນທະວີ
