ວັນທີ 5 ຕຸລາ 2022 ນີ້ ຢູ່ສະໂມສອນໃຫ່ຍຂອງເມືອງງອຍ ຫ້ອງການພາຍໃນເມືອງ ແຂວງຫຼວງພະບາງ ໄດ້ຈັດກອງປະຊຸມຝຶກອົບຮົມກ່ຽວກັບການໂຄສະນາເຜີຍແຜ່ກົດໝາຍວ່າດ້ວຍທະບຽນຄອບຄົວສະບັບປັບປຸງປີ 2018 ໃຫ້ແກ່ອົງການປົກຄອງບ້ານ 34 ບ້ານ ໂດຍການເປັນປະທານຂອງທ່ານ ນາງ ແສງທອງ ຜາລີວັນ ຮອງເຈົ້າເມືອງ-ເມືອງງອຍ,ມີແຂກຮັບເຊີນຈາກຂະແໜງການທີ່ກ່ຽວຂ້ອງ ແລະນາຍບ້ານ 34 ບ້ານເຂົ້າຮ່ວມທັງໝົດ 46 ທ່ານ,ຍິງ 6 ທ່ານ.
ທ່ານ ທອງສຸກ ຈັນທຸມມາ ຫົວໜ້າຫ້ອງການພາຍໃນເມືອງງອຍ ໄດ້ຂື້ນເຜີຍແຜ່ເອກະສານ ກ່ຽວກັບທະບຽນຄອບຄົວສະບັບປັບປຸງປີ 2018 ,ຄຳແນະນຳກ່ຽວກັບການຈັດຕັ້ງປະຕິບັດກົດໝາຍທະບຽນຄອບຄົວສະບັບປັບປຸງເລກທີ 03 ,ຄຳແນະນຳກ່ຽວກັບການເກັບກຳສະຖິຕິການນຳໃຊ້ແບບຟອມ ວຽກງານຄຸ້ມຄອງພົນລະເມືອງ ແລະ ຄວາມສຳຄັນກ່ຽວກັບການຈົດທະບຽນສະຖິຕິພົນລະເມືອງ ໃຫ້ຖືກຕ້ອງຕາມແບບຟອມທີ່ກຳນົົດໄວ້.
ຈາກນັ້ນ ຜູ້ເຂົ້າຮ່ວມກໍ່ໄດ້ຂື້ນປະກອບຄຳຄິດ-ຄຳເຫັນຕໍ່ເອກະສານດັ່ງກ່າວ ເພື່ອເຮັດໃຫ້ການເກັບກຳສະຖິຕິຈົດທະບຽນຄອບຄົວມີຄວາມຖືກຕ້ອງ,ລະອຽດ ແລະສະດວກສະບາຍຂຶ້ນ.
ໂອກາດດັ່ງກ່າວນີ້ທ່ານ ນາງ ແສງທອງ ຜາລີວັນ ຮອງເຈົ້າເມືອງງອຍ ໄດ້ສະແດງຄຳຍ້ອງຍໍຊົມເຊີຍທີ່ບັນດານາຍບ້ານໄດ້ຕັດສິນໃຈເຂົ້າຮ່ວມຮັບຟັງ ການເຜີຍແຜ່ກົດໝາຍສະບັບປັບປຸງ ປີ 2018ໃນຄັ້ງນີ້ ແລະໄດ້ເນັ້ນໜັກຄວາມໝາຍຄວາມສຳຄັນຂອງວຽກງານການຈົດທະບຽນຄອບຄົວພາຍໃນບ້ານຂອງຕົນໃຫ້ຖືກຕ້ອງຄົບຖ້ວນຕາມແບບຟອມແຕ່ລະຂັ້ນຕອນ ເພື່ອໃຫ້ມີປະສິທິພາບ ແລະ ປະສິດທີຜົນສູງສຸດ.
ຂ່າວ-ພາບ ນາງ ນ້ອຍ ທອງສະຫວັດ ຫ້ອງການ ຖວທ ເມືອງງອຍ
