ອາດຈະມີການລ້າງບາງ ເມື່ອ The Telegraph ລາຍງານວ່າ ເຈົ້າຂອງທີມ ນອດຕິງແຮມ ຟໍເຣສ ພິຈາລະນາປົດຝ່າຍເສີມທັບຂອງສະໂມສອນ ຫຼັງໃຊ້ເງິນສູງເຖິງ 150 ລ້ານປອນ ແລະ ເສີມທັບ 22 ຄົນເມື່ອລະດູຮ້ອນ. ທ່ານ ເອວານເຈລອສ ມາຣິນາຄິສ ເຈົ້າຂອງສະໂມສອນ ຟໍເຣສ ກຽມຈະດໍາເນີນການປັບປ່ຽນຝ່າຍບໍລິຫານຂອງສະໂມສອນ ຫຼັງຈາກເລີ່ມຕົ້ນລະດູການໄດ້ໜ້າຜິດຫວັງ ດ້ວຍການປົດຄົນອອກຈາກຕໍາແໜ່ງສໍາຄັນ ຜູ້ຢູ່ເບື້ອງຫຼັງການເສີມທັບເມື່ອລະດູຮ້ອນທີ່ຜ່ານມາ
ສະຕີຟ ຄູເປີ ຜູ້ຈັດການຂອງທີມ ຍັງຕ້ອງລຸ້ນກັບອະນາຄົດຂອງຕົວເອງ ຫຼັງຈາກເສຍໄປ 5 ຕິດຕໍ່ກັນໃນ ພຣີເມຍລີກ ແລະ ຈະມີການຕັດສິນໃຈເກີດຂື້ນໃນອີກ 48 ຊົ່ວໂມງຂ້າງໜ້າ.
ທ່ານ ມາຣິນາຄິສ ກໍາລັງພິຈາລະນາຝ່າຍເສີມທັບຂອງສະໂມສອນ ແລະ ແດນ ເມີຟີ່ ຜູ້ບໍລິຫານ ໂດຍຄາດໝາຍວ່າຈະມີການປ່ຽນແປງເກີດຂຶ້ນກ່ອນເຖິງເກມຖັດໄປ ທີ່ຈະພົບກັບ ແອສຕັນ ວິນລ່າ.
ຟໍເຣສ ເສີມທັບຫຼາຍເຖິງ 22 ຄົນ ພາຍຫຼັງເລື່ອນຊັ້ນກັບສູ່ພຣີເມຍລີກສໍາເລັດ ແຕ່ຫຼາຍຄົນກໍຍັງສ້າງຄວາມປະທັບໃຈບໍ່ໄດ້. ເຊື່ອກັນວ່າ ຈອສ ຊີເຣຍນອສ ຫົວໜ້າຝ່າຍການເສີມທັບ ແລະ ແອນດີ ສະກັອດ ຫົວໜ້າແມວມອງ ຕ່າງມີອະນາຄົດທີ່ບໍ່ແນ່ນອນ ເຊິ່ງອາດຈະຕ້ອງອອກຈາກຕໍາແໜ່ງໃນອາທິດນີ້
ຊີເຣຍນອສ ຍ້າຍຈາກ ສະຕູດກາດ ມາຮ່ວມງານກັບ ຟໍເຣສ ກ່ອນເລີ່ມຕົ້ນລະດູການທີ່ຜ່ານມາ ໃນຂະນະທີ່ ສະກັອດ ກໍຖືກແຕ່ງຕັ້ງເຂົ້າມາຮັບຕໍາແໜ່ງໃນເດືອນມັງກອນ ຈາກທີ່ເຄີຍເຮັດວຽກກັບ ວັດຟອດ, ເບຣນຟອດ ແລະ ສະວອນຊີ ຊີຕີ.
ເມີຟີ່ ຖືກດຶງມາຈາກ ບານສະລີ່ ໃນປີກ່ອນ ແລະ ອາດຈະຖືກແທນທີ່ໂດຍ ລີ ຊານລີ່ ອະດີດຜູ້ອໍານວຍການຂອງ ນິວຄາສເຊິນ ທີ່ປັດຈຸບັນ ຮັບຕໍາແໜ່ງເປັນທີ່ປຶກສາຂອງ ຟໍເຣສ.
ມາຣິນາຕິສ ຄວັກເງິນໃຫ້ກັບການເສີມທັບຂອງ ຄູເປີ ໄປຫຼາຍ ແຕ່ເລິກໆແລ້ວ ກໍບໍ່ພໍໃຈກັບຜົນກະທົບອັນເລັກນ້ອຍຈາກເຫຼົ່ານັກເຕະທີ່ຍ້າຍເຂົ້າມາໃໝ່.
ມໍແກນ ກິບ-ໄວ ນັກເຕະທີ່ຍ້າຍຮ່ວມ ຟໍເຣສ ດ້ວຍຄ່າຕົວ 25 ລ້ານປອນ ແພງທີ່ສຸດຂອງສະໂມສອນນັ້ນ ເປັນໜຶ່ງໃນນັກເຕະທີ່ເຮັດໄດ້ດີໃນລະດູການອັນຍາກລໍາບາກ.
ສ່ວນນັກເຕະຄ່າຕົວແພງຄົນອື່ນໆຂອງພວກເຂົາ ຍັງມີທັງ ໄທໂວ ອາໂວນີນີ ທີ່ຍ້າຍມາຈາກ ອູນີໂອນ ເບີລິນ ດ້ວຍເງິນ 17,5 ລ້ານປອນ, ເນໂກ ວິນລຽມ ຈາກ ລິເວີພູລ 17 ລ້ານປອນ ແລະ ເອັມມານູເອລ ເດັນນິສ ຈາກ ວັດຟອດ 15 ລ້ານປອນ.
