ຂ່າວຕ່າງປະເທດລາຍງານ ເມື່ອວັນທີ 3 ຕຸລາທີ່ຜ່ານມານີ້, ສຳນັກງານສະຖິຕິແຫ່ງຊາດຂອງອິນໂດເນເຊຍ ໄດ້ເປີດເຜີຍບົດລາຍງານອັດຕາເງິນເຟີ້ ປະຈຳເດືອນກັນຍາທີ່ຜ່ານມາເພີ່ມຂຶ້ນ 5,95% ເມື່ອທຽບແບບປີຕໍ່ປີ ເປັນສະຖິຕິສູງທີ່ສຸດນັບຕັ້ງແຕ່ເດືອນຕຸລາ 2015 ແລະ ສູງຂຶ້ນຈາກສະຖິຕິເມື່ອເດືອນສິງຫາທີ່ຜ່ານມາ ຊຶ່ງເພີ່ມຂຶ້ນ 4,69% ເມື່ອທຽບແບບປີຕໍ່ປີ ໂດຍສະຖິຕິຂອງທັງສອງເດືອນຍັງຄົງເກີນເປົ້າໝາຍຂອງທະນາຄານກາງ ຊຶ່ງກຳນົດໄວ້ທີ່ລະຫວ່າງ 2%-4% ໃນປີນີ້.
ທັງນີ້, ລັດຖະບານອິນໂດເນເຊຍ ໄດ້ປັບຂຶ້ນລາຄາເຊື້ອໄຟປະມານ 30% ຊຶ່ງມີຜົນຕັ້ງແຕ່ເດືອນກັນຍາທີ່ຜ່ານມາ ຫຼັງຈາກປະເຊີນກັບແຮງກົດດັນຢ່າງໜັກທາງດ້ານການເງິນ ຈາກການໃຊ້ງົບປະມານມະຫາສານໄປກັບນະໂຍບາຍສະໜັບສະໜູນເຊື້ອໄຟຈົນສ້າງແຮງກົດດັນໃຫ້ກັບສະຖານະການທາງດ້ານການເງິນຂອງປະເທດ ຊຶ່ງມີຂະໜາດເສດຖະກິດໃຫຍ່ທີ່ສຸດໃນອາຊຽນ. ຂະນະທີ່ທະນາຄານກາງອິນໂດເນເຊຍໄດ້ມີມະຕິເຫັນດີເມື່ອເດືອນກັນຍາທີ່ຜ່ານມາປັບຂຶ້ນອັດຕາດອກເບ້ຍຊື້ຄືນພັນທະບັດທີ່ມີສັນຍາຂາຍຄືນໄລຍະເວລາ 7 ວັນ ເປັນ 4,25% ເພີ່ມຂຶ້ນ 0,5% ໂດຍສູງກວ່າທີ່ບັນດານັກວິເຄາະໄດ້ຄາດຄະເນໄວ້ກ່ອນໜ້ານີ້ວ່າ ຈະປັບເພີ່ມພຽງ 0,25%. ອີກຢ່າງໜຶ່ງ, ທະນາຄານກາງອິນໂດເນເຊຍເຄີຍປະເມີນສະຖານະການເງິນເຟີ້ຂອງປະເທດວ່າ ຈະຢູ່ທີ່ລະດັບສູງກວ່າ 6% ພາຍໃນທ້າຍປີນີ້.
