ວິທະຍຸກະຈາຍສຽງຫວຽດນາມລາຍງານວ່າ: ວັນທີ 3 ຕຸລາ ຜ່ານມາ ທີ່ ຮ່າໂນ້ຍ, ກອງປະຊຸມຄັ້ງທີ 6 ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ XIII ໄດ້ເປີດຂຶ້ນຢ່າງເປັນທາງການໂດຍພາຍໃຕ້ການເປັນປະທານຂອງ ທ່ານ ຫງວຽນຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ.
ຂ່າວລະບຸວ່າ: ກອງປະຊຸມຄັ້ງນີ້, ຈະປະກອບຄຳເຫັນກ່ຽວກັບບັນດາບົດລາຍງານ, ແຜນຮ່າງທີ່ກ່ຽວຂ້ອງເຖິງບາງບັນຫາໃຫຍ່, ເປັນພື້ນຖານ ແລະ ສຳຄັນ ຄື: ສະພາບການເສດຖະກິດ – ສັງຄົມ, ງົບປະມານແຫ່ງລັດປີ 2022, ແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດປີ 2023 ແລະ ແຜນການການເງິນ – ງົບປະມານແຫ່ງລັດໄລຍະ 3 ປີ 2023-2025. ກຳນົດທິດແຜນຜັງສັງລວມແຫ່ງຊາດໄລຍະ 2021 – 2030, ວິໄສທັດຮອດປີ 2050. ສືບຕໍ່ຊຸກຍູ້ການຫັນເປັນອຸດສາຫະກຳ, ທັນສະໄໝຮອດປີ 2030, ວິໄສທັດຮອດປີ 2045. ສືບກໍ່ສ້າງລັດແຫ່ງກົດໝາຍສັງຄົມນິຍົມ ຫວຽດນາມ ໃຫ້ສົມບູນແບບໃນໄລຍະໃໝ່ ແລະ ບາງບັນຫາສຳຄັນອື່ນໆ.
ທ່ານ ຫງວຽນຝູຈ້ອງ ກ່າວຄຳເຫັນທີ່ກອງປະຊຸມ ວ່າ: ກອງປະຊຸມມີຄວາມໝາຍສຳຄັນພິເສດເພື່ອປະຕິບັດສຳເລັດໂດຍພື້ນຖານການຜັນຂະຫຍາຍໂຄງການເຊື່ອມຊຶມ, ປະຕິບັດບັນດາເນື້ອໃນ, ບັນຫາ ໃຫຍ່, ເປັນແກ່ນສານຂອງມະຕິກອງປະຊຸມໃຫຍ່ ຄັ້ງທີ XIII ຂອງພັກ; ສະເໜີໃຫ້ສູນກາງເສີມຂະຫາຍຈິດໃຈຄວາມຮັບຜິດຊອບຢ່າງສູງ, ມີປະຊາທິປະໄຕຢ່າງແທດຈິງ ແລະ ປ່ຽນແປງໃໝ່, ສຸມໃສ່ຄົ້ນຄວ້າ, ປຶກສາຫາລື, ປະກອບຫຼາຍຄຳເຫັນມີຄຸນນະພາບ, ເລິກເຊິ່ງ ເພື່ອສ້າງບົດລາຍງານ, ແຜນຮ່າງໃຫ້ສົມບູນແບບ ແລະ ພິຈາລະນາ, ຕົກລົງໃນຕອນທ້າຍກອງປະຊຸມ.
ກ່ຽວກັບການສືບຕໍ່ສ້າງລັດແຫ່ງກົດໝາຍສັງຄົມນິຍົມ ຫວຽດນາມ ໃນໄລຍະໃໝ່ໃຫ້ສົມບູນແບບ, ທ່ານ ຫງວຽນຝູຈ້ອງ ສະເໜີວ່າ: ຕ້ອງຕິດພັນກັບໂຄງການການເມືອງຂອງພັກ, ລັດຖະທຳມະນູນຂອງ ລັດ, ມະຕິກອງປະຊຸມໃຫຍ່ ຄັ້ງທີ XIII ຂອງພັກ ແລະ ສະພາບຕົວຈິງຂອງປະເທດຊາດ, ສຸມໃສ່ປຶກສາຫາລື, ສ້າງຄວາມເຫັນດີເຫັນພ້ອມເປັນຢ່າງສູງໃນທົ່ວພັກ, ທົ່ວປວງຊົນກ່ຽວກັບທັດສະນະ, ແນວຄິດຊີ້ນຳ, ເປົ້າໝາຍ, ບັນດາໜ້າທີ່, ມາດຕະການໃຫຍ່ຕ້ອງໄດ້ຮັບການເຊື່ອມຊຶມ ແລະ ຜັນຂະຫຍາຍປະຕິບັດ ເພື່ອສ້າງການຫັນປ່ຽນຢ່າງແຂງແຮງໃນການສ້າງລັດແຫ່ງກົດໝາຍສັງຄົມນິຍົມ ຫວຽດນາມ ໂດຍພັກກອມມູນິດນຳພາໃຫ້ສົມບູນແບບ. ຊຸກຍູ້ການປະຕິຮູບບໍລິຫານ, ຕຸລາການ; ສ້າງຖັນແຖວພະນັກງານ, ບຸກຄະລາກອນ, ລັດຖະກອນໃຫ້ກະທັດຮັດ, ສັດຊື່ບໍລິສຸດ; ປະຕິບັດການປ້ອງກັນ, ຕ້ານການສໍ້ຫຼາດບັງຫຼວງ, ສິ່ງຫຍໍ້ທໍ້ຢ່າງມີປະສິດທິຜົນ.
