ໂຄງການກໍ່ສ້າງເຂື່ອນຕາມລຳນ້ຳອູ ແບບຂັ້ນໄດ ປະກອບມີ 7 ເຂື່ອນ, ມີກຳລັງຕິດຕັ້ງທັງໝົດ 1.272 ເມກາວັດ ຊຶ່ງທັງ 7 ເຂື່ອນໄດ້ສຳເລັດການກໍ່ສ້າງ ແລະ ຜະລິດກະແສໄຟຟ້າສະໜອງໃຫ້ແກ່ລັດວິສາຫະກິດໄຟຟ້າລາວ.
ທ່ານ ສົ້ງ ຫຸ້ຍຫົງ (Song Huihong) ຜູ້ອຳນວຍການໃຫຍ່ໂຄງການເຂື່ອນໄຟຟ້ານ້ຳອູ ຂອງບໍລິສັດ Power China ເປີດເຜີຍຕໍ່ສື່ມວນຊົນເມື່ອບໍ່ດົນມານີ້ວ່າ: ເຂື່ອນໄຟຟ້ານໍ້າຕົກແບບຂັ້ນໄດ ຕາມລໍານໍ້າອູ ທີ່ກຸ່ມບໍລິສັດ Power China ໄດ້ລົງທຶນພັດທະນາ ຕັ້ງຢູ່ແຂວງຫຼວງພະບາງ ແລະ ແຂວງຜົ້ງສາລີ ເປັນການລົງທຶນດ້ວຍຮູບແບບ ບໍລິສັດລົງທຶນກ່ອນ ຫຼື BOT, ແມ່ນໂຄງການສໍາຄັນທີ່ເຊັນສັນຍາ ໂດຍພາຍໃຕ້ການເປັນສັກຂີພິຍານຂອງການນໍາ ລາວ-ຈີນ, ເປັນ “ແຫຼ່ງຜະລິດໄຟຟ້າຫຼັກ” ຂອງພາກກາງ ແລະ ພາກເໜືອຂອງລາວ, ໂຄງການດັ່ງກ່າວປະກອບມີ 7 ເຂື່ອນ ແບບຂັ້ນໄດ ມີກໍາລັງຕິດຕັ້ງໄຟຟ້າລວມທັງໝົດ 1.272 ເມກາວັດ, ເຂື່ອນທັງໝົດໄດ້ສໍາເລັດການກໍ່ສ້າງ ແລະ ເປີດການຜະລິດໃນທ້າຍເດືອນກັນຍາ 2021 ໄດ້ກາຍເປັນປະຕູສໍາຄັນ ໃນການຮ່ວມມືຂອງໂຄງການພະລັງງານຂະໜາດໃຫຍ່ ແລະ ເຕັກໂນໂລຊີພະລັງງານໄຟຟ້ານໍ້າຕົກໃນພາກເໜືອ ສປປ ລາວ. ກວມລວມເຂື່ອນໄຟຟານໍ້າງື່ມ 5 ໄດ້ສ້າງຮູບແບບຄຸ້ມຄອງການຜະລິດ ແລະ ການດໍາເນີນງານ ເຂື່ອນໄຟຟ້າແບບ “8 ເຂື່ອນ 1 ສູນບັນຊາ” ໃນລາວ.
ມາຮອດປັດຈຸບັນ, ເຂື່ອນໄຟຟ້ານໍ້າອູທັງ 7 ເຂື່ອນ ໄດ້ຜະລິດພະລັງງານເຖິງ 11 ຕື້ ກິໂລວັດໂມງ ຊຶ່ງໄດ້ຮັບປະກັນການສະໜອງໄຟຟ້າ 12% ຂຶ້ນໄປຂອງທົ່ວປະເທດລາວ ສ່ວນໃນລະດູແລ້ງສາມາດກວມເອົາເຖິງ 30% ໃນການສະໜອງໄຟຟ້າທົ່ວປະເທດລາວ. ນັບແຕ່ໂຄງການກໍ່ສ້າງສຳເລັດເປັນຕົ້ນມາ ສາມາດສະໜອງຕໍາແໜ່ງງານກວ່າ 10.000 ຕໍາແໜ່ງໃຫ້ປະຊາຊົນ, ກໍ່ສ້າງບ້ານຈັດສັນ ໃໝ່ກວ່າ 30 ບ້ານ, ຍົກຍ້າຍປະຊາຊົນອອກຈາກເຂດອ່າງເກັບນໍ້າ ປະມານ 10.000 ກວ່າຄົນ ໄປຢູ່ບ້ານຈັດສັນໃໝ່, ໄດ້ກໍ່ສ້າງໂຮງຮຽນ, ວັດ, ສຸກສາລາ, ລະບົບນໍ້າປະປາ, ລະບົບໄຟຟ້າ, ເສັ້ນທາງ ແລະ ສິ່ງອໍານວຍຄວາມສະດວກອື່ນໆ, ໄດ້ກໍ່ສ້າງຂົວ 20 ກວ່າແຫ່ງ, ກໍ່ສ້າງເສັ້ນທາງ 500 ກວ່າກິໂລແມັດ, ໄດ້ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນຫຼາຍດ້ານ, ປັດຈຸບັນ ກໍາລັງດໍາເນີນໂຄງການພັດທະນາອາຊີບຂອງປະຊາຊົນ ເພື່ອສ້າງລາຍຮັບໃຫ້ແກ່ປະຊາຊົນ.
ທ່ານ ສົ້ງ ຫຸ້ຍຫົງ ຍັງໃຫ້ຮູ້ອີກວ່າ: ບັນດາເຂື່ອນໄຟຟ້ານໍ້າອູ ຈະເສີມຂະຫຍາຍບົດບາດການເປັນພື້ນຖານທີ່ສໍາຄັນ ແກ່ຂະແໜງໄຟຟ້າຂອງລາວ, ນອກຈາກສາມາດດຸນດ່ຽງໄຟຟ້າໃນລະບົບ ແລະ ປັບປຸງບໍລິມາດນໍ້າໃນອ່າງແກ່ບັນດາເຂື່ອນໃນພາກພື້ນ ຮັບປະກັນສະຖຽນລະພາບ ແລະ ຄວາມໝັ້ນຄົງ ຂອງລະບົບຕາຂ່າຍໄຟຟ້າໃນລາວ, ສະໜອງພະລັງງານສະອາດ ແກ່ພາກພື້ນຢ່າງຕໍ່ເນື່ອງແລ້ວ, ຍັງສາມາດຂະຫຍາຍບົດບາດສໍາຄັນ ໃນການຄຸ້ມຄອງຊັບພະຍາກອນນໍ້າ, ການຮ່ວມມືດ້ານຂໍ້ມູນອຸຕຸນິຍົມ ແລະ ອຸທົກກະສາດ, ການສ້າງຖານຝຶກອົບຮົມເຕັກນິກພະລັງງານໄຟຟ້ານໍ້າຕົກ, ຊຸກຍູ້ໂຄງການຮ່ວມມືແມ່ນ້ຳຂອງ-ແມ່ນໍ້າລ້ານຊ້າງ, ສົ່ງເສີມກິດຈະກໍາສາທາລະນະປະໂຫຍດ ແລະ ພັດທະນາຊີວິດການເປັນຢູ່ຂອງປະຊາຊົນ ໃນຊຸມຊົນໃຫ້ດີຂຶ້ນ, ສະໜອງພະລັງງານທີ່ໝັ້ນຄົງ ແລະ ປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມ ຂອງ ສປປ ລາວ.
ທ່ານກ່າວອີກວ່າ: ເຂື່ອນໄຟຟ້ານໍ້າອູ 7 ຈັດເປັນໂຄງການຂະໜາດໃຫຍ່ປະເພດ 1, ເປັນເຂື່ອນຫີນແຂງອັດແໜ້ນເບຕົງເສີມເຫຼັກ ມີລວງສູງ 143,5 ແມັດ, ປະກອບດ້ວຍເຄື່ອງຈັກ 105 ເມກາວັດ 2 ໜ່ວຍ, ລະດັບນໍ້າປົກກະຕິ 635 ແມັດ (ເໜືອລະດັບນ້ຳທະເລ), ບໍລິມາດນໍ້າໃນອ່າງທັງໝົດເກີນ 1.700 ລ້ານແມັດກ້ອນ, ສາມາດປັບບໍລິມາດນໍ້າໃນອ່າງໄປຕາມປະລິມານນໍ້າໃນແຕ່ລະປີ, ແມ່ນເຂື່ອນທີ່ມີອ່າງເກັບນໍ້າໃຫຍ່ສຸດຢູ່ເທິງສາຍນໍ້າອູ.
ຂ່າວ-ພາບ: ຄ. ຄຳປະສິດ
