ບໍລິສັດ ລາວຟອດຊີຕີ ເປັນຕົວແທນຜູ້ຈັດຈຳໜ່າຍຜະລິດຕະພັນລົດຟອດ ໜຶ່ງດຽວໃນ ສປປ ລາວ ໄດ້ຈັດພິທີແນະນຳລົດລຸ້ນໃໝ່ 2 ລຸ້ນຫຼ້າສຸດ ຄື: ລົດກະບະ ຟອດເຣນເຈີ ວາຍແທັກ (Ford Ranger Wildtrak) ແລະ ລົດຈິບ ຟອດເອຟເວີເຣດທ໌ (Ford Everest Sport) ໃນວັນທີ 30 ກັນຍາ ຜ່ານມາ ທີ່ຫໍປະຊຸມແຫ່ງຊາດ, ພ້ອມທັງຈັດໃຫ້ມີການທົດລອງຂັບໃນວັນທີ 1-2 ຕຸລາ ຜ່ານມາ ແລະ ໄດ້ມີການວາງຈຳໜ່າຍໃນຕະຫຼາດລາວຢ່າງເປັນທາງການແລ້ວ.
ພິທີແນະນຳລົດດັ່ງກ່າວມີ ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະອຸດສາຫະກໍາແຫ່ງຊາດລາວ; ທ່ານ ປີເຕີ ເອັມ ເຮມອນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະຫະລັດອາເມຣິກາ ປະຈຳ ສປປ ລາວ; ທ່ານ ເວັນ ເເມັກອີນທອສ ຜູ້ບໍລິຫານທົ່ວໄປຂອງ ບໍລິສັດ ລາວຟອດຊີຕີ, ມີບັນດາເເຂກຖືກເຊີນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ເວັນ ແມັກອີນທອສ ກ່າວວ່າ: ສຳລັບລົດຟອດລຸ້ນໃໝ່ທັງ 2 ລຸ້ນນີ້, ໄດ້ຮັບການອອກແບບມາໂດຍມີການວິເຄາະວິໄຈ ຈາກການປະກອບຄໍາຄິດຄໍາເຫັນ ຂອງບັນດາລູກຄ້າຟອດໃນທົ່ວໂລກ ລວມທັງໝົດ 180 ປະເທດ ລວມເອົາກຸ່ມທຸລະກິດຂະໜາດນ້ອຍ, ກຸ່ມປະກອບອາຊີບກະສິກໍາ, ກຸ່ມຄອບຄົວທົ່ວໄປ, ກຸ່ມນັກພະຈົນໄພ, ກຸ່ມບໍລິສັດລົດເຊົ່າ ແລະ ອື່ນໆ ຢູ່ທະວີບເອີຣົບ ແລະ ປະ ເທດກໍາປູເຈຍ. ລົດຟອດ 2 ລຸ້ນນີ້, ຜະລິດຂຶ້ນໃໝ່ ນໍາໃຊ້ເຕັກໂນໂລຊີທີ່ທັນສະໄໝ ເຂົ້າໃນການຜະລິດສາມາດເຊື່ອມຕໍ່ກັບອຸປະກອນຕ່າງໆ ເໝາະສົມກັບການຮັບໃຊ້ວຽກງານທຸກໆປະເພດ ຊຶ່ງໄດ້ພັດທະນາຊ່ວງລ່າງ, ເພີ່ມຄວາມກວ້າງຂອງຖານລໍ້ຫຼາຍຂຶ້ນ ເພື່ອປະສິດທິພາບ ແລະ ຄວາມໝັ້ນຄົງຂອງການຂັບຂີ່, ຫ້ອງໂດຍສານກວ້າງຂວາງຫຼູຫຼາ ພ້ອມເຕັກໂນໂລຊີໃໝ່ໆ ເປັນຕົ້ນມີລະບົບຊ່ວຍຈອດອັດສະລິຍະ ທີ່ຈະເຮັດໃຫ້ການຈອດລົດສະດວກ ແລະ ງ່າຍຂຶ້ນ, ມີລະບົບເບກອັດຕະໂນມັດ ຂະນະຖອຍຫຼັງ ເມື່ອມີສິ່ງກີດຂວາງ ແລະ ມີລະບົບຄວບຄຸມລົດ ໃຫ້ຢູ່ລະຫວ່າງກາງເລນ ເພື່ອຊ່ວຍໃຫ້ລົດ ບໍ່ອອກຈາກນອກເລນ ໃນຂະນະຂັບຂີ່ເທິງຖະໜົນ.
ທ່ານ ເວັນ ເເມັກອີນທອສ ຍັງໄດ້ສະແດງຄວາມເຊື່ອໝັ້ນວ່າ: ລົດ 2 ລຸ້ນນີ້, ຈະສາມາດຍົກລະດັບໃຫ້ຟອດເຣນເຈີ ກາຍເປັນຕະຫຼາດລົດໃຫຍ່ ອັນດັບຕົ້ນໆຂອງລາວ ເພາະມີຄວາມແຂງແກ່ນທົນທານ, ໃນຂະນະດຽວກນກໍມີສູນບໍລິການຫຼັງການຂາຍ ທັງ 4 ສາຂາໃນທົ່ວປະເທດຄື: ນະຄອນຫຼວງວຽງຈັນ, ນະຄອນຫຼວງພະບາງ, ນະຄອນໄກສອນ ພົມວິຫານ ແລະ ນະຄອນປາກເຊ ທີ່ຄອຍບໍລິການທີ່ໜ້າປະທັບໃຈ ພ້ອມໃຫ້ຄຳແນະນຳກ່ຽວກັບສິ່ງໃໝ່ໆໃນລົດ 2 ລຸ້ນນີ້.
ນອກນີ້, ໃນງານຍັງໄດ້ນຳສະເໜີລົດຟອດເຣນເຈີ ເອັກແອວທີ (Ford Ranger XLT 6AT ແລະ 10AT) ແລະ ລົດຟອດເຣນເຈີ ເອັກແອວ (Ford Ranger XL 6MT) ອີກດ້ວຍ.
(ຂ່າວ-ພາບ: ສຸກສະຫວັນ)
