ໃນລະດູຮ້ອນໜ້າ ຄ່າຕົວຂອງ ຈູດ ເບວລິງແຮມ ຈະຖືກລົງຈາກເດີມ ແລະ ຊັກຊວນໃຫ້ 4 ສະໂມສອນຈາກ ພຣີເມຍລີກ ໂດດເຂົ້າໄປແຍ່ງຊີງເຊິ່ງກັນ ແລະ ກັນໃນຕະຫຼາດຊື້ຂາຍ.
ວັນອາທິດ ທີ 25 ກັນຍາ 2022 “ ຊັນ ສະປອດ” ສື່ກິລາທີ່ມີຊື່ສຽງຂອງອັງກິດ ລາຍງານວ່າ ແມນເຊັສເຕີ ຊິຕີ, ລິເວີພູລ, ແມນເຊັສເຕີ ຢູໄນເຕັດ ແລະ ເຊວຊີ 4 ສະໂມສອນດັງຂອງ ພຣີເມຍລີກ ອັງກິດ ຄື 4 ສະໂມສອນຕົວເກງທີ່ກຽມທຸ່ມເທເງິນຈໍານວນມະຫາສານ ເພື່ອປິດຂໍ້ຕົກລົງຄວ້າ ຈູດ ເບວລິງແຮມ ກອງກາງທີມຊາດອັງກິດ ຂອງ ໂບຣຸສເຊຍ ດອດມຸນ ມາຮ່ວມທີມໃນໄລຍະຫຼັງຈົບລະດູການ 2022-23 ນີ້.
ໂດຍມີລາຍງານຂ່າວວ່າ ຫຼັງຈາກຈົບລະດູການນີ້ ຄ່າຕົວຂອງ ເບວລິງແຮມ ຈາກເດີມທີ່ຖືກຕັ້ງໄວ້ບໍ່ຕໍ່າກວ່າ 130 ລ້ານປອນ ຈະເຫຼືອພຽງແຕ່ 83 ລ້ານປອນ ແລະ ເປັນການເປີດທາງໃຫ້ຫຼາຍສະໂມສອນຍື່ນຂໍ້ສະເໜີເຈລະຈາເພື່ອຄວ້າຕົວນັກເຕະຄົນນີ້ໄປຮ່ວມທີມໄດ້ ເຊິ່ງນອກຈາກ 4 ສະໂມສອນນີ້ແລ້ວນັ້ນ ຍັງມີ ຣີວ ມາດຣິດ ທີມຈາກ ລາລີກາ ແອັດສະປາຍ ທີ່ໃຫ້ຄວາມສົນໃຈນັກເຕະຄົນນີ້ເຊັ່ນດຽວກັນ.
ສຳລັບ ຈູດ ເບວລິງແຮມ ໃນອາຍຸ 19 ປີ ຢູ່ກັບ ດອດມຸນ ມານານ 2 ປີແລ້ວ ແລະ ຍັງມີສັນຍາຍາວເຖິງປີ 2025 ປັດຈຸບັນໃນລະດູການນີ້ ລົງຫຼິ້ນໄປແລ້ວ 10 ເກມ 900 ນາທີເຕັມ ຍິງໄປ 3 ປະຕູໃນລະດູການນີ້ ແລະ ພາທີມເປັນອັນດັບ 2 ຂອງລີກ ມີ 15 ຄະແນນ ຕາມຫຼັງ ຢູນຽນ ເບີລິນ ທີມອັນດັບ 1 ພຽງ 2 ຄະແນນເທົ່ານັ້ນ.
