ຄະນະນຳອົງການກາແດງແຫ່ງຊາດລາວເຂົ້າຮ່ວມກອງປະຊຸມລັດຖະມົນຕີອາຊີ-ປາຊີຟິກ ວ່າ ດ້ວຍການຫຼຸດຜ່ອນຄວາມສ່ຽງໄພພິບັດ ທີ່ ບຣິດເບີນ ປະເທດອົສຕຣາລີ ໃນລະຫວ່າງວັນທີ 19-22 ກັນຍາ ຜ່ານມານີ້, ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ ພ້ອມດ້ວຍ ຄະນະໄດ້ເຂົ້າຮ່ວມກອງປະຊຸມລັດຖະມົນຕີພາກພື້ນອາຊີ-ປາຊີຟິກ ວ່າດ້ວຍ ການຫຼຸດຜ່ອນຄວາມ ສ່ຽງໄພພິບັດ ທີ່ ບຣິດເບີນ ປະເທດອົສຕຣາລີ ພາຍໃຕ້ຫົວຂໍ້: ຈາກວິກິດການໄປ ສູ່ການປັບຕົວ, ການຫັນປ່ຽນອະນາຄົດຂອງພາກພື້ນອາຊີ-ປາຊີຟິກດ້ວຍການຫຼຸດຜ່ອນຄວາມ ສ່ຽງຕໍ່ໄພພິບັດ, ໂດຍ ການເປັນເຈົ້າພາບຂອງລັດຖະບານປະເທດອົສຕຣາລີ ຮ່ວມກັບອົງການ ສະຫະປະຊາຊາດ ເພື່ອຫຼຸດ ຜ່ອນຄວາມສ່ຽງໄພພິບັດ ຊຶ່ງກອງປະຊຸມໄດ້ເນັ້ນເຖິງການເພີ່ມຂຶ້ນຂອງຄວາມຖີ່ ແລະ ຄວາມຮ້າຍ ແຮງຂອງໄພພິບັດໃນປະເພດຕ່າງໆ ລວມທັງການລະບາດຂອງພະຍາດໃນບັນດາປະເທດອາຊີ-ປາຊີຟິກ, ການແລກປ່ຽນບົດຮຽນຊຶ່ງກັນ ແລະ ກັນ ກ່ຽວກັບນະ ວັດຕະກຳໃໝ່, ວິທີການແກ້ໄຂເພື່ອ ຫຼຸດຜ່ອນຄວາມສ່ຽງໄພພິບັດ, ຄວາມກຽມພ້ອມຕອບໂຕ້ ກັບໄພພິບັດ ແລະ ການລະບາດຂອງ ພະຍາດ ຂອງແຕ່ລະພາກສ່ວນລວມທັງພາກລັດ, ເອກະຊົນ, ອົງການຈັດຕັ້ງທາງສັງຄົມ, ຊຸມຊົນ ແລະ ຄູ່ຮ່ວມພັດທະນາສາກົນຕ່າງໆ ເພື່ອເລັ່ງໃສ່ປະຕິບັດແຜນ ງານເຊັນໄດ ກ່ຽວກັບການຫຼຸດ ຜ່ອນຄວາມສ່ຽງໄພພິບັດ 2015-2030. ໃນກອງປະຊຸມມີຄະນະຜູ້ ແທນຕາງໜ້າຈາກບັນດາປະເທດ ຕ່າງໆໃນພາກພື້ນອາຊີ-ປາຊີຟິກ, ອົງການກາແດງ ແລະ ຊີກວົງເດືອນແດງແຫ່ງຊາດ, ອົງການຈັດ ຕັ້ງສາກົນ ແລະ ທາງສັງຄົມປະຈຳພາກພື້ນເຂົ້າຮ່ວມ 3.500 ກວ່າຄົນ ຈາກ 58 ປະເທດ.
ອົງການກາແດງແຫ່ງຊາດລາວ ແມ່ນອົງການຈັດຕັັ້ງທາງສັງຄົມຂອງ ສປປ ລາວ ທີ່ເຄື່ອນ ໄຫວວຽກງານມະນຸດສະທຳຢ່າງກວ້າງຂວາງ ໂດຍສະເພາະແມ່ນການກູ້ໄພສຸກເສີນ-ຊ່ວຍເຫຼືອບັນເທົາ ທຸກເບື້ອງຕົ້ນ ໃນກໍລະນີເກີດມີໄພພິບັດ ຫຼື ການລະບາດຂອງພະຍາດ ໂດຍມີການຮ່ວມມືກັບກາ ແດງປະເທດເພື່ອນມິດ ແລະ ອົງການກາແດງ ແລະ ຊີກວົງເດືອນແດງສາກົນ. ການເຂົ້າ ຮ່ວມກອງປະຊຸມໃນຄັ້ງນີ້ໄດ້ເປັນໂອກາດອັນດີທີ່ໄດ້ຖອດຖອນບົດຮຽນນຳເອົາຄວາມຮູ້ໃໝ່ມາປັບປຸງຍຸດທະສາດກໍຄືແຜນປະຕິບັດງານຂອງຕົນເພື່ອສ້າງຄວາມເຂັ້ມແຂງໃນວຽກງານຫຼຸດຜ່ອນຄວາມສ່ຽງໄພພິ ບັດ ແລະ ກຽມພ້ອມຮັບມືກັບການລະບາດຂອງພະຍາດ ຢູ່ ສປປ ລາວ ຮ່ວມກັບຄະນະ ກຳມະການຄຸ້ມຄອງໄພພິບັດແຫ່ງຊາດກໍຄືຂະແໜງການຕ່າງໆຂອງລາວ.
ຂ່າວ: ອົງການກາແດງແຫ່ງຊາດລາວ
