ກອງປະຊຸມສາກົນ ກ່ຽວກັບ ການປ້ອງກັນ ແລະ ແກ້ໄຂຄວາມຮຸນແຮງຕໍ່ແມ່ຍິງ ໃນບັນດາປະເທດອາຊຽນ ໄດ້ຈັດຂຶ້ນໃນວັນທີ 23 ກັນຍາ 2022 ທີ່ນະຄອນຫຼວງວຽງຈັນ ໂດຍການເປັນປະທານຮ່ວມຂອງທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ(ສສຍລ); ທ່ານ ນາງ ມາຣຽມ ເອຄານ ຜູ້ຕາງໜ້າອົງການສະຫະປະຊາຊາດ ເພື່ອປະຊາກອນ (UNFPA) ປະຈໍາ ສປປ ລາວ; ມີຮອງຜູ້ຕາງໜ້າອົງການຮ່ວມສາກົນ ກອຍກາ ປະຈຳ ສປປ ລາວ; ຮັກສາການເອກອັກຄະລັດຖະທູດ ປະຈໍາສະຫະພາບເອີຣົບ; ພ້ອມດ້ວຍບັນດາຜູ້ຕາງໜ້າ ຄະນະກຳມະການແມ່ຍິງອາຊຽນ (ACW), ຜູ້ຕາງໜ້າຄະນະກຳມາທິການອາຊຽນ ເພື່ອສົ່ງເສີມ ແລະ ປົກປ້ອງສິດທິແມ່ຍິງ ແລະ ເດັກນ້ອຍ (ACWC) ຈາກ 10 ປະເທດສະມາຊິກອາຊຽນ ແລະ ຜູ້ຕາງໜ້າຈາກກອງເລຂາອາຊຽນ ເຂົ້າຮ່ວມ.
ທ່ານ ນາງ ອິນລາວັນ ແກ້ວບຸນພັນ ໄດ້ກ່າວວ່າ: ກອງປະຊຸມສາກົນຄັ້ງນິ້, ພາຍໃຕ້ຫົວຂໍ້ “ການປ້ອງກັນ ແລະ ແກ້ໄຂຄວາມຮຸນແຮງຕໍ່ແມ່ຍິງໃນບັນດາປະເທດອາຊຽນ”; ໃນລະຫວ່າງວັນທີ 20-22 ກັນຍາ 2022, ສູນກາງສະຫະພັນແມ່ຍິງລາວ ໄດ້ຮັບກຽດເປັນປະ ທານ ແລະ ເປັນເຈົ້າພາບຈັດກອງປະຊຸມ ຄະນະກຳມະການແມ່ຍິງອາຊຽນ ຄັ້ງທີ 21, ກອງປະຊຸມຄະ ນະກໍາມະການແມ່ຍິງອາຊຽນ+3 ຄັ້ງທີ 14 ຮ່ວມກັບ ສປ.ຈີນ, ຍີ່ປຸ່ນ ແລະ ສ. ເກົາຫຼີ ແລະ ກອງປະຊຸມປີ່ນອ້ອມຕ່າງໆ ໂດຍໄດ້ຮັບການສະໜັບສະໜູນຂອງບັນດາຄູ່ຮ່ວມພັດທະນາຕ່າງໆ. ສໍາລັບ ສູນກາງສະຫະພັນແມ່ຍິງລາວ ການເປັນເຈົ້າພາບຈັດກອງປະຊຸມດັ່ງກ່າວມານັ້ນ ຖືວ່າເປັນຫົວຂໍ້ໜຶ່ງທີ່ມີຄວາມສໍາຄັນທີ່ສຸດ ຊຶ່ງເປັນວຽກສໍາຄັນທີ່ເຫັນວ່າບັນດາປະເທດ ໃນພາກພື້ນ ແລະ ສາກົນ ໃຫ້ຄວາມສົນໃຈໃນການຊອກຫາວິທີການ ເພື່ອປ້ອງກັນ ແລະ ແກ້ໄຂບັນຫາການໃຊ້ຄວາມຮຸນແຮງດັ່ງກ່າວ ລວມທັງ ສປປ ລາວ. ພ້ອມນີ້ຜູ້ເຂົ້າຮ່ວມຈະຮັບຟັງການນໍາສະເໜີ ຄວາມຮຸນແຮງບົນພື້ນຖານທາງເພດໃນປະເທດອາຊຽນ; ຂອບວຽກຂົງເຂດປະເທດອາຊຽນ; ແຜນຈັດຕັ້ງປະຕິບັດລະດັບພາກພື້ນ ໃນຂົງເຂດປະເທດອາຊຽນຂອງການປະຕິບັດວຽກງານຍຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ພາບລວມ, ຄໍາແນະນໍາ ໃນຂົງເຂດປະເທດອາຊຽນ ນະໂຍບາຍ ແລະ ການປະຕິບັດຕົວຈິງຂອງຄວາມຮຸນແຮງບົນພື້ນຖານທາງເພດ; ຂະບວນການພັດທະນາການປະສານງານ ແລະ ການອ້າງອີງແນວທາງມາດຕະຖານຂັ້ນຕອນການສົ່ງຕໍ່ ແລະ ວຽກງານທີ່ກ່ຽວຂ້ອງອື່ນໆ.
ກອງປະຊຸມຈະເປັນເວທີສໍາຄັນ ໃນການແລກປ່ຽນຂໍ້ມູນຂ່າວສານ, ຄວາມຮູ້, ບົດຮຽນ ແລະ ປະສົບການທີ່ດີ ຂອງບັນດາປະເທດອາຊຽນ ກ່ຽວກັບ ການພັດທະນາ ແລະ ນໍາໃຊ້ມາດຕະຖານຂັ້ນຕອນການດຳເນີນງານ ເພື່ອສະໜອງການໃຫ້ການບໍລິການ, ລວມທັງການປະສານງານ ທີ່ມີຄຸນນະພາບ ໃຫ້ແກ່ຜູ້ຖືກເຄາະຮ້າຍ ຈາກການໃຊ້ຄວາມຮຸນແຮງ ແລະ ປ້ອງກັນການໃຊ້ຄວາມຮຸນແຮງຕໍ່ແມ່ຍິງ, ເພື່ອສ້າງເຄືອຂ່າຍ ກັບບັນດາປະເທດໃກ້ຄຽງ ໂດຍສະເພາະແມ່ນ ບັນດາປະເທດສະມາຊິກອາຊຽນ ແລະ ພ້ອມດຽວກັນນີ້ ຮຽກຮ້ອງມາຍັງອົງການຈັດຕັ້ງສາກົນ, ບັນດາຄູ່ ຮ່ວມພັດທະນາຕ່າງໆ ສືບຕໍ່ໃຫ້ການສະໜັບສະໜູນ, ຊ່ວຍເຫລືອທາງດ້ານທຶນຮອນ ກໍຄື ເຕັກນິກວິຊາການ ໃຫ້ແກ່ວຽກງານດັ່ງກ່າວ ແລະ ສືບຕໍ່ຮ່ວມມືກັນໃນຕໍ່ໜ້ານັບມື້ນັບຫຼາຍຂຶ້ນ ທັງມີປະສິດທິພາບ ແລະ ປະສິດທິຜົນ.
ຂ່າວ-ພາບ: ຍຸພິນທອງ
