ກອງປະຊຸມທາບທາມຄວາມຄິດເຫັນໃສ່ຮ່າງບົດລັດຖະບັນຍັດ ຂອງປະທານປະເທດ ວ່າດ້ວຍເຂດຍຸດທະສາດປ້ອງກັນຊາດ ຈັດຂຶ້ນໃນວັນທີ 21 ກັນຍາ 2022 ນີ້ ໂດຍການເປັນປະທານຂອງສະຫາຍພົນຕີ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ, ຫົວຫນ້າກົມໃຫຍ່ເສນາທິການກອງທັບ, ມີບັນດາສະຫາຍຮອງລັດຖະມົນຕີຈາກບັນດາກະຊວງ, ກົມ, ອົງການທີ່ກ່ຽວຂ້ອງ ເຂົ້າຮ່ວມ.
ໃນກອງປະຊຸມສະຫາຍ ພັນເອກ ສີສົມໃຈ ມະໂນລາ ຮອງຫົວຫນ້າກົມກົດໝາຍກະຊວງປ້ອງກັນປະເທດ ໄດ້ເຜີຍແຜ່ຮ່າງບົດບັນຍັດຂອງ ປະທານປະເທດ ວ່າດ້ວຍເຂດ ຍຸດທະສາດປ້ອງກັນຊາດ ເຊິ່ງປະກອບມີ IX ໝວດ 36 ມາດຕາ ໂດຍໄດ້ກໍານົດເຂດຍຸດທະສາດປ້ອງກັນຊາດ, ເຂດການຄຸ້ມຄອງ, ການນຳໃຊ້, ຂໍ້ຫ້າມ ແລະ ມາດຕະການຕໍ່ຜູ້ທີ່ລະເມີດ ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ປະກອບຄຳຄິດ ເຫັນໃສ່ຮ່າງບົດບັນຍັດດັ່ງກ່າວ ເປັນຕົ້ນແມ່ນບັນດາ ຫຼັກການ, ລະບຽບການ ແລະ ມາດຕະການຕ່າງໆກ່ຽວກັບການຄຸ້ມຄອງ ແລະ ການຕິດຕາມກວດກາເຂດຍຸດທະສາດປ້ອງກັນຊາດ, ຂອບເຂດພື້ນທີ່, ພູມີປະເທດ ແລະ ທໍາມະຊາດ ເພື່ອໃຫ້ໄດ້ຮັບການປົກປັກຮັກສາ, ພັດທະນາ ແລະ ນໍາໃຊ້ໃຫ້ຖືກຕ້ອງ, ສອດຄ່ອງຕາມແຜນຍຸດທະສາດປ້ອງກັນຊາດ, ແນໃສ່ຮັບປະກັນຄວາມໝັ້ນຄົງຂອງຊາດ, ມີສະຖຽນລະພາບທາງດ້ານການເມືອງ, ສ້າງເງື່ອນໄຂໃຫ້ແກ່ການ ພັດທະນາເສດຖະກິດ – ສັງຄົມ ຕິດພັນກັບວຽກງານປ້ອງກັນຊາດ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດ ທະນາປະເທດຊາດໃຫ້ຈະເລີນຮຸ່ງເຮືອງ.
ໂອກາດນີ້, ສະຫາຍ ພົນຕີ ຄຳລຽງ ອຸທະໄກສອນ ໄດ້ກ່າວສະແດງຄວາມຍ້ອງຍໍຊົມ ເຊີຍຕໍ່ບັນດາຜູ້ແທນກອງປະຊຸມ ທີ່ໄດ້ພ້ອມກັນສຸມສະຕິປັນຍາ ເຂົ້າໃນການປະກອບຄໍາຄິດເຫັນໃສ່ເນື້ອໃນຮ່າງບົດບັນຍັດຂອງປະທານປະເທດ ວ່າດ້ວຍເຂດຍຸດທະສາດປ້ອງກັນຊາດ ດ້ວຍຄວາມຮັບຜິດຊອບສູງ ເຮັດໃຫ້ກອງປະຊຸມຄັ້ງນີ້ສໍາເລັດດ້ວຍໝາກຜົນອັນຈົບງາມ.
ຂ່າວ: ລຸນທອງ
