ກອງປະຊຸມຊຸກຍູ້ວຽກງານເຂດແດນເຊື່ອມຕໍ່ ລະຫວ່າງ ກະຊວງພາຍໃນ ແລະ 8 ແຂວງພາກ ເໜືອ ໄດ້ຈັດຂຶ້ນວັນທີ 19-21 ກັນຍານີ້, ທີ່ສະໂມສອນແຂວງຫຼວງນໍ້າທາ ໂດຍການເປັນກຽດເຂົ້າຮ່ວມຂອງທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ, ມີທ່ານເຈົ້າແຂວງ-ຮອງເຈົ້າແຂວງ, ເຈົ້າເມືອງ-ຮອງເຈົ້າເມືອງ ຂອງ 8 ແຂວງ, ບັນດາຫົວໜ້າກົມ-ຮອງກົມ ຈາກກະຊວງພາຍໃນ, ບັນດາຫົວໜ້າ-ຮອງຫົວໜ້າພະແນກພາຍໃນ ແລະ ຄະນະຮັບຜິດຊອບແກ້ໄຂບັນຫາເຂດແດນເຊື່ອມຕໍ່ຂອງແຂວງຫຼວງນໍ້າທາ, ແຂວງບໍ່ແກ້ວ, ແຂວງອຸດົມໄຊ, ແຂວງຜົ້ງສາລີ, ແຂວງຫົວພັນ, ແຂວງຫຼວງພະບາງ, ແຂວງຊຽງຂວາງ, ແຂວງໄຊຍະບູລີ ພ້ອມດ້ວຍວິຊາການຂອງກະຊວງພາຍໃນ ແລະ ພະແນກພາຍໃນແຂວງຫຼວງນໍ້າທາ ເຂົ້າຮ່ວມ.
ທ່ານ ບຸນຈັນ ນິຍະວົງ ຫົວໜ້າກົມການປົກຄອງທ້ອງຖິ່ນ ກະຊວງພາຍໃນ ໄດ້ຂຶ້ນລາຍງານສະພາບການແກ້ໄຂບັນຫາເຂດແດນເຊື່ອມຕໍ່ລະຫວ່າງ 8 ແຂວງພາກເໜືອຕໍ່ກອງປະຊຸມ ຊຶ່ງມີບາງຕອນສໍາຄັນວ່າ: ວຽກງານເຂດແດນເຊື່ອມຕໍ່ລະຫວ່າງ ນະຄອນຫຼວງ ກັບ ແຂວງ ແລະ ແຂວງ ກັບ ແຂວງ ເປັນວຽກໜຶ່ງທີ່ມີຄວາມໝາຍ, ຄວາມສໍາຄັນຢ່າງຍິ່ງ ສໍາລັບການປົກຄອງ, ການພັດທະນາເສດຖະກິດ-ສັງຄົມຢູ່ທ້ອງຖິ່ນ, ຊຶ່ງມີນິຕິກໍາທີ່ເປັນຟື້ນຖານເປັນຂໍ້ສະດວກແກ່ການແກ້ໄຂການກໍານົດເຂດການປົກຄອງ ລະຫວ່າງນະຄອງຫຼວງ ກັບ ແຂວງ, ແຂວງ ກັບ ແຂວງ ແມ່ນເອົາບົດບັນທຶກເຂດແດນເຊື່ອມຕໍ່ປີ 1999 ເປັນນິຕິກໍາທີ່ເປັນບ່ອນອີງຟື້ນຖານສໍາຄັນໃຫ້ການເຄື່ອນໄຫວຄຸ້ມຄອງບໍລິຫານລັດຂອງອົງການປົກຄອງທ້ອງຖິ່ນຂອງແຕ່ລະຂັ້ນທີ່ໄດ້ສືບຕໍ່ກັນມາ ແລະ ເສດຖະກິດ-ສັງຄົມໄດ້ມີການຂະຫຍາຍຕົວ, ປະຊາຊົນນັບມື້ນັບເຕີບໃຫຍ່ຂະຫຍາຍຕົວ ແລະ ຕ້ອງການສ້າງສາພັດທະນາຊິວິດການເປັນຢູ່ຂອງປະຊາຊົນໃຫ້ນັບມື້ນັບດີຂຶ້ນ ຈຶ່ງເຮັດໃຫ້ການຄຸ້ມຄອງ ແລະ ປົກປັກຮັກສາເຂດແດນເຊື່ອມຕໍ່ຂອງແຕ່ລະທ້ອງຖິ່ນມີຄວາມຫຍຸ້ງຍາກລໍາບາກ ແລະ ກາຍເປັນບັນຫາຂອງບັນດາແຂວງທີ່ຕ້ອງຮີບຮ້ອນແກ້ໄຂໃຫ້ສໍາເລັດໂດຍໄວ ເພາະການກໍານົດເຂດແດນເຊື່ອມຕໍ່ ເປັນບ່ອນອີງ ແລະ ເປັນຕົວຊີ້ບອກໃຫ້ຮູ້ເຖິງເຂດແດນທີ່ຄວາມຮັບຜິດຊອບທາງດ້ານຟື້ນຖານຂອງອົງການປົກຄອງແຕ່ລະທ້ອງຖິ່ນ ເປັນຕົ້ນວຽກງານການປົກປັກຮັກສາ ແລະ ນໍາໃຊ້ຊັບພະຍາກອນທໍາມະຊາດ, ສິ່ງແວດລ້ອມ, ການພັດທະນາເສດຖະກິດ-ສັງຄົມ, ການສະ ໜອງການບໍລິການຂອງລັດ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ແກ່ປະຊາຊົນ.
ໃນໂອກາດນີ້ກະຊວງພາຍໃນ ແລະ 8 ແຂວງພາກເໜືອຍັງໄດ້ລົງນາມໃນສອງເອກະສານສໍາຄັນຮ່ວມກັນຄື: ບົດບັນທຶກການກໍານົດເຂດແດນເຊື່ອມຕໍ່ ແລະ ແຜນທີ່ເສັ້ນເຂດແດນເຊື່ອມຕໍ່ (ແຜນທີພູມສັນຖານມາດຕາສ່ວນ 1:100.000) ລວມມີເສັ້ນເຂດແດນເຊື່ອມຕໍ່ຈໍານວນ 10 ເສັ້ນທີ່ໄດ້ຜ່ານຂະບວນການຄົ້ນຄວ້າ, ປືກສາຫາລື ແລະ ເປັນເອກະພາບດ້ານວິຊາການຮ່ວມກັນ.
ໃນຕ້ອງທ້າຍກອງປະຊຸມ ທ່ານ ທອງຈັນ ມະນີໄຊ ໄດ້ເນັ້ນໜັກໃຫ້ຄະນະຮັບຜິດຊອບແກ້ໄຂບັນຫາເຂດແດນເຊື່ອມຕໍ່ 8 ແຂວງພາກເໜືອ ແລະ ພາກສ່ວນທີ່ກ່ຽວຂ້ອງ ໃຫ້ເອົາໃຈໃສ່ສູ້ຊົນ ແລະ ຮີບຮ້ອນແກ້ໄຂວຽກງານເຂດແດນເຊື່ອມຕໍ່ໃຫ້ສຳເລັດໂດຍໄວ, ຖ້າເສັ້ນໃດລະຫວ່າງແຂວງຫາກບໍ່ສາມາດແກ້ໄຂໄດ້ ໃຫ້ຮີບຮ້ອນສະເໜີຫາ ກະຊວງພາຍໃນ ເພື່ອເປັນໃຈກາງໃນການແກ້ໄຂໃຫ້ສຳເລັດຕາມຄາດໝາຍທີ່ລັດຖະບານກຳນົດໄວ້. ມອບໝາຍໃຫ້ຄະນະວິຊາການທີ່ກ່ຽວຂ້ອງຫ້ອງການພາຍໃນເມືອງ, ພະແນກພາຍໃນແຂວງ ປະສານສົມທົບກັນໃຫ້ແໜ້ນແຟ້ນຍິ່ງຂຶ້ນ, ເກັບກຳໄດ້ບັນດາຈຸດທີ່ຍັງຄົງຄ້າງ, ກຳໄດ້ເນື້ອໃນຈິດໃຈຂອງປະຊາຊົນ, ກຳນົດວິທີທາງໃນການແກ້ໄຂແລ້ວນໍາສະເໜີຂັ້ນເທິງພິຈາລະນາ ເພື່ອເຮັດແນວໃດ ໃຫ້ເຂດແດນເຊື່ອມຕໍ່ມີຄວາມຊັດເຈນ, ຖືກຕ້ອງຕາມຫຼັກການທາງດ້ານເຕັກນິກ ແລະ ປະຊາຊົນມີຄວາມເຂົ້າອົກເຂົ້າໃຈ.
(ພາບ-ຂ່າວ: ສະຫງວນ ອຽງບົວລາ)
