ພິທີຖະແຫຼງຂ່າວງານຄອນເສີດຮ່ວມພະລັງນໍ້າໃຈສິນລະປິນລາວ ຊ່ວຍພີ່ນ້ອງແຂວງອຸດົມໄຊ ໄດ້ຈັດຂຶ້ນໃນວັນທີ 20 ກັນຍາ 2022 ທີ່ຫໍວັດທະນະທໍາແຫ່ງຊາດດ ໂດຍການ ຖະແຫຼງຂອງ ທ່ານ ບົວເງິນ ຊາພູວົງ ປະທານສະມາຄົມສິນລະປິນແຫ່ງຊາດລາວ ອະດີດຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ(ຖວທ),ມີບັນດາທ່ານສິນລະປິນ, ພ້ອມດ້ວຍຄະນະບໍລິຫານງານສະມາຄົມສິິນລະປິນລາວ ແລະ ສື່ມວນຊົນເຂົ້າຮ່ວມ.
ທ່ານ ບົວເງິນ ຊາພູວົງ ໄດ້ກ່າວວ່າ: ງານຄອນເສີດ ຮ່ວມພະລັງໃຈສິນລະປິນລາວ ເພື່ອເປັນການລະດົມວັດຖຸປັດໃຈ, ເຄື່ອງອຸປະໂພກ, ບໍລິໂພກ ເພື່ອຈະນໍາເອົາໄປຊ່ວຍເຫຼືອປະຊາຊົນແຂວງອຸດົມໄຊ, ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ ໃນວັນທີ 26 ສິງຫາ ຜ່ານມາ; ງານຄອນເສີດດັ່ງກ່າວແແມ່ນຈະໄດ້ຈັດຂຶ້ນຢ່າງເປັນທາງການໃນວັນທີ 23 ກັນຍາ 2022 ທີ່ກອງສິລະປະກອນແຫ່ງຊາດ ຄຸ້ມບ້ານໂພນທັນ ເມືອງສີສັດຕະນາກ, ນະຄອນຫຼວງວຽງຈັນ ໂດຍຈະມີສິນລະປິນລາວຈາກຫຼາຍຄ້າຍເພງ ທັງລູກທົ່ງບ້ານນາ ແລະ ສະຕິງ ຈາກຫຼາຍຄ້າຍເພງເຂົ້າຮ່ວມສະແດງຢ່າງຄັບຄາໜາແໜ້ນ ເພື່ອເປັນການລະດົມຈິດໃຈທຸກຄົນໃນສັງຄົມໃນການປະກອບສ່ວນບໍລິຈາກເປັນວັດຖຸປັດໃຈ, ເຄື່ອງອຸປະໂພກ, ບລິໂພກ ເພື່ອນໍາໄປຊ່ວຍເຫຼືອພີ່ນນ້ອງແຂວງອຸດົມໄຊ.
ງານຄອນເສີດດັ່ງກ່າວແມ່ນຈະເລີ່ມແຕ່ເວລາ 16:00 ໂມງ ຫາ 18:00 ໂມງ ຂອງວັນທີ 23 ກັນຍາ 2022 ທີ່ກອງສິລະປະກອນແຫ່ງຊາດ ດັ່ງນັ້ນຈຶ່ງຂໍເຊີນຊວນທຸກທ່ານເຂົ້າຮ່ວມຊົມການສະແດງຂອງຄະນະສິນລະປິນ ພ້ອມທັງເປັນການມີສ່ວນຮ່ວມໃນການນໍາເອົານໍ້າໃຈຈາກທ່ານ ໄປຮ່ວມບໍລິຈາກໃຫ້ເປັນພະລັງແຫ່ງນໍ້າໃຈຊ່ວຍເຫຼືອຄອບຄົວຜູ້ປະສົບໄພພິບັດນໍ້າຖ້ວມທີ່ແຂວງດັ່ງກ່າວ, ໂດຍບັນດາທ່ານສາມາດເຂົ້າຮ່ວມງານໄດ້ ແລະ ສອບຖາມຂໍ້ມູນເພື່ອບໍລິຈາກໄດ້ທີ່ເບີໂທ 020-55616485; 020-59956994; 020-59998198; 020-23997829 ຫຼືຮ່ວມບໍລິຈາກໄດ້ຕາມບັນຊີ BCEL ບັນຊີເງິນກີບ 010-1213467113; ບັນຊີສະກຸນເງິນບາດໄທ 0101213467588; ບັນຊີສະກຸນເງິນໂດລາ 0101213467337; ຊຶ່ງການບໍລິຈາກຮັບເປັນທາງການແມ່ນເລີ່ມແຕ່ ວັ່ນທີ 20 ຫາ 23 ກັນຍາ 2022 ນີ້.
ຂ່າວ: ຍຸພິນທອງ
