ເມື່ອບໍ່ດົນມານີ້, ທີ່ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງເຊກອງ ໄດ້ຈັດກອງປະຊຸມເຜີຍແຜ່ເຊື່ອມຊຶມເອກະສານ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ເອກະສານ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍການເປັນປະທານຂອງທ່ານ ບູ່ໄຊ ໄຊຍະເສນ ຫົວໜ້າພະແນກ ຖວທ ແຂວງ, ມີຄະນະພັກຮາກຖານ-ຄະນະໜ່ວຍພັກ ແລະ ພະນັກງານ-ລັດຖະກອນເຂົ້າຮ່ວມ.
ທ່ານ ບູ່ໄຊ ໄຊຍະເສນ ໄດ້ມີຄຳເຫັນວ່າ: ການຈັດຕັ້ງເຜີຍແຜ່ເຊື່ອມຊຶມຄັ້ງນີ້, ແມ່ນມີຄວາມໝາຍສໍາຄັນ ແລະ ຈໍາເປັນທີ່ສຸດເພື່ອແນໃສ່ເຮັດໃຫ້ຄະນະພັກຮາກຖານ, ຄະນະໜ່ວຍພັກ ກໍຄື ພະນັກງານ-ສະມາຊິກພັກ ໃຫ້ມີຄວາມຮັບຮູ້, ເຂົ້າໃຈຢ່າງເລິກເຊິງ ແລະ ມີຄວາມເປັນເອກະພາບຕໍ່ຄວາມຈໍາເປັນອັນຮີບດ່ວນໃນການ ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການສະກັດກັ້ນ ແກ້ໄຂບັນຫາຢາເສບຕິດ ຂອງພັກ ແລະ ລັດຖະບານ, ທັງເປັນການສຶກສາອົບຮົມການເມືອງ-ນໍາພາແນວຄິດ, ປຸກລະດົມຊຸກຍູ້ພະນັກງານ-ສະມາຊິກພັກ ພາຍໃນພະແນກ ຖວທ ແຂວງ ໃຫ້ເປັນເຈົ້າການຈັດຕັ້ງປະຕິບັດ ແລະ ຜັນຂະຫຍາຍເນື້ອໃນຈິດໃຈ 2 ວາລະແຫ່ງຊາດ ເຂົ້າສູ່ຂະບວນການວຽກງານຕົວຈິງຂອງຕົນ ແລະ ກົມກອງໃຫ້ມີຜົນສໍາເລັດເປັນຮູບປະທໍາຫຼາຍຂຶ້ນ.
(ຂ່າວ: ຖວທ ເຊກອງ)
