ກະຊວງສຶກສາທິການ ແລະ ກິລາ (ສສກ) ເຫັນດີໃນກອງປະຊຸມຄະນະຮັບຜິດຊອບໂຄງການສະໜັບສະໜູນການເງິນອາຊີວະສຶກສາ ປະຈໍາປີ (VEFF Annual Steering Committee Meeting) ໃນການພິຈາລະນາ ແລະ ຮັບຮອງທຶນສະໜັບສະໜູນ ຊຸດທີ 3 ຂອງການຮຽນການສອນອາຊີວະສຶກສາແບບຄອບຄູ່ ຫຼື ອສຄ (DCT) ໃນຮູບແບບເລັ່ງລັດ (Fast tract) ໃຫ້ແກ່ 5 ໂຄງການ ພາຍໃຕ້ການຊ່ວຍເຫຼືອລ້າຈາກລັດຖະບານເຢຍລະມັນ ໂດຍຜ່ານທາງທະນາຄານພັດທະນາເຢຍລະມັນ (KfW) ແລະ ສສກ.
ກົມອາຊີວະສຶກສາ ກະຊວງ ສສກ ຈັດກອງປະຊຸມຄະນະຮັບຜິດຊອບໂຄງການສະໜັບສະໜູນການເງິນອາຊີວະສຶກສາ ປະຈໍາປີ ເພື່ອພິຈາລະນາຮັບຮອງໃຫ້ທຶນສະໜັບສະໜູນ ສໍາລັບຊຸດທີ 3 ໃນຮູບແບບເລັ່ງລັດ ເມື່ອວັນທີ 15 ກັນຍາ ຜ່ານມາ ທີ່ສະຖາບັນພັດທະນາອາຊີວະສຶກສາ, ໂດຍພາຍໃຕ້ການເປັນປະທານຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ແລະ ທ່ານ ນາງ ທະວິວັນ ພະນະຄອນ ຫົວໜ້າຫ້ອງການທະນາຄານພັດທະນາເຢຍລະມັນ (KfW) ປະຈໍາ ສປປ ລາວ ພ້ອມດ້ວຍຄະນະຮັບຜິດຊອບໂຄງການທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມຄັ້ງນີ້, ໄດ້ຮັບຟັງການລາຍງານການຈັດຕັ້ງປະຕິບັດສັນຍາຮັບທຶນສະໜັບສະໜູນຂອງໂຄງການສະໜັບສະໜູນການເງິນອາຊີວະສຶກສາ (VEFF) ຊຸດທີ 1 ແລະ 2 ທີ່ມີທັງໝົດ 27 ສັນຍາ. ໃນນັ້ນ, 24 ສັນຍາ ແມ່ນພາຍໃຕ້ໂຄງການ VEFF (ຊຶ່ງ 2 ສັນຍາໄດ້ຖືກຍົກເລີກ) ແລະ 3 ສັນຍາ ແມ່ນພາຍໃຕ້ໂຄງການທັກສະສໍາລັບວຽກງານທ່ອງທ່ຽວ (Lao/029) (1 ສັນຍາໄດ້ຖືກຍົກເລີກ). ໃນນີ້, ມີ 20 ສາຂາອາຊີບ ຊຶ່ງຈັດຕັ້ງປະຕິບັດຢູ່ໃນສະຖານອາຊີວະສຶກສາ 13 ແຫ່ງ ແລະ ສະຖານປະກອບການ 73 ແຫ່ງ, ມີຜູ້ຮຽນວິຊາຊີບໃນຮູບແບບ ອສຄ ທັງໝົດ 518 ຄົນ, ຍິງ 82 ຄົນ. ຜ່ານການປະເມີນແລ້ວ ເຫັນວ່າ 80% ຂອງຜູ້ຮຽນວິຊາຊີບ ໄດ້ຮັບການຝຶກປະຕິບັດຕົວຈິງຢູ່ໃນສະຖານປະກອບການ ແຕ່ຍ້ອນສະພາບການແຜ່ລະບາດຂອງພະຍາດ covid-19 ຈຶ່ງເຮັດໃຫ້ມີຜູ້ຮຽນວິຊາຊີບຈໍານວນໜຶ່ງຕ້ອງໄດ້ເລື່ອນການຝຶກປະຕິບັດ, ໃນບັນດາພາກສ່ວນສະຖານປະກອບການເອງ ກໍມີຄວາມເຂົ້າໃຈຕໍ່ຮູບແບບ ອສຄ ຫຼາຍຂຶ້ນ ແລະ ມີຄວາມເພິ່ງພໍໃຈຕໍ່ການຈັດການຮຽນການສອນໃນຮູບແບບດັ່ງກ່າວເຊັ່ນດຽວກັນ.
ໃນກອງປະຊຸມດັ່ງກ່າວ, ທາງຄະນະຊີ້ນຳ ໄດ້ພິຈາລະນາ ແລະ ຮັບຮອງທຶນສະໜັບສະໜູນ ຊຸດທີ 3 ໃນຮູບແບບເລັ່ງລັດແກ່ 5 ບົດສະເໜີ ເພື່ອຂະຫຍາຍໂອກາດໃຫ້ແກ່ຜູ້ຮຽນວິຊາຊີບ ຈໍານວນ 157 ຄົນ, ເປັນຍິງ 99 ຄົນ. ໃນນັ້ນ, ມີສາຂາອາຊີບລ້ຽງສັດ, ອາຫານ-ການໂຮງແຮມ ແລະ ລົດຍົນ, ໂດຍຫັນເອົາຜູ້ຮຽນວິຊາຊີບປີສຸດທ້າຍເຂົ້າມາຮຽນໃນຮູບແບບການຮຽນການສອນແບບຄວບຄູ່. ເປົ້າໝາຍເພື່ອ ເນັ້ນການຝຶກແອບປະຕິບັດຕົວຈິງຢູ່ສະຖານປະກອບການໃຫ້ຫຼາຍຂຶ້ນ, ແນໃສ່ການສ້າງກຳລັງແຮງງານ ໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ. ພ້ອມກັນນັ້ນ, ເພື່ອສ້າງໂອກາດໃນການຈ້າງງານໃຫ້ຜູ້ຮຽນວິຊາຊີບພາຍຫຼັງຮຽນຈົບແລ້ວໃຫ້ຫຼາຍຂຶ້ນ.
ໂອກາດດັ່ງກ່າວ, ທ່ານ ຮສ.ປອ ພຸດ ສິມມາລາວົງ ໄດ້ສະເໜີເຫັນດີການພິຈາລະນາ ແລະ ຮັບຮອງທຶນສະໜັບສະໜູນ ຊຸດທີ 3 ຂອງການຮຽນການສອນອາຊີວະສຶກສາ ແບບຄຄອບຄູ່ ໃນຮູບແບບເລັ່ງລັດໃຫ້ແກ່ 5 ໂຄງການ, ໃຫ້ຄະນະຮັບຜິດສອບກ່ຽວກັບວຽກງານກອງທຶນພັດທະນາອາຊີວະສຶກສາ ປັບປຸງ ແລະ ແກ້ໄຂຕາມການສະເໜີແຕ່ລະພາກສ່ວນ ແລ້ວລາຍງານຫາລັດຖະມົນຕີ, ເຫັນດີນໍາໃນການຈັດຕັ້ງປະຕິບັດການຮຽນການສອນອາຊີວະສຶກສາແບບຄວບຄູ່ ແລະ ກິດຈະກໍາຕ່າງໆທີ່ຜ່ານມາ ໂດຍສະເພາະກິດຈະກໍາທາງດ້ານການເງິນ ແລະ ການນໍາໃຊ້ງົບປະມານຕ່າງໆ, ເຫັນດີໃຫ້ມີການຮ່າງໜັງສືສະເໜີຫາຄະນະລັດຖະມົນຕີ ກະຊວງສຶກສາທິການ ແລະ ກິລາ ເພື່ອຂໍການຮ່ວມມືທາງດ້ານການເງິນຄືນ ກ່ອນທີ່ຄະນະລັດຖະມົນຕີຈາກເຢຍລະມັນຈະມາຢ້ຽມຢາມ ສປປ ລາວ ໃຫ້ມີການຮ່ວມມືກັນອີກຄັ້ງ.
ສຳລັບໂຄງການສະໜັບສະໜູນການເງິນອາຊີວະສຶກສາ (VEFF) ແມ່ນໂຄງການທີ່ໄດ້ຮັບການຊ່ວຍເຫຼືອລ້າຈາກລັດຖະບານເຢຍລະມັນ, ໂດຍຜ່ານທາງທະນາຄານພັດທະນາເຢຍລະມັນ (KfW) ແລະ ສສກ ໂດຍແມ່ນກົມອາຊີວະສຶກສາ ເປັນພາກສ່ວນຈັດຕັ້ງປະຕິບັດ. ຈຸດປະສົງຂອງໂຄງການ ແມ່ນເພື່ອເພີ່ມທະວີຄວາມສອດຄ່ອງທາງດ້ານການຮຽນການສອນອາຊີວະສຶກສາ ໂດຍການສົ່ງເສີມການຮຽນການສອນອາຊີວະສຶກສາແບບຄວບຄູ່ ທີ່ເນັ້ນພາກປະຕິບັດຕົວຈິງໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ ດ້ວຍການສະໜັບສະໜູນທາງດ້ານການເງິນ ເພື່ອເສີມສ້າງການຮ່ວມງານລະຫວ່າງສະຖານອາຊີວະສຶກສາ ແລະ ສະຖານປະກອບການ. ໂຄງການຍັງສົ່ງເສີມການເຂົ້າຮຽນໃນສາຍອາຊີວະສຶກສາ ໂດຍສະເພາະແມ່ຍິງ. ນອກຈາກນັ້ນ, ຍັງສະໜັບສະໜູນທາງດ້ານວິຊາການທີ່ນອນໃນຮູບແບບ ການຝຶກອົບຮົມ ແລະ ສະໜອງທີ່ປຶກສາ ສໍາລັບການດັດປັບຫຼັກສູດ, ແນວຄວາມຄິດ ເພື່ອເປັນທິດທາງ ໃນການຈັດຕັ້ງປະຕິບັດການຮຽນການສອນ ອສຄ, ການຝຶກອົບຮົມໃຫ້ຜູ້ປະສານງານ ອສຄ ຂອງສະຖານອາຊີວະສຶກສາ ແລະ ສະຖານປະກອບການ, ການຝຶກອົບຮົມກ່ຽວກັບວິຊາຄູ/ການຝຶກຄູຝຶກໃນສະຖານປະກອບການ ແລະ ຝຶກປະສົບການໃຫ້ຄູສອນໃນສະຖານອາຊີວະສຶກສາ, ການສຶກສາສະພາບຄວາມປອດໄພແຮງງານ ແລະ ສຸຂະພາບແຮງງານ ແລະ ສຸຂະອະນາໄມໃນບ່ອນເຮັດວຽກ ແລະ ການຊ່ວຍເຫຼືອທາງດ້ານທີ່ປຶກສາ ແລະ/ຫຼື ການຈັດຝຶກອົບຮົມກ່ຽວກັບການນຳໃຊ້ມາດຕະຖານຄວາມປອດໄພ ແລະ ສຸຂະພາບແຮງງານ ແລະ ສຸຂະອະນາໄມ. ເງື່ອນໄຂສໍາລັບຄູ່ຮ່ວມງານ ອສຄ ແມ່ນຮ່ວມກັນຄັດເລືອກຜູ້ຮຽນວິຊາຊີບ, ດໍາເນີນການຈັດຕັ້ງປະຕິບັດການຝຶກອາຊີບ, ປະເມີນ, ສອບເສັງ ແລະ ອອກໃບປະກາດສະນີຍະບັດ, ຜູ້ຮຽນວິຊາຊີບຕ້ອງໄດ້ເຊັນສັນຍາກັບຄູ່ຮ່ວມງານຝ່າຍສະຖານປະກອບການ, ໄລຍະການຈັດຕັ້ງປະຕິບັດສັນຍາຮັບທຶນສະໜັບສະໜູນ ແມ່ນຈົນຮອດ ວັນທີ 31 ສິງຫາ 2023.
ໂດຍ: ສົງການ ພັນແພງດີ
