ພະແນກສຶກສາທິການ ແລະ ກິລາ ແຂວງສະຫວັນນະເຂດ ຈັດກອງປະຊຸມຜູ້ບໍລິຫານການສຶກສາແລະ ກິລາທົ່ວແຂວງ ໃນວັນທີ 15 ກັນຍາ 2022 ທີ່ຫ້ອງປະຊຸມພະແນກດັ່ງກ່າວ, ໂດຍການເຂົ້າຮ່ວມຂອງທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ແລະ ໃຫ້ກຽດເຂົ້າຮ່ວມທາງອອນລາຍ (ທາງໄກ) ຂອງທ່ານ ປອ ນາງ ສີສຸກ ວົງວິຈິດ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ປອ ສຸກສົມພອນ ອະນູໄທ ຫົວໜ້າພະແນກສຶກສາທິການ ແລະ ກິລາແຂວງ, ພ້ອມດ້ວຍບັນດາຫົວໜ້າຫ້ອງການສຶກສາທິການ ແລະ ກິລາ ຈາກ 14 ເມືອງ ແລະ ນະຄອນໄກສອນ ພົມວິຫານ ເຂົ້າຮ່ວມແບບເຊິ່ງໜ້າ.
ໃນກອງປະຊຸມ, ພາຍຫຼັງທີ່ ທ່ານ ປອ ສຸກສົມພອນ ອະໂນໄທ ໄດ້ກ່າວຕ້ອນຮັບແຂກ ແລະ ກ່າວເປີດກອງປະຊຸມຢ່າງເປັນທາງການແລ້ວ, ທ່ານ ປທ ພິມມະສອນ ວໍລະຍຸດ ຮອງຫົວໜ້າພະແນກສຶກສາທິການ ແລະ ກິລາແຂວງ ໄດ້ລາຍງານຜົນການຈັດຕັ້ງປະຕິບັດແຜນພັດທະນາການສຶກສາ-ກິລາ ປະຈໍາສົກຮຽນ 2021–2022 ແລະ ແຜນພັດທະນາການສຶກສາ-ກິລາ ປະຈຳສົກຮຽນ 2022–2023, ຊຶ່ງການຈັດຕັ້ງປະຕິບັດບັນດາຄາດໝາຍຕົວຊີ້ວັດດ້ານການສຶກສາ ແລະ ກິລາ ໃນຜ່ານມາເຫັນວ່າມີຫຼາຍວຽກງານທີ່ສາມາດບັນລຸຕົວຊີ້ວັດ ແລະ ອີກຈຳນວນໜຶ່ງແມ່ນຍັງບໍ່ທັນລຸ, ຊຶ່ງທາງພະແນກສຶກສາທິການ ແລະ ກິລາ ໄດ້ພ້ອມກັນຊອກຫາສາເຫດ ແລະ ວິທີທາງໃນການແກ້ໄຂ. ສໍາລັບວຽກງານຈຸດສຸມໃນຕໍ່ໜ້າ ແມ່ນຈະໄດ້ພ້ອມກັນສຸມໃສ່ຂະຫຍາຍຫ້ອງກຽມປະຖົມຢູ່ບັນດາເມືອງທີ່ມີເດັກຊົນເຜົ່າຫຼາຍ ພ້ອມທັງສືບຕໍ່ສະໜອງກຸ່ມຫຼິ້ນໃນຊຸມຊົນ ແລະ ການສອນຄວບອາຍຸ ເພື່ອກຽມຄວາມພ້ອມໃຫ້ເດັກດັ່ງກ່າວກ່ອນເຂົ້າຮຽນ ຊັ້ນປະຖົມສຶກສາ (ປ.1) ໂດຍປະສານສົມທົບກັບອົງການປົກຄອງທ້ອງຖິ່ນ, ສົມທົບກັບທຸກພາກສ່ວນທີ່ກ່ຽວຂ້ອງໃນການຝຶກອົບຮົມໃຫ້ແກ່ຄູສອນຊັ້ນປະຖົມສຶກສາ ໃນການນໍາໃຊ້ຫຼັກສູດໃໝ່ໃຫ້ທົ່ວເຖິງ ແລະ ຮັບປະກັນໃຫ້ຄູສອນເຂົ້າໃຈເຖິງເນື້ອໃນ ແລະ ວິທີການສິດສອບແບບໃໝ່ ພ້ອມທັງສ້າງຄວາມເຂັ້ມແຂງໃຫ້ແກ່ລະບົບນິເທດການສຶກສາໃນແຕ່ລະຊັ້ນການສຶກສາ ແລະ ສຸມໃສ່ການຕິດຕາມ, ຊຸກຍູ້ ແລະ ໃຫ້ການຊ່ວຍເຫຼືອຄູສອນຊັ້ນປະຖົມ ແລະ ມັດທະຍົມຢ່າງເປັນປົກກະຕິ; ສືບຕໍ່ປັບປຸງນິຕິກໍາກ່ຽວກັບການສ້າງຕັ້ງກຸ່ມໂຮງຮຽນ ພ້ອມຈັດຕັ້ງປະຕິບັດໃຫ້ເປັນຮູບປະທໍາ ແລະ ຖືກຕ້ອງຕາມຫຼັກວິຊາການ. ພ້ອມກັນນີ້, ບັນດາແຂກທີ່ເຂົ້າຮ່ວມກອງປະຊຸມຍັງໄດ້ຜັດປ່ຽນກັນປະກອບຄຳຄິດຄຳເຫັນໃສ່ແຜນພັດທະນາການສຶກສາ-ກິລາໃນທົ່ວແຂວງຢ່າງກົງໄປກົງມາຕື່ມອີກ.
ໂອກາດດຽວກັນນັ້ນ, ທ່ານ ນາງ ຫຼິງທອງ ແສງຕາວັນ ໄດ້ມີຄໍາເຫັນວ່າ: ການພັດທະນາການສຶກສາ ແລະ ກິລາ ໃນໄລຍະຜ່ານມາ ເຖິງວ່າປະສົບຜົນສຳເລັດໃນຫຼາຍດ້ານກໍຕາມ, ແຕ່ຖ້າທຽບໃສ່ກັບຄວາມຮຽກຮ້ອງຕ້ອງການອັນຈຳເປັນຂອງໜ້າທີ່ການເມືອງໃນໄລຍະໃໝ່ແລ້ວ ເຫັນວ່າການພັດທະນາການສຶກສາ ແລະ ກິລາ ເພື່ອພັດທະນາຊັບພະຍາກອນມະນຸດຍັງມີຈຸດອ່ອນ ແລະ ຂໍ້ຄົງຄ້າງຈຳນວນໜຶ່ງ ເປັນຕົ້ນແມ່ນ ການກໍ່ສ້າງບຸກຄະລາກອນດ້ານຕ່າງໆ ເຖິງວ່າມີຈຳນວນເພີ່ມຂຶ້ນ ແຕ່ຖ້າຫາກທຽບໃສ່ການເຕີບໃຫຍ່ຂະຫຍາຍຕົວໃນທຸກດ້ານຂອງການພັດທະນາເສດຖະກິດ-ສັງຄົມແລ້ວ ເຫັນວ່າຍັງມີດ້ານເຫຼືອ, ດ້ານບໍ່ພໍ, ບັນຫາຕົ້ນຕໍແມ່ນດ້ານຄຸນນະພາບຍັງບໍ່ທັນໄດ້ດີເທົ່າທີ່ຄວນ, ຄວາມຮູ້ຄວາມສາມາດຂອງຄູອາຈານຈໍານວນໜຶ່ງຍັງຈໍາກັດ, ບາງທ້ອງຖິ່ນເຂດຫ່າງໄກສອກຫຼີກຍັງຂາດຄູ, ແຕ່ຢູ່ໃນຕົວເມືອງພັດເຫຼືອ; ອັດຕາສ່ວນຂອງເດັກໃນເກນອາຍຸເຂົ້າຮຽນ ແຕ່ບໍ່ໄດ້ເຂົ້າໂຮງຮຽນກໍຍັງມີຫຼາຍ, ຍັງມີນັກຮຽນອອກໂຮງຮຽນກາງປີຮຽນ ຍ້ອນເງື່ອນໄຂໃນຕົວ ແລະ ນອກຕົວ; ການຈັດຕັ້ງປະຕິບັດບັນດາຄາດໝາຍຂອງສະພາ 15 ຄາດໝາຍ ຊຶ່ງສາມາດບັນລຸໄດ້ພຽງ 6 ຄາດໝາຍ ແລະ ຍັງ 9 ຄາດໝາຍບໍ່ສາມາດບັນລຸໄດ້ ເຊັ່ນ: ອັດຕາເຂົ້າຮຽນຂອງປະຊາກອນໃນເກນອາຍຸຍັງຕໍ່າ ຊຶ່ງເປັນຜົນເນື່ອງມາຈາກອັດຕາປະລະ ແລະ ອັດຕາຄ້າງຫ້ອງຍັງສູງຫຼາຍ , ອັດຕາເຂົ້າຮຽນຊັ້ນມັດທະຍົມຕອນຕົ້ນ ແລະ ຕອນປາຍ ຍັງບໍ່ສູງ, ຊຶ່ງມັນເປັນສິ່ງທ້າທາຍທີ່ຈະຕ້ອງໄດ້ພ້ອມກັນສູ້ຊົນບຸກບືນໃນສົກຮຽນ 2022-2023 ຢ່າງມີໝາກມີຜົນ.
ພາຍຫຼັງສໍາເລັດກອງປະຊຸມ, ໃນວັນດຽວກັນທາງພະແນກສຶກສາທິການ ແລະ ກິລາແຂວງ ໄດ້ຈັດກິດຈະກໍາສ້າງຂະບວນການຫຼິ້ນກິລາເຕະບານມິດຕະພາບ ລະຫວ່າງ ທີມພະແນກສຶກສາທິການ ແລະ ກິລາແຂວງ ພົບກັບທີມຫ້ອງການສຶກສາທິການ ແລະ ກິລາ 14ເມືອງ 1 ນະຄອນໄກສອນ ພົມວິຫານ ເພື່ອເປັນການສ້າງຂະບວນການຂໍ່ານັບຮັບຕ້ອນ ຊົມເຊີຍ ຜູ້ບໍລິຫານການສຶກສາ ແລະ ກິລາທົ່ວແຂວງ ປະຈຳສົກຮຽນ 2021-2022 ໃຫ້ມີບັນຍາກາດຟົດຟື້ນ ແລະ ເບີກບານມ່ວນຊື່ນ. ນອກຈາກນັ້ນ, ຍັງເປັນການສ້າງໂອກາດໃຫ້ກັບນັກກິລາທັງສອງພາກສ່ວນໄດ້ອອກກຳລັງກາຍ ເພື່ອສຸຂະພາບທີ່ດີ ແລະ ເປັນການຮັດແໜ້ນຄວາມສາມັກຄີມິດຕະພາບອັນດີງາມ. ຜ່ານການແຂ່ງຂັນຜົນປະກົດວ່າ ທີມຫ້ອງການສຶກສາທິການ ແລະ ກິລາ 14 ເມືອງ 1 ນະຄອນໄກສອນ ພົມວິຫານ ເປັນຝ່າຍເອົາຊະນະທີມພະແນກສຶກສາທິການ ແລະ ກິລາແຂວງໄປ 1-0 ປະຕູ.
ໂດຍ: ຄຳແພງເພັດ ຂັນຕິວົງ
