ພິທີຖະແຫລງຂ່າວ ງານມະຫາກໍາສືມືຫັດຖະກໍາລາວຄັ້ງທີ 21 ປີ 2022 ຈັດຂຶ້ນຕອນບ່າຍວັນທີ 19 ກັນຍາ 2022 ທີ່ສູນການຄ້າລາວ-ໄອເຕັກ ນະຄອນຫລວງວຽງຈັນ ໂດຍມີ ທ່ານ ບົວວັນ ວິລະວົງ, ຫົວໜ້າກົມອຸດສາຫະກຳ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ, ທ່ານພູທອງ ໄຊສະນິດ ຮອງປະທານສະມາຄົມຫັດຖະກໍາລາວ , ຮອງປະທານຄະນະກະກຽມງານມະຫາກໍາສີມືຫັດຖະກໍາລາວຄັ້ງທີ 21, ປີ 2022, ທ່ານ ສົມສະໜຸກ ມີໄຊ, ຮອງປະທານສະມາຄົມນັກຂ່າວ ແຫ່ງ ສປປ ລາວ, ຄະນະທີ່ປຶກສາສະມາຄົມຫັດຖະກໍາລາວ, ທ່ານ ວັນຍຸງ ຮວງວັນ ຜູ້ຈັດການທົ່ວໄປສູນວາງສະແດງ ແລະ ງານລ້ຽງງານປະຊຸມ ບໍລິສັດລາວເວີນມະຫາຊົນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພູທອງ ໄຊສະນິດ ຮອງປະທານສະມາຄົມຫັດຖະກຳລາວ, ຮອງປະທານຄະນະກະກຽມງານມະຫາກຳສີມືຫັດຖະກຳລາວ ຄັ້ງທີ 21 ປະຈໍາປີ 2022 ກ່າວວ່າ:
ງານມະຫາກໍາສີມືຫັດຖະກໍາລາວ ຄັ້ງທີ 21 ຈັດຂຶ້ນພາຍໃຕ້ຄໍາຂວັນ:ສືໄມ້ລາຍມື ຄື ອຸທິຍານແຫ່ງການທ່ອງທ່ຽວ “ສະເໜຜ້າບ່ຽງລາວ”, ແລະ ດ້ວຍຈຸດປະສົງຫຼັກ ດັ່ງນີ້:
1. ເພື່ອສະເຫຼີມສະຫຼອງ “ວັນຫັດຖະກໍາລາວ ວັນທີ 1 ພະຈິກ”ຄົບຮອບ 15 ປີ (ວັນທີ 1 ພະຈິກ 2007 – ວັນທີ 1 ພະຈິກ 2022) ແລະ ສະເຫຼີມສະຫຼອງ ວັນສ້າງຕັ້ງສະມາຄົມຫັດຖະກໍາລາວ ຄົບຮອບ 25 ປີ ທີ່ຈະມາເຖິງ (1 ເມສາ 1998 – 1 ເມສາ 2023)
2. ເພື່ອສ້າງກາລະໂອກາດໃຫ້ຊຸມຊົນ ແລະ ລູກຄ້າ ຜູ້ມາທ່ຽວຊົົມ ທ່ຽວຊື້ ໄດ້ພົບ-ໄດ້ເຫັນຄວາມຫຼາກຫຼາຍຂອງເຄື່ອງຫັດຖະກໍາລາວ, ສ້າງຄວາມປະທັບໃຈ ແລະ ຫລົງໄຫຼ ໃນຄວາມມະຫັດສະຈັນຂອງສີໄມ້ລາຍມືຂອງນາຍຊ່າງຫັດຖະກໍາລາວເຮົາ.
3. ເພື່ອເຕົ້າໂຮມຄວາມສາມັກຄີບັນດາຊາວຊ່າງຫັດຖະກຳທຸກໆທ້ອງຖິ່ນໃນທົ່ວປະເທດພ້ອມກັນອະນຸລັກ ແລະ ສົ່ງເສີມເຄື່ອງຫັດຖະກໍາ ທີ່ມີລັກສະນະເປັນມູນເຊື້ອ, ສົ່ງເສີມພູມປັນຍາ, ຂຸດຄົ້ນທ່າແຮງທາງດ້ານຫັດຖະກຳຢູ່ທຸກທ້ອງຖິ່ນ ປະກອບສ່ວນເຂົ້າໃນການສ້າງລາຍຮັບ ແລະ ພັດທະນາຊີວິດການເປັນຢູ່ ຂອງທ້ອງຖິ່ນໃຫ້ນັບມື້ດີຂຶ້ນ.
4. ເພື່ອໃຫ້ບັນດາຊາວຊ່າງ ແລະ ຜູ້ປະກອບການ ດ້ານຫັດຖະກຳ ໄດ້ມີໂອກາດເຂົ້າເຖິງການຕະຫຼາດຜະລິດຕະພັນຫັດຖະກໍາຂອງຕົນ ພ້ອມທັງ ໄດ້ມີໂອກາດພົບປະແລກປ່ຽນບົດຮຽນ, ປະສົບການທາງດ້ານການຜະລິດ, ການວາງສະແດງ ແລະ ການຂາຍ.
5. ເພື່ອປະກອບສ່ວນສ້າງເປັນສະຖານທີ່ທ່ອງທ່ຽວດ້ານຫັດຖະກໍາ ດັ່ງຄໍາຂັວນ ທີ່ວ່າ: “ສີໄມ້ລາຍມືຄືອຸທິຍານແຫ່ງການທ່ອງທ່ຽວ”
ງານ ມະຫາກໍາສີມືຫັດຖະກໍາລາວ ຄັ້ງທີ 21 ຈະຈັດຂຶ້ນ ທີ່ສູນການຄ້າລາວ-ໄອເຕັກ ແຕ່ວັນທີ 15- 23 ຕຸລາ 2022 ໂດຍມີພາກສ່ວນຕ່າງໆເຂົ້າຮ່ວມຄື: ພາກສ່ວນເຄື່ອງນຸ່ງ, ເຄື່ອງປະດັບ, ເຄື່ອງຈັກສານ, ເຄື່ອງປັ້ນດິນເຜົາ, ຮູບແຕ້ມ, ໄມ້ແກະສະຫຼັກ, ເຟີນີເຈີ ພ້ອມດ້ວຍພາກສ່ວນ ອາຫານສໍາເລັດຮູບພື້ນເມືອງ, ສະໝູນໄພ ແລະ ອື່ນໆ ລວມທັງໝົດ: 230 ຮ້ານ (ບຸດ) ເຊິ່ງມວນຊົນ ທີ່ເຂົ້າມາທ່ຽວຊົມ-ທ່ຽວຊື້ ໃນງານຄັ້ງນີ້ ນອກຈາກຈະໄດ້ຊົມການຈັດວາງສະແດງ ແລະ ຂາຍສິນຄ້າຫັດຖະກໍາຕ່າງໆ ແລ້ວ ໃນງານຍັງສາມາດເຂົ້າຊົມກິດຈະກໍາອື່ນໆໄດ້ອີກ ເຊັ່ນ:
ການ ເສວະນາ (Panel Discussion) ໃນຫຼາຍຫົວຂໍ້ ເປັນຕົ້ນແມ່ນ:
– ສະເໜຜ້າບ່ຽງລາວ
– ການອອກແບບຜະລິດຕະພັນ, ຫຸ້ມຫໍ່ ແລະ ວິທີສົ່ງອອກສິນຄ້າຫັດຖະກຳສູ່ຕະຫຼາດສາກົນ
– ນະວັດຕະກຳການຜະລິດທີ່ເປັນມິດກັບສິ່ງແວດລ້ອມ
– ກິດຈະກໍາ ປະກວດ ການແຂ່ງຂັນຜະລິດຕະພັນດີເດັ່ນ: “ສະເໜຜ້າບ່ຽງລາວ”
– ກິດຈະກໍາສາທິດ ຂັ້ນຕອນການຜະລິດຕົວຈິງ
– ກິດຈະກຳປະຈໍາວັນ ສະແດງສິລະປະ.
– ງານເດີນແບບອາພອນລາວ ພາຍໃຕ້ຫົວຂໍ້ “ສົ່ງອ້ອມກອດເຖິງລູກຫຼານຢູ່ຂອບຟ້າແດນໄກ ໃນລະດູໜາວ.
ການເຄື່ອນໄຫວກິດຈະກຳຕ່າງໆໃນງານມະຫາກຳ ສີມືຫັດຖະກຳຄັ້ງນີ້ ໄດ້ຮັບການຊ່ວຍເຫຼືອ ສະໜັບສະໜູນ ຈາກຫຼາຍພາກສ່ວນນັບທັງພາກລັດ, ອົງການຈັດຕັ້ງສາກົນ ປະຈໍາ ສປປ ລາວ, ຫົວໜ່ວຍທຸລະກິດ ແລະ ຈາກບຸກຄົນທົ່ວໄປ.
