ຂ່າວຕ່າງປະເທດລາຍງານ ເມື່ອບໍ່ດົນມານີ້, ກະຊວງສາທາລະນະສຸກ ແຮງງານ ແລະ ສະຫວັດ ດີການຂອງຍີ່ປຸ່ນໄດ້ເປີດເຜີຍບົດລາຍງານໂດຍລະບຸວ່າ ປະຊາກອນໃນປະເທດ ຊຶ່ງມີອາຍຸ 100 ປີຂຶ້ນໄປມີຈຳນວນຢ່າງໜ້ອຍ 90.526 ຄົນ ເພີ່ມຂຶ້ນ 4.016 ຄົນໃນຮອບປີຫຼ້າສຸດ ສ້າງສະຖິຕິສູງສຸດເປັນປະຫວັດສາດຕໍ່ເນື່ອງເປັນປີທີ 52 ແລະ ປະມານ 88,6% ຫຼື 80.161 ຄົນຂອງຜູ້ມີອາຍຸຫຼາຍກວ່າ 100 ປີໃນຍີ່ປຸ່ນເປັນແມ່ຍິງ.
ຍີ່ປຸ່ນເລີ່ມບັນທຶກສະຖິຕິດັ່ງກ່າວເມື່ອປີ 1963 ຊຶ່ງໃນປີນັ້ນມີຈຳນວນປະຊາກອນອາຍຸ 100 ປີຂຶ້ນໄປພຽງ 153 ຄົນເທົ່ານັ້ນ ເຖິງຢ່າງໃດກໍຕາມ, ຫຼັງຈາກນັ້ນ ສະຖິຕິໄດ້ເພີ່ມຂຶ້ນຢ່າງຕໍ່ເນື່ອງຈົນຫຼາຍກວ່າ 1.000 ຄົນເມື່ອປີ 1981 ແລະ ເຖິງ 10.000 ຄົນເມື່ອປີ 1998 ແລະ ຫຼາຍກວ່າ 50.000 ຄົນເມື່ອປີ 2012.
ສຳລັບຜູ້ທີ່ກວມອັດຕາສ່ວນສະຖິຕິແມ່ຍິງທີ່ມີອາຍຸຫຼາຍທີ່ສຸດຂອງຍີ່ປຸ່ນໃນຂະນະນີ້ຄື ທ່ານນາງ ຟຸສະ ທັດສຶມິ ອາຍຸ 115 ປີ ຈາກເມືອງ ຄາຊິວາຣະ ໃນແຂວງ ໂອຊາກາ ສ່ວນຜູ້ຊາຍທີ່ອາຍຸຫຼາຍທີ່ສຸດໃນຍີ່ປຸ່ນຄື ທ່ານ ຊິເງຣຸ ນາກາມູຣະ ອາຍຸ 111 ປີ ຈາກເມືອງ ຈິນເຊກິໂຄເກັນ ໃນແຂວງ ຮິໂຣຊິມະ.
Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
