ບໍລິສັດ ສະຫຍາມ ຄູໂບຕ້າ ຄໍປໍເຣຊັ່ນ ຈຳກັດ ຈາກປະເທດໄທ ສືບຕໍ່ໃຫ້ການຮ່ວມມືອັນດີງາມກັບວິທະຍາໄລເຕັກນິກ ລາວ-ເຢຍລະມັນ ຫຼື ວຕລຢ ຄົບຮອບ 10 ປີ ໂດຍການມອບລົດຂຸດ ຄູໂບຕ້າ ຈຳນວນ 1 ຄັນ ມູນຄ່າ 500 ລ້ານກວ່າກີບ ຫຼື ສະກຸນເງິນໄທ 1 ລ້ານກວ່າບາດ ເພື່ອເປັນຂອງຂວັນ ແລະ ເພື່ອນຳໄປປະກອບເຂົ້າໃນການຈັດການຮຽນການສອນ ສ້າງຊ່າງສີມືແຮງງານລາວໃຫ້ມີຄຸນນະພາບ. ພ້ອມທັງຈັດການແຂ່ງຂັນທັກສະຊ່າງຫຼຽນຄຳ ສາຂາລົດແທກເຕີ້ ແນໃສ່ສົ່ງເສີມການພັດທະນາທັກສະຄວາມສາມາດຂອງຊ່າງບໍລິການຂອງສະຫຍາມ ຄູໂບຕ້າ ໃຫ້ເປັນໄປຕາມມາດຕະຖານ ແລະ ສ້າງໃຫ້ເກີດການຮຽນຮູ້ພັດທະນາສີມືຢ່າງຕໍ່ເນື່ອງ.
ພິທີມອບ-ຮັບລົດຂຸດຄູໂບຕ້າດັ່ງກ່າວ, ໄດ້ມີຂຶ້ນເມື່ອວັນທີ 15 ກັນຍາ ຜ່ານມາ ທີ່ວິທະຍາໄລເຕັກນິກ ລາວ-ເຢຍລະມັນ ເຂດບ້ານຊຽງດາ ເມືອງໄຊເຊດຖາ ນະຄອນຫຼວງວຽງຈັນ, ໂດຍເປັນກຽດກ່າວມອບຂອງທ່ານ ທະນະວັດ ສີຣິພອນພັນ ຜູ້ຈັດການປະເທດລາວ ບໍລິສັດ ສະຫຍາມ ຄູໂບຕ້າ ຄໍປໍເຣຊັ່ນ ຈຳກັດ ຈາກປະເທດໄທ ແລະ ກ່າວຮັບຂອງທ່ານ ຄຳສະໄຫວ ຍ່ອມມີລາວົງ ຜູ້ອຳນວຍການ ວິທະຍາໄລເຕັກນິກ ລາວ-ເຢຍລະມັນ, ມີທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກິລາ ແລະ ທ່ານ ໄວພົດ ຫາມາລາ ຜູ້ຈັດການຝ່າຍບໍລິການລູກຄ້າ ບໍລິສັດ ສະຫຍາມ ຄູໂບຕ້າ ຄໍປໍເຣຊັ່ນ ຈຳກັດ ຈາກປະເທດໄທ ພ້ອມດ້ວຍຄະນະອຳນວຍການ ວຕລຢ ແລະ ພະນັກງານ ຄູອາຈານທີ່ກ່ຽວຂ້ອງ ຕະຫຼອດຮອດນັກສຶກສາເຂົ້າຮ່ວມເປັນສັກຂີພິຍານ.
ໃນພິທີ, ທ່ານ ໜູພັນ ອຸດສາ ໄດ້ກ່າວວ່າ: ສຳລັບກົນຈັກກະເສດຢູ່ ສປປ ລາວ ສ່ວນຫຼາຍໃນການນຳໃຊ້ແມ່ນຂອງບໍລິສັດ ຄູໂບຕ້າ ໂດຍສະເພາະແມ່ນລົດໄຖ່ເດີນຕາມນີ້ມີຈຳນວນຫຼາຍໝື່ນຄັນທີ່ປະຊາຊົນລາວ ກໍຄື ຊາວກະສິກອນລາວ ນຳໃຊ້ບໍລິການປະກອບເຂົ້າໃນອາຊີບເປັນປົກກະຕິ, ຊຶ່ງພວກເຮົາມີຄວາມຕ້ອງການສູງໃນການບໍາລຸງຮັກສາ ແລະ ການສ້ອມແປງ ຫາກວ່າມີການຕັ້ງສູນຢູ່ສະຖານທີ່ແຫ່ງນີ້ ຈະເປັນການດີ ເພື່ອສ້າງນາຍຊ່າງເຕັກນິກຮັບໃຊ້ການບຳລຸງສ້ອມແປງຕ່າງໆໃນຂອບເຂດທົ່ວປະເທດ, ຊຶ່ງໃນສ່ວນຂອງອາຊີວະສຶກສານີ້ ກໍມີບັນດາວິທະຍາໄລເຕັກນິກຕ່າງໆທີ່ສິດສອນເລື່ອງກົນຈັກກະສິກຳ ການກະເສດຢູ່ທຸກແຂວງໃນຂອບເຂດທົ່ວປະເທດ ຈຶ່ງມີຄວາມຈຳເປັນທີ່ພວກເຮົາຈະໃຫ້ການຮ່ວມມືສ້າງຕັ້ງສູນຝຶກອົບຮົມຝຶກວິຊາຊີບຂອງພວກເຮົາຢູ່ທີ່ ວຕລຢ. ໄລຍະຜ່ານມານັ້ນ, ພວກເຮົາໄດ້ຜະລິດນາຍຊ່າງ ເພື່ອບຳລຸງຮັກສາເຄື່ອງຈັກ ບໍ່ວ່າຈະເປັນລົດໄຖ່ນາເດີນຕາມ, ລົດແທກເຕີ້, ລົດກ່ຽວເຂົ້າ ແລະ ອື່ນໆ ທີ່ພວກເຮົາໄດ້ຮັບການຊ່ວຍເຫຼືອຈາກບໍລິສັດ ສະຫຍາມ ຄູໂບຕ້າ ຄໍປໍເຣຊັ່ນ ຈຳກັດ ຈາກປະເທດໄທ.
ທ່ານຫົວໜ້າກົມອາຊີວະສຶກສາ ໄດ້ກ່າວຕື່ມອີກວ່າ: ໃນນາມການນຳຂອງກະຊວງສຶກສາທິການ ແລະ ກິລາ ຂໍສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງມາຍັງບໍລິສັດດັ່ງກ່າວ ທີ່ໃຫ້ການສະໜັບສະໜູນຊ່ວຍເຫຼືອຕະຫຼອດມາ ໂດຍສະເພາະລົດຂຸດຄັນນີ້ ຊຶ່ງຈະໄດ້ນຳໃຊ້ເຂົ້າໃນການຮຽນການສອນ ຈະເປັນຜົນປະໂຫຍດຫຼາຍໃຫ້ແກ່ຄູອາຈານ ແລະ ນ້ອງນັກສຶກສາ ໃນການສຶກສາຮຽນຮູ້ຢ່າງມີປະສິດທິພາບ ແລະ ປະສິດທິຜົນ. ສະເພາະການຈັດການແຂ່ງຂັນທັກສະຊ່າງຫຼຽນຄຳຄັ້ງນີ້, ຈະເປັນໂອກາດອັນດີໃຫ້ຄູອາຈານ ແລະ ນ້ອງນັກສຶກສາໄດ້ຮຽນຮູ້ມາດຕະຖານຕ່າງໆໃນການເປັນຊ່າງຫຼຽນຄຳ ເພື່ອຈະມີການແຂ່ງຂັນຕ່າງໆໃນພາກພື້ນ ແລະ ສາກົນ. ສະນັ້ນ, ຕ້ອງພ້ອມພຽງກັນເຮັດແນວໃດໃຫ້ນາຍຊ່າງມີຄວາມຊຳນິຊຳນານ ເປັນໂອກາດອັນດີ ເພື່ອພັດທະນາເສດຖະກິດ-ສັງຄົມຂອງຊາດໃຫ້ເຕີບໃຫຍ່ຂະຫຍາຍຕົວຂຶ້ນເລື້ອຍໆ.
ສຳລັບການແຂ່ງຂັນທັກສະຊ່າງຫຼຽນຄຳ ສາຂາລົດແທກເຕີ້ ແມ່ນໄດ້ດຳເນີນແຂ່ງຂັນມາແລ້ວ ແລະ ສາມາດຄັດເລືອກໄດ້ 2 ຄົນ ເຂົ້າຮອບຊີງຫຼຽນຄຳ ໃນວັນທີ 15 ກັນຍາ 2022.
ໂດຍ: ສົງການ ພັນແພງດີ
