ວິທະຍາໄລ (ວລ) ເຕັກນິກ ສັບພະວິຊາ ໄດ້ຈັດພິທີສະຫຼຸບຜົນສຳ ເລັດຂອງການຈັດຕັ້ງປະຕິບັດການຮຽນການສອນ ສົກຮຽນ 2021-2022 ແລະ ໄຂສົກຮຽນໃໝ່ 2022-2023 ຢ່າງເປັນທາງການ ເມື່ອວັນທີ 14 ກັນຍາ ຜ່ານມາ ທີ່ ສະໂມສອນໃຫຍ່ ວິທະຍາໄລດັ່ງກ່າວ, ໂດຍໃຫ້ກຽດເປັນປະທານຂອງທ່ານ ໜູພັນ ອຸດສາ ຄະນະບໍລິຫານງານພັກກະຊວງ, ຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກິລາ, ມີ ທ່ານ ວິໄລພອນ ພົມມະຫາໄຊ ເລຂາຄະນະພັກຮາກຖານ, ຜູ້ອຳນວຍການວິທະຍາໄລເຕັກນິກສັບພະວິຊາ ພ້ອມດ້ວຍຄະນະພັກຮາກຖານ, ຄະນະອໍານວຍການ, ຄະນະນໍາ, ພະນັກງານ ຄູອາຈານ ແລະ ນັກສຶກສາ ພາຍໃນວິທະຍາໄລເຂົ້າຮ່ວມຢ່າງພ້ອມພຽງ.
ໃນພິທີ, ທ່ານ ວິໄລພອນ ພົມມະຫາໄຊ ໄດ້ກ່າວໃຫ້ຮູ້ວ່າ: ວິທະຍາໄລ ເຕັກນິກ ສັບພະວິຊາ ເປັນວິທະຍາໄລສາຍອາຊີວະສຶກສາຂອງລັດແຫ່ງທໍາອິດຂອງ ສປປ ລາວ ພາຍໃຕ້ການຊີ້ນໍາຂອງກົມອາຊີວະສຶກສາ ກະຊວງສຶກສາທິການ ແລະ ກິລາໂດຍກົງ, ມີພະນັກງານ, ຄູອາຈານທັງໝົດ 127 ຄົນ, ຍິງ 45 ຄົນ, ປະລິນຍາເອກ 2 ຄົນ, ກຳລັງຄົ້ນຄວ້າປະລິນຍາເອກ 1 ຄົນ, ປະລິນຍາໂທ 46 ຄົນ, ປະລິນຍາຕີ 75 ຄົນ, ຊັ້ນສູງ 3 ຄົນ ແລະ ຄູຮັບເຊີນ ຈຳນວນ 3 ຄົນ. ວິທະຍາໄລ ໄດ້ຈັດຕັ້ງການຮຽນການສອນຕາມແຜນການສຶກສາທີ່ກະຊວງສຶກສາທິການ ແລະ ກິລາ ກໍຄື ກົມອາຊີວະສຶກສາວາງອອກຢ່າງເຂັ້ມງວດ ໂດຍປະຕິບັດຕາມ 3 ລັກສະນະ ແລະ 5 ຫຼັກມູນຂອງການສຶກສາ, ມີປະຕິທິນການສຶກສາ ແລະ ປະຕິບັດຕາມຫຼັກສູດການຮຽນການສອນຢ່າງຄົບຖ້ວນ, ມີວິທີການສອນແບບປະສົມປະສານຫຼາຍຮູບແບບ ເຊັ່ນ: ການສອນທີ່ເອົານັກຮຽນເປັນໃຈກາງ, ການສອນແບບ CBT ແລະ ເນັ້ນສະມັດຕະພາບຂອງຜູ້ຮຽນຮູບແບບເຊິ່ງໜ້າ ແລະ online (ທາງໄກ) ໄລຍະໂຄວິດ-19 ໄດ້ດີ ປ່ຽນແນວຄວາມຄິດຈາກລະບົບການຮຽນທີ່ໃຫ້ນັກຮຽນຮູ້ຫຼາຍ ແລະ ຮຽນທິດສະດີຫຼາຍ ມາເປັນແນວຄວາມຄິດໃຫ້ນັກຮຽນເຮັດເປັນ ແລະ ສາມາດປະກອບອາຊີບໄດ້ດ້ວຍຕົນເອງ.
ການຄຸ້ມຄອງນັກສຶກສາ, ການປະຕິບັດຫຼັກສູດ ແມ່ນສາມາດບັນລຸໄດ້ຕາມຄາດໝາຍທີ່ວາງໄວ້. ວິທະຍາໄລ ເຕັກນິກ ສັບພະວິຊາ ໄດ້ຈັດຕັ້ງການຮຽນການສອນຕາມຫຼັກສູດ ຊັ້ນກາງ 9+3, 12+2, ຊັ້ນສູງ 12+3 ແລະ ຊັ້ນສູງຕໍ່ເນື່ອງ; ລະບົບການຈັດຕັ້ງມີ 3 ພະແນກການ ຄື: ພະແນກບໍລິຫານ ແລະ ຈັດຕັ້ງພະນັກງານ, ພະແນກວິຊາການ ແລະ ພະແນກກິດຈະການນັກສຶກສາ ແລະ 5 ພາກວິຊາສະເພາະ ເຊັ່ນ: ພາກວິຊາໄຟຟ້າ, ພາກວິຊາວັດແທກ ແລະ ຄຸ້ມຄອງທີ່ດິນ, ພາກວິຊາໄອທີວິສະວະກໍາ, ພາກວິຊາທໍລະນີສາດ ແລະ ພາກວິຊາບໍ່ແຮ່.
ໃນສົກຮຽນ 2021-2022 ວິທະຍາໄລ ມີນັກສຶກສາທີ່ຈົບການສຶກສາທັງໝົດ 528 ຄົນ. ໃນນີ້, ພາກວິຊາ ໄອທີ ວິສະວະກໍາ ມີ 3 ສາຂາວິຊາ ຄື: ໄອທີ ພູມສັນຖານ, ໄອທີ ອຸດສາຫະກໍາ ແລະ ວິທະຍາສາດຄອມພິວເຕີ, ມີນັກຮຽນເສັງເລື່ອນຂັ້ນໄດ້ 114 ຄົນ ເທົ່າກັບ 79,72%, ເສັງຈົບຊັ້ນໄດ້ 130 ຄົນ ເທົ່າກັບ 92,19%; ພາກວິຊາໄຟຟ້າ ມີ 3 ສາຂາວິຊາ ຄື: ໄຟຟ້າທົ່ວໄປ, ໄຟຟ້າພະລັງງານນໍ້າ ແລະ ໄຟຟ້າກົນຈັກພະລັງງານນໍ້າ ມີນັກຮຽນເສັງເລື່ອນຂັ້ນໄດ້ 131 ຄົນ ເທົ່າກັບ 56,7%, ເສັງຈົບຊັ້ນໄດ້ 284 ຄົນ ເທົ່າກັບ 94,35%; ພາກວິຊາວັດແທກ ແລະ ຄຸ້ມຄອງທີ່ດິນ ມີ 3 ສາຂາວິຊາ ຄື: ສໍາຫຼວດວັດແທກ-ຄຸ້ມຄອງທີ່ດິນ, ປະເມີນລາຄາຊັບສິນ-ທີ່ດິນ ແລະ ວັດແທກກໍ່ສ້າງ, ມີນັກຮຽນເສັງເລື່ອນຂັ້ນໄດ້ 46 ຄົນ ເທົ່າກັບ 70,76%, ເສັງຈົບຊັ້ນໄດ້ 31 ຄົນ ເທົ່າກັບ 100%;ພາກວິຊາທໍລະນີສາດ ມີ 2 ສາຂາວິຊາ ຄື: ຊອກຄົ້ນ-ສໍາຫຼວດ ແລະ ສິ່ງແວດລ້ອມອຸດສາຫະກໍາ, ມີນັກຮຽນເສັງເລື່ອນຂັ້ນໄດ້ 15 ຄົນ ເທົ່າກັບ 88,23%, ເສັງຈົບຊັ້ນໄດ້ 24 ຄົນ ເທົ່າກັບ 100%; ພາກວິຊາບໍ່ແຮ່ ມີ 2 ສາຂາວິຊາ ຄື: ວິສະວະກໍາຂຸດຄົ້ນແຮ່ທາດ ແລະ ອຸດສະຫະກໍາປຸງແຕ່ງແຮ່ທາດ, ມີນັກຮຽນເສັງເລື່ອນຂັ້ນໄດ້ 22 ຄົນ ເທົ່າກັບ 95,65%, ເສັງຈົບຊັ້ນໄດ້ 12 ຄົນ ເທົ່າກັບ 92,3%.
ນອກຈາກນີ້, ທ່ານ ວິໄລພອນ ພົມມະຫາໄຊ ຍັງໄດ້ກ່າວເຖິ່ງຈຸດດີ ແລະ ຈຸດອ່ອນ ແລະ ທິດທາງ ແຜນການ ປະຈໍາສົກຮຽນ 2022-2023, ຊຶ່ງແຜນການສູ້ຊົນດ້ານການຮຽນການສອນ 11 ວຽກຫຼັກ ທີ່ຈະສູ້ຊົນ ຄື: ສ້າງແຜນການສຶກສາຂອງວິທະຍາໄລ ເຕັກນິກ ສັບພະວິຊາ ປະຈໍາແຕ່ລະສົກຮຽນ; ສ້າງແຜນຝຶກອົບຮົມ ຍົກລະດັບທັກສະໃຫ້ພະນັກງານ ຄູອາຈານ; ປັບປຸງບາງຫຼັກສູດໃຫ້ແທດເໝາະກັບສະພາບຕົວຈິງໃນປະຈຸບັນ; ສ້າງແຜນເພື່ອພັດທະນາຄູ່ມືຄູ ແລະ ສື່ການນໍາໃຊ້ເຂົ້າໃນການຮຽນການສອນ; ຈັດຕັ້ງປະຕິບັດການບໍາລຸງການຮຽນການສອນໃຫ້ນັກສຶກສາທີ່ຍັງອ່ອນບາງລາຍວິຊາ; ເພີ່ມທະວີການພົວພັນກັບສະຖານປະກອບການໃນການຈັດຫາສະຖານທີ່ລົງຝຶກງານໃຫ້ແກ່ນັກ ສຶກສາ; ກໍ່ສ້າງນັກຮຽນດີ-ນັກຮຽນເກັ່ງໃຫ້ໄດ້ 5% ຂອງນັກຮຽນທັງໝົດ; ສ້າງຄູສອນດີ-ສອນເກັ່ງໃຫ້ໄດ້ 10% ຂອງຄູທັງໝົດ; ເສັງຈົບຊັ້ນໃຫ້ໄດ້ 90% ຂອງນັກຮຽນທັງໝົດ; ເສັງເລື່ອນຊັ້ນໃຫ້ໄດ້ 85% ຂຶ້ນໄປຂອງນັກຮຽນທັງໝົດ; ຈັດການຮຽນການສອນໃຫ້ໄປຕາມໂຄງການຫຼັກສູດ.
ໃນໂອກາດນີ້, ທາງໂຮງຮຽນໄດ້ຜ່ານຂໍ້ຕົກລົງ ວ່າດ້ວຍການຍ້ອງຍໍນັກສຶກາທີ່ຮຽນ-ດີຮຽນເກັ່ງ, ນັກສຶກສາທີ່ສາມາດຍາດໄດ້ກຽດນິຍົມ ມີ 2 ຄົນ ໄດ້ແກ່ ທ້າວ ເພັດມັງກອນ ລັດຕະນະກອນ ຫ້ອງ HDCSIT22B, CPA=3,54, ທ້າວ ໄຊປັນຍາ ທອງສະຫວັນ ຫ້ອງ HDCCEE22A, CPA=3,51, ນັກສຶກສາທີ່ໄດ້ກຽດນິຍົມອັນດັບ 2 ມີ 6 ຄົນ ໄດ້ແກ່ ທ້າວ ສຸກສະຫວັນ ໄຊແກ້ວຄໍາດີ ຫ້ອງ HDCCEE 22A, CPA=3,43, ນາງ ນິດສັນ ວໍລະສານ ຫ້ອງ HDCCSM 22A, CPA=3,34, ນາງ ແວວ ແກ້ວວິໄລທອງ ຫ້ອງ HDENR 22A, CPA=3,29, ນາງ ຊາຍ ສີປະເສີດ ຫ້ອງ HDENR 22A, CPA=3,27, ນາງ ນ້ອຍແກ້ວ ພັນມະລີວອນ ຫ້ອງ HDENR 22A, CPA=3,25, ນາງ ບຸນແກ້ວ ອິ່ນທະວົງ ຫ້ອງ HDENR 22A, CPA=3,25. ນອກຈາກນີ້, ໃນພິທີຍັງໃບກຽດຕິຄຸນໃຫ້ແກ່ນັກສຶກສາທີ່ໄດ້ປະກອບສ່ວນຊ່ວຍເຫຼືອໃນການຊື້ອຸປະກອນເຂົ້າຫ້ອງທົດລອງຂອງວິທະຍາໄລໃນໄລຍະຜ່ານມາ.
ໂດຍ: ແສງດາວວີ
