ເມືອງໄຊສະຖານ ແຂວງໄຊຍະບູລີ ໄດ້ຈັດພິທີເຊັນສັນຍາສົ່ງເສີມການປູກ, ເກັບຊື້ ແລະ ສ້າງຕັ້ງໂຮງງານປຸງແຕ່ງກາເຟ ລະຫວ່າງຫ້ອງການແຜນການ ແລະ ການລົງທຶນເມືອງ ກັບບໍລິສັດເວັນມິ່ງລີ່ ຂາອອກ-ຂາເຂົ້າ ຈໍາກັດຜູ້ດຽວ ຂຶ້ນຢ່າງເປັນທາງການໃນວັນທີ 16 ກັນຍາຜ່ານມານີ້,ທີ່ຫ້ອງປະຊຸມຫ້ອງການແຜນການ ແລະ ການລົງທຶນເມືອງ ພາຍໃຕ້ການເປັນປະທານຂອງທ່ານ ສົມນຶກ ພອນວິຈິດ ຮອງເລຂາພັກເມືອງ ມີ ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງໄຊສະຖານ, ຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ພ້ອມດ້ວຍບໍລິສັດດັ່ງກ່າວເຂົ້າຮ່ວມ.
ພິທີເຊັນສັນຍາສົ່ງເສີມການປູກ,ເກັບຊື້ ແລະ ສ້າງຕັ້ງໂຮງງານປຸງແຕ່ງກາເຟຢູ່ເມືອງໄຊສະຖານໃນຄັ້ງນີ້ຜູ້ເຂົ້າຮ່ວມ ໄດ້ຮັບຟັງການຜ່ານຮ່າງສັນຍາການສົ່ງເສີມການປູກ, ເກັບຊື້ ແລະ ສ້າງຕັ້ງໂຮງງານປຸງແຕ່ງກາເຟ ລະຫວ່າງຫ້ອງການແຜນການ ແລະ ການລົງທຶນເມືອງ ກັບບໍລິສັດເວັນມິ່ງລີ່ ຂາອອກ-ຂາເຂົ້າ ຈໍາກັດຜູ້ດຽວ ຈາກທ່ານ ສິດທິເດດ ອຸດອນສົມ ກຳມະການພັກເມືອງ ຫົວໜ້າຫ້ອງການແຜນການ ແລະ ການລົງທຶນເມືອງ ໂດຍການສົ່ງເສີມການປູກ, ເກັບຊື້ ແລະ ສ້າງຕັ້ງໂຮງງານປຸງແຕ່ງກາເຟໃນຄັ້ງນີ້ແມ່ນກໍານົດໃນສັນຍາເປັນເວລາ 30 ປີ ເລີ່ມແຕ່ວັນທີ 1/10/2022-1/10/2053) ຊຶ່ງເປັນການລົງທຶນເຂົ້າໃສ່ກິດຈະການສົ່ງເສີມການປູກກາເຟນໍາປະຊາຊົນ ພາຍໃນ 21 ບ້ານ ແລະ ສ້າງຕັ້ງໂຮງງານປຸງແຕ່ງກາເຟຢູ່ເມືອງໄຊສະຖານ ຈຸດປະສົງໃນການລົງທຶນສົ່ງເສີມການປູກການປົກປັກຮັກສາເກັບຊື້ໝາກກາເຟ ແລະ ສ້າງຕັ້ງໂຮງງານປຸງແຕ່ງກາເຟເພື່ອໃຫ້ກາຍເປັນວັດຖຸດິບຫຼືສໍາເລັດຮູບສາມາດຈໍາໜ່າຍພາຍໃນເມືອງ, ແຂວງ, ຕ່າງແຂວງ ແລະ ສົ່ງອອກຕ່າງປະເທດ ສ່ວນຝ່າຍບໍລິສັດຈະເປັນຝ່າຍຕອບສະໜອງເບ້ຍກາເຟ ແນະນຳວິທີການດ້ານເຕັກນິກ ແລະ ຂັ້ນຕອນການບົວລະບັດຮັກສາໃຫ້ຖືກຕ້ອງຕາມຫຼັກວິຊາການ ທັງນີ້ກໍເພື່ອນໍາໃຊ້ຊັບພະຍາກອນທໍາມະຊາດ ໃຫ້ມີຄຸນຄ່າທາງດ້ານເສດຖະກິດ ຕິດພັນກັບການສົ່ງເສີມການປູກກາເຟ ເພື່ອປ້ອນໂຮງງານ ແລະ ເປັນການປະກອບສ່ວນທາງດ້ານເສດຖະກິດ-ສັງຄົມຂອງເມືອງໄຊສະຖານ ທັງຮັບປະກັນທາງດ້ານປະລິມານ ແລະ ຄຸນນະພາບຂອງກາເຟພ້ອມນັ້ນຍັງໄດມີການເຊັນສັນຍາສົ່ງເສີມການປູກ, ເກັບຊື້ ແລະ ສ້າງຕັ້ງໂຮງງານປຸງແຕ່ງກາເຟຮ່ວມກັນ ລະຫວ່າງຫ້ອງການແຜນການ ແລະ ການລົງທຶນເມືອງ ກັບ ບໍລິສັດເວັນມິ່ງລີ່ ຂາອອກ-ຂາເຂົ້າ ຈໍາກັດຜູ້ດຽວຕື່ມອີກ.ພິທີໃນຄັ້ງນີ້ຍັງໄດ້ຮັບຟັງຄໍາເຫັນຊີ້ນຳຂອງທ່ານ ສົມນຶກ ພອນວິຈິດ ຮອງເລຂາພັກເມືອງ ຕື່ມອີກ.
(ຂ່າວ: ສຸລິຍັນ ຄຳພາ ນັກຂ່າວໄຊສະຖານ)
Medialaos MMD
