ວິທະຍຸສາກົນ ແຫ່ງປະເທດຈີນ (CRI) ໄດ້ລາຍງານວ່າ: ວັນທີ 15 ກັນຍາ ຜ່ານມານີ້, ກອງປະຊຸມເວທີປຶກສາຫາລືການຮ່ວມມືສື່ມວນຊົນຄູ່ຮ່ວມອາຊຽນ ປີ 2022 ທີ່ວິທະຍຸໂທລະພາບສູນກາງຈີນ ຫລື CMG ແລະ ອົງການປົກຄອງປະຊາຊົນເຂດປົກຄອງຕົນເອງເຜົ່າຈວ້າງ ກວາງຊີຈີນ ເປັນເຈົ້າພາບໄດ້ຈັດຂຶ້ນຢູ່ນະຄອນນານນິງ ເຂດປົກຄອງຕົນເອງເຜົ່າຈວ້າງ ກວາງຊີຈີນ. ແຂກຜູ້ມີກຽດຈີນ ແລະຕ່າງປະເທດທີ່ມາຈາກສື່ມວນຊົນ ແລະອົງການຕ່າງໆຂອງ 17 ປະເທດທັງໝົດ 70 ກວ່າແຫ່ງເກືອບ 180 ທ່ານ ໄດ້ດຳເນີນການປຶກສາຫາລືຜ່ານທາງອອນລາຍ ແລະອອຟລາຍໂດຍປິ່ນອ້ອມຫົວຂໍ້ “ສະຕິປັນຍາການເຊື່ອມໂຍງເຊື່ອມຈອດກັນເຕົ້າໂຮມກຳລັງ ເພື່ອຊຸກຍູ້ການແລກປ່ຽນ ແລະການຮ່ວມມືລະຫວ່າງສື່ມວນຊົນຈີນ ແລະປະເທດສະມາຊິກອາຊຽນ ຢ່າງມີລະດັບສູງ, ກວ້າງຂວາງ ແລະເລິກເຊິ່ງກວ່າເກົ່າ, ຊ່ວຍສ້າງປະຊາຄົມຮ່ວມຊາຕາກຳ ຈີນ-ອາຊຽນ ທີ່ຍິ່ງມີຄວາມແໜ້ນແຟ້ນກວ່າເກົ່າ.
ທ່ານ ລານທ່ຽນລີ້ ປະທານອົງການປົກຄອງປະຊາຊົນເຂດປົກຄອງຕົນເອງເຜົ່າຈວ້າງກວາງຊີ, ທ່ານ ຢຽນສຽວມິງ ຮອງຜູ້ອຳນວຍການໃຫຍ່ວິທະຍຸໂທລະພາບສູນກາງຈີນ ໄດ້ເຂົ້າຮ່ວມພິທີໄຂພ້ອມທັງກ່າວຄຳປາໄສໃນພິທີໄຂກອງປະຊຸມ. ທ່ານ ເຕີ້ງຊີ່ຈຸ່ນ ເອກອັກຄະລັດຖະທູດຈີນ ປະຈຳອາຊຽນ, ທ່ານ ຄາວກິມໂຮນ ຜູ້ຊ່ວຍນາຍົກລັດຖະມົນຕີກຳປູເຈຍ, ຜູ້ສະໝັກຮັບເລືອກຕັ້ງເປັນເລຂາທິການໃຫຍ່ອາຊຽນ ໄດ້ກ່າວຄຳປາໄສຜ່ານທາງວິດີໂອ. ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີລາວ ໄດ້ເຂົ້າຮ່ວມພິທີຜ່ານທາງອອນລາຍ.
ທ່ານ ເພິງຈ້ຽນມິງ ແລະ ທ່ານນາງ ຊິງໂປ ສະມາຊິກກອງປະຊຸມບັນນາທິການຂອງວິທະຍຸໂທລະພາບສູນກາງຈີນ, ທ່ານ ອ່ານສຽວຢູ ຫົວໜ້າສູນລາຍການພາສາພາກພື້ນອາຊີ-ອາຟຣິກາ ຂອງວິທະຍຸໂທລະພາບສູນກາງຈີນ, ທ່ານ ເຮີຢີງ ຮອງຜູ້ຮຽກໂຮມວຽກງານປະຈຳການ CMG ສາຂາກວາງຊີ ໄດ້ຮ່ວມກັນເປີດການຮ່ວມມືຮອບໃໝ່ລະຫວ່າງວິທະຍຸໂທລະພາບສູນກາງຈີນ ແລະສື່ມວນຊົນອາຊຽນ. ໃນພິທີໄຂ, ວິທະຍຸໂທລະພາບສູນກາງຈີນ ແລະສື່ມວນຊົນອາຊຽນໄດ້ເລີ່ມດຳເນີນການຮ່ວມມືຮອບໃໝ່, ພ້ອມທັງໄດ້ສະເໜີໂຄງການຈຸດສຸມສອງໂຄງການຄື: ຖານອົບຮົມສ້າງເນັດໄອໂດຍຸກ Z ແລະ ສາຍດ່ວນສື່ມວນຊົນຈີນ-ອາຊຽນ.
ທ່ານ ຢຽນສຽວມິງ ຮອງຜູ້ອຳນວຍການໃຫຍ່ວິທະຍຸໂທລະພາບສູນກາງຈີນ ແລະ ທ່ານ ຮວາງຈຸ້ນຮວາ ຮອງປະທານອົງການປົກຄອງປະຊາຊົນເຂດປົກຄອງຕົນເອງເຜົ່າຈວ້າງກວາ ໄດ້ຕາງໜ້າສອງຝ່າຍເຊັນສັນຍາຂອບການຮ່ວມມືຍຸດທະສາດວິທະຍຸໂທລະພາບສູນກາງຈີນ-ອົງການປົກຄອງເຂດປົກຄອງຕົນເອງເຜົ່າຈວ້າງກວາງຊີ. ອີງຕາມສັນຍາ, ສອງຝ່າຍຈະລົງເລິກການຮ່ວມມືທາງຍຸດທະສາດ, ເພື່ອປະກອບສ່ວນອັນໃຫຍ່ຫລວງກວ່າເກົ່າເຂົ້າໃນການສ້າງປະຊາຄົມຮ່ວມຊາຕາກຳຈີນ-ອາຊຽນ ທີ່ຍິ່ງມີຄວາມແໜ້ນແຟ້ນຫລາຍຂຶ້ນກວ່າເກົ່າ. ທ່ານ ລານທ່ຽນລີ້ ປະທານເຂດປົກຄອງຕົນເອງເຜົ່າຈວ້າງກວາງຊີຈີນ ແລະ ທ່ານ ຢຽນສຽວມິງ ຮອງຜູ້ອຳນວຍການໃຫຍ່ວິທະຍຸໂທລະພາບສູນກາງຈີນ ໄດ້ຮ່ວມກັນເປີດປ້າຍໃຫ້ແກ່ສາຂາຂອງວິທະຍຸໂທລະພາບສູນກາງຈີນ ປະຈຳເຂດກວາງຊີ.
