ອົງການກາແດງແຫ່ງຊາດລາວ ໄດ້ຈັດພິທີ ສະເຫຼີມສະຫຼອງວັນປະຖົມພະຍາບານໂລກ 2022 ຂຶ້ນ ໃນວັນທີ 16 ກັນຍານີ້ ທີ່ໂຮງຮຽນມັດທະຍົມຕອນປາຍ (ມປ) ວຽງຈັນ-ໂຮ່ຈິມິນ, ນະຄອນຫຼວງວຽງຈັນ ໂດຍມີ ທ່ານ ກາວີພອນ ສຸດທິ ຫົວໜ້າຫ້ອງການອົງການກາແດງແຫ່ງຊາດລາວ, ທ່ານ ບຸນຈັນ ສີສຸກ ຜູ້ອໍານວຍການ ໂຮງຮຽນ ມປ ວຽງຈັນ-ໂຮ່ຈິມິນ, ມີພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ທ່ານ ກາວີພອນ ສຸດທິ ໄດ້ກ່າວວ່າ: ວຽກງານປະຖົມພະຍາບານ ໄດ້ຕິດພັນກັບການກໍາເນີດເກີດຂຶ້ນຂອງອົງການກາແດງສາກົນເມື່ອ 160 ປີກວ່າມາແລ້ວ ໂດຍຜ່ານເຫດການເດືອນມິຖຸນາ ປີ 1859, ວັນປະຖົມພະຍາບານໂລກ ໄດ້ຖືກກຳນົດຈາກ ສະຫະພັນກາແດງ ແລະ ຊີກວົງເດືອນແດງສາກົນ (IFRC) ແລະ ໄດ້ຈັດຕັ້ງການສະເຫຼີມສະຫຼອງ ເລີ່ມແຕ່ປີ 2000 ເປັນຕົ້ນມາ ໂດຍຖືເອົາ ວັນເສົາ ທີ 2 ຂອງເດືອນກັນຍາ ຂອງທຸກໆປີ, ຊຶ່ງປີນີ້ ແມ່ນກົງກັບວັນທີ 16 ກັນຍາ 2022. ບັນດາປະເທດສະມາຊິກ 192 ປະເທດໃນທົ່ວໂລກ ໄດ້ຈັດຕັ້ງການສະຫຼອງດ້ວຍການສາທິດ, ການເຜີຍແຜ່ວິທີການ ປະຖົມພະຍາບານໃຫ້ແກ່ຊຸມຊົນ ກໍຄືສະຖານທີ່ການຮຽນ, ການສອນ, ໂຮງຈັກໂຮງງານ, ໂຮງແຮມ ທີ່ມີຄົນເຕົ້າໂຮມກັນຢູ່ເປັນຈຳນວນຫຼາຍ ແຕ່ໃນປີນີ້ ຍ້ອນສະພາບການພະຍາດໂຄວິດ-19 ຈຶ່ງໄດ້ຈັດການສະຫຼອງ ແບບກະທັດຮັດ ໂດຍໄດ້ສາທິດວິທີປະຖົມພະຍາບານຜ່ານສື່ມວນຊົນຕ່າງໆ ອອກສູ່ສັງຄົມ.
ສະຫະພັນກາແດງ ແລະ ຊີກວົງເດືອນແດງສາກົນແມ່ນອົງກອນນໍາໜ້າຮັບຜິດຊອບການຝຶກອົບຮົມດ້ານປະຖົມພະຍາບານຢູ່ໃນໂລກ, ໃນແຕ່ລະປີ ໄດ້ຈັດຝຶກອົບຮົມວຽກງານດັ່ງກ່າວໃຫ້ແກ່ປະຊາຊົນທົ່ວໂລກ ຫຼາຍກວ່າ 20 ລ້ານຄົນ, ຊຶ່ງຈັດຕັ້ງປະຕິບັດໂດຍກາແດງແຫ່ງຊາດ ຂອງແຕ່ລະປະເທດ, ແຕ່ລະປີໄດ້ກຳນົດຄຳຂັວນທີ່ແຕກຕ່າງກັນ ເພື່ອເປັນທິດທາງ ສຳລັບປີ 2022 ການສະຫຼອງວັນປະຖົມພະຍາບານ ໂດຍພາຍໃຕ້ຄໍາຂວັນ: “ ການຮຽນຮູ້ປະຖົມພະຍາບານບໍ່ມີສິ້ນສຸດ “ Lifelong first aid Learning ” ຊື່ງມີຈຸດປະສົງເພື່ອກະຕຸ້ນ ໃຫ້ໂຮງຮຽນທຸກແຫ່ງ, ທຸກຊັ້ນ, ຊຸມຊົນຕ່າງໆ, ບ້ານ, ໂຮງຈັກ, ໂຮງງານ, ສຳນັກງານ, ອົງການ, ສະຖານທີ່ສາທາລະນະອື່ນໆ ໄດ້ໃຫ້ຄວາມສຳຄັນໃນການຝຶກອົບຮົມການປະຖົມພະຍາບານ, ເພື່ອສ້າງໃຫ້ໄດ້ ຄົນດີ, ຄົນເກັ່ງ, ດ້ານການປະຖົມພະຍາບານ ກຽມພ້ອມຊ່ວຍເຫຼືອໄດ້ທັນທີ, ມີປະສິດທິພາບໃນກໍລະນີມີເຫດສຸກເສີນເກີດຂື້ນ.
ການປະຖົມພະຍາບານ ແມ່ນວຽກງານໜຶ່ງໃນ 9 ວຽກງານຕົ້ນຕໍຂອງອົງການກາແດງແຫ່ງຊາດລາວ ເປັນວຽກມະນຸດສະທໍາທີ່ອົງການກາແດງແຫ່ງຊາດລາວ ໄດ້ປະຕິບັດມາ ເລີ່ມແຕ່ປີ 1977 ໄດ້ມີການຮ່ວມມືກັບອົງການກາແດງສາກົນ, ສ້າງເອກະສານຄູ່ມືປະຖົມພະຍາບານ, ຄູ່ມືການຝຶກອົບຮົມປະຖົມພະຍາບານຂັ້ນພື້ນຖານ, ໄດ້ສ້າງຄູຝຶກຂັ້ນແຂວງ, ຂະຫຍາຍກວມເອົາທຸກແຂວງໃນທົ່ວປະເທດ, ມາຮອດປັດຈຸບັນໄດ້ຈັດຕັ້ງການຝຶກອົບຮົມ ໃຫ້ອາສາສະໝັກຊາວໜຸ່ມ, ຄູ-ອາຈານ, ນັກຮຽນ, ນັກສຶກສາຢູ່ໂຮງຮຽນ ແລະ ສະຖາບັນຕ່າງໆທົ່ວປະເທດ ໄດ້ 924 ຄົນ ຍິງ 448 ຄົນ ແລະ ຍັງສືບຕໍ່ຈັດຝຶກອົບຮົມໃຫ້ກວ້າງຂວາງຂຶ້ນເລື້ອຍໆ.
ຂ່າວ: ນາງແສງຈັນ
