ກອງປະຊຸມຂະແໜງການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ປີ 2022 ໄດ້ຈັດຂຶ້ນໃນວັນທີ 16 ກັນຍາ ນີ້ ທີ່ສູນການຮ່ວມມືສາກົນ ແລະ ຝຶກອົບຮົມ (ICTC), ໂດຍການເປັນປະທານຮ່ວມຂອງ ທ່ານ ປະເດີມພອນ ສົນທະນີ ຮອງລົດຖະມົນຕີ ກະຊວງແຮງານ ແລະ ສະຫວັດດີການສັງຄົມ, ທ່ານ ນາງ ແຄັດເທີຣີນ ເຟືອງ ຮອງຜູ້ຕາໜ້າງໜ້າອົງການ ສປຊ ເພື່ອການພັດທະນາປະຈໍາ ສປປ ລາວ, ທ່ານ ປີເຕີ້ ເຮມ້ອນ ເອກຄັກຄະລັດຖະທູດສະຫະລັດອາເມຣິລິກາ ປະຈຳ ສປປ ລາວ ມີບັນດາຜູ້ຕາງໜ້າປະເທດຜູ້ໃຫ້ທຶນ, ທູຕານຸທູດ, ຄະນະກໍາມະການ ຄຊກລ ແລະ ຕາງໜ້າບັນດາກະຊວງຂະແໜງການທີ່ກ່ຽວຂ້ອງເຂົ້າຮ່ວມ.
ທ່ານ ປະເດີມພອນ ສົນທະນີ ກ່າວວ່າ: ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງແຫ່ງຊາດ ທີ 18 ວ່າດ້ວຍການດໍາລົງຊີວິດທີ່ປອດໄພຈາກລະເບີດບໍ່ທັນແຕກ ແລະ ຍຸດທະສາດແຫ່ງຊາດວ່າດ້ວຍການແກ້ໄຂບັນຫາລະເບີດບໍ່ທັນແຕກ “ເສັ້ນທາງກ້າວສູ່ຄວາມປອດໄພທີ III” ໄລຍະ 2021-2030 ແລະ ດໍາລັດວ່າດ້ວຍການຄຸ້ມຄອງການແກ້ໄຂບັນຫາລະເບີດບໍ່ທັນແຕກ ກໍຄືການຈັດຕັ້ງປະຕິບັດສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ທີ່ ສປປ ລາວ ໄດ້ເປັນພາຄີ.
ຜ່ານການເຄື່ອນໄຫວໃນໄລຍະ 9 ເດືອນຜ່ານມາ ຂອງປີ 2022, ສາມາດຈັດຕັ້ງປະຕິບັດບັນດາໜ້າວຽກຫຼາຍດ້ານ ເຊັ່ນ: ການໂຄສະນາສຶກສາຄວາມສ່ຽງໄພ, ການຊ່ວຍເຫຼືອຜູ້ຖືກເຄາະຮ້າຍ, ການສໍາຫຼວດ ແລະ ເກັບກູ້ ລບຕ, ການຄຸ້ມຄອງຄຸນນະພາບ, ການສ້າງຄວາມເຂັ້ມແຂງໃນການຄຸ້ມຄອງຂໍ້ມູນ, ການປັບປຸງຫຼັກສູດ ການຮຽນ-ການສອນ, ການຝຶກອົບຮົມການຈັດລຽງບຸລິມະສິດ ແລະ ປັບປຸງການປະສານງານ ເພື່ອເຮັດໃຫ້ການຄົ້ນຄວ້າບົດບັນທຶກຄວາມເຂົ້າໃຈ ເຂົ້າສູ່ລະບົບ ແລະ ໄວຂຶ້ນກວ່າເກົ່າ. ນອກຈາກນັ້ນ, ຍັງໄດ້ປັບປຸງໃໝ່ໃນການປະຊາສໍາພັນ ເພື່ອປູກຈິດສໍານຶກ ແລະ ສ້າງຄວາມເຂົ້າໃຈແກ່ ທຸກພາກສ່ວນຂອງລາວ ແລະ ຕ່າງປະເທດ ເພື່ອຍົກໃຫ້ເຫັນເຖິງອຸປະສັກ ແລະ ສິ່ງກີດຂວາງ ຈາກບັນຫາລະເບີດບໍ່ທັນແຕກທີ່ຕົກຄ້າງ ຕໍ່ກັບການພັດທະນາເສດຖະກິດ-ສັງຄົມ. ແຕ່ເຖິງແນວໃດກໍຕາມ, ກໍຍັງມີຄວາມຫຍຸ້ງຍາກໃນການເຄື່ອນໄຫວການແກ້ໄຂບັນຫາລະເບີດບໍ່ທັນແຕກ ເຊັ່ນ: ບາງແຂວງໄດ້ໂຈະການປະຕິບັດງານຊົ່ວຄາວ ຍ້ອນບັນຫາທຶນຮອນ, ການເກີດອຸບັດເຫດຈາກລະເບີດບໍ່ທັນແຕກຍັງສືບຕໍ່ເກີດຂຶ້ນ ເຮັດໃຫ້ປະຊາຊົນໄດ້ຮັບບາດເຈັບ ແລະ ເສຍຊີວິດ, ການຈັດຕັ້ງການສໍາຫຼວດ, ການເກັບກູ້, ການໂຄສະນາສຶກສາຄວາມສ່ຽງໄພ ແລະ ການຊ່ວຍເຫຼືອຜູ້ຖືກເຄາະຮ້າຍ ຍັງເປັນສິ່ງທ້າທາຍໃນການບັນລຸຄາດໝາຍສູ້ຊົນ ທີ່ໄດ້ກໍານົດໃນແຜນຍຸດທະສາດແຫ່ງຊາດ ແລະ ແຜນງານປະຈໍາປີ. ຄຽງຄູ່ກັນນີ້, ປະສິດທິພາບ ແລະ ປະສິດທິຜົນຂອງການປະຕິບັດງານ ຍັງຈໍາກັດບາງອົງການປະຕິບັດງານໄດ້ຮັບງົບປະມານຫຼາຍສົມຄວນ ແຕ່ປະສິດທິຜົນຕໍ່າ.
ກອງປະຊຸມໃນຄັ້ງນີ້ ຈະໄດ້ພ້ອມກັນຕີລາຄາຄືນ ຜົນສໍາເລັດ ແລະ ສິ່ງທ້າທາຍ ໃນການຈັດຕັ້ງປະຕິບັດໃນໄລຍະ 9 ເດືອນ ແລະ ກໍານົດແຜນວຽກບຸລິມະສິດ ສໍາລັບ 3 ເດືອນ ທ້າຍປີ 2022. ພ້ອມນີ້, ກໍເປັນໂອກາດດີທີ່ທຸກພາກສ່ວນທັງພາຍໃນ ແລະ ຕ່າງປະເທດ ຈະໄດ້ແລກປ່ຽນຂໍ້ມູນຂ່າວສານ, ບົດຮຽນທີ່ດີ ແລະ ວິທີການລະດົມທຶນ ເພື່ອຕອບສະໜອງແກ່ການແກ້ໄຂບັນຫາລະເບີດບໍ່ທັນແຕກ ຢູ່ ສປປ ລາວ, ເນື່ອງຈາກວ່າຍັງມີລະເບີດຕົກຄ້າງຫຼາຍ ເພາະນັບແຕ່ມື້ເລີ່ມຕົ້ນຈົນຮອດປັດຈຸບັນ ສາມາດຈັດຕັັ້ງປະຕິບັດໄດ້ພຽງແຕ່ 1 ເປີເຊັນເທົ່ານັ້ນ.
(ຂ່າວສານຮສສ)
