ໃນວັນທີ 11 ກັນຍາ 2022 ທີ່ຜ່ານມານີ້, ທ່ານ ຫງວຽນ ແທັງ ເຟືອງ ຮອງຫົວໜ້າທະນາຄານຮ່ວມທຸລະກິດ ລາວ-ຫວຽດ ຈໍາກັດ (LaoViet Bank) ສາຂາ ອຸດົມໄຊ ຕາງໜ້າໃຫ້ກັບພະນັກງານ Lao-VietBank ໃນທົ່ວລະບົບ ມອບວັດຖຸປັດໄຈເພື່ອຊ່ວຍເຫລືອພໍ່ແມ່ພີ່ນ້ອງປະຊາຊົນ ທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ເມືອງໄຊ ແລະ ເມືອງຫລາ ແຂວງອຸດົມໄຊ ໃນໄລຍະທີ່ຜ່ານມາ. ລວມມູນຄ່າການຊ່ວຍເຫຼືອທັງໝົດແມ່ນ 40 ລ້ານກີບ; ໃນນັ້ນ, ເມືອງຫລາ: ບ້ານໂພນໄຊ (ຫລັກ 17), ແມ່ນໄດ້ມອບເງິນຊ່ວຍເຫລືອ ຈຳນວນ 20 ລ້ານກີບ ລວມ 40 ຄອບຄົວ ແລະ ເມືອງໄຊ: ບ້ານກໍນ້ອຍ, ແມ່ນໄດ້ມອບເງິນຊ່ວຍເຫລືອຈຳນວນ 20 ລ້ານກີບ ໃຫ້ກັບ ປະຊາຊົນຈໍານວນ 46 ຄອບຄົວ.
ການປະກອບສ່ວນເພື່ອຊ່ວຍເຫລືອ ປະຊາຊົນທີ່ປະສົບໄພນໍ້າຖ້ວມຢູ່ ເເຂວງ ອຸດົມໄຊໃນຄັ້ງນີ້ ແມ່ນໄດ້ຮັບການປະສານສົມທົບ ຂອງ 03 ອົງການຈັດຕັ້ງມະຫາຊົນ ທະນາຄານຮ່ວມທຸລະກິດ ລາວ-ຫວຽດ ຈຳກັດ ທີ່ໄດ້ລະດົມພະນັກງານທົ່ວລະບົບ ຮ່ວມກັບສາຂາ ອຸດົມໄຊ ເພື່ອຊ່ວຍເຫລືອພໍ່ແມ່ປະຊາ ຊົນ ເເຂວງ ອຸດົມໄຊ ໃຫ້ສາມາດຜ່ານຜ່າຄວາມຫຍຸ້ງຍາກໃນຄັ້ງນີ້. ທັງເປັນການຊ່ວຍເຫລືອ, ເເບ່ງເບົາພາລະ ເເລະ ຄວາມເສຍຫາຍ ທີ່ເກີດຂຶ້ນຈາກໄພທຳມະຊາດ ເຊິ່ງໄດ້ສ້າງຜົນເສຍຫາຍຢ່າງໜັກໜ່ວງໃຫ້ກັບບັນ ດາພໍ່ແມ່ພີ່ນ້ອງປະຊາຊົນ ທັງສອງເມືອງ ຂອງເເຂວງ ອຸດົມໄຊ.
ໃນໂອກາດດັ່ງກ່າວ ປະຊົນຊົນທັງສອງເມືອງ ກໍໄດ້ສະແດງຄວາມຂອບໃຈຢ່າງເລິກເຊິ່ງ ມາຍັງ ທະນາຄານ ຮ່ວມທຸລະກິດ ລາວ-ຫວຽດ ຈໍາກັດ ທີ່ໄດ້ປະກອບສ່ວນຊ່ວຍເຫລືອຢ່າງທັນການ ແລະ ແທດ ເໝາະກັບສະພາບຕົວຈິງ ເພື່ອຊ່ວຍຫລຸດຜ່ອນຄວາມຫຍຸ້ງຍາກ ແລະ ຜົນກະທົບທີ່ເກີດຈາກໄພທຳມະຊາດໃນຄັ້ງນີ້.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
