ລັດຖະບານອົດສະຕຣາລີ ມອບອຸປະກອນການຜະລິດວີດີໂອ ໃຫ້ສູນໂຄສະນາຂ່າວສານ ການສຶກສາ ແລະ ກິລາ, ກະຊວງສຶກສາ ແລະ ກິລາ ໃນວັນທີ 12 ກັນຍາ 2022 ເຊິ່ງປະກອບມີ: ກ້ອງມິນເລີເລດສ໌ 1 ໜ່ວຍ ພ້ອມ ອະແດບເຕີ ແລະ ເລນ, ເຄື່ອງກັນສັ່ນໂປລ 1 ອັນ ແລະ ກ້ອງ ໂດຣນ 1 ເຄື່ອງ ແລະ ອຸປະກອນສຽງ: ໄມໂຄຣໂຟນ 1 ໜ່ວຍ, ລວມທັງອຸປະກອນໄອທີ: ໂນດບຸກ 3 ເຄື່ອງ, ຄອມພິວເຕີຕັ້ງໂຕະ 4 ເຄື່ອງ, ຊັ້ນໃສ່ຮາດດິດ 1 ຊຸດ, ລວມມູນຄ່າທັງໝົດ 36.000 ໂດລາອົດສະຕຣາລີ(ຫລືປະມານ 375 ລ້ານກີບ). ໃຫ້ກຽດມອບໂດຍທ່ານ ນາງ ແອນນາ ໄດຊັນ ເລຂາເອກສະຖານທູດອົດສະຕຣາລີ ປະຈຳ ສປປ ລາວ ແລະ ຮັບໂດຍທ່ານ ອ່ອນແກ້ວ ນວນນະວົງ ຜູ້ອຳນວຍການສະຖາບັນຄົ້ນຄ້ວາວິທະຍາສາດ ການສຶກສາ ແລະ ກິລາ.
ໂອກາດນີ້, ທ່ານ ອ່ອນແກ້ວ ນວນນະວົງ ໄດ້ກ່າວວ່າ: ໃນນາມຂອງກະຊວງສຶກສາທິການ ແລະ ກິລາ ສະແດງຄວາມຂອບໃຈມາຍັງ ລັດຖະບານອົດສະຕຣາລີ ສຳລັບການສະຫນັບສະຫນູນຢ່າງຕໍ່ເນື່ອງ ສ່ວນເຄື່ອງອຸປະກອນດັ່ງກ່າວ ແມ່ນຈະຖືກນຳໃຊ້ໂດຍສະຖາບັນຄົ້ນຄ້ວາວິທະຍາສາດ (ສວສ), ສູນໂຄສະ ນາຂ່າວສານ ການສຶກສາ ແລະ ກິລາ(ສຄຂ) ເພື່ອຜະລິດວິດີໂອ ແລະ ສາລະຄະດີ ເພື່ອສະຫນັບສະ ຫນູນການປ່ຽນແປງ ໃນການປະຕິບັດການສອນ ແລະ ການຮຽນ ສຳລັບຫລັກສູດຊັ້ນປະຖົມໃໝ່.
ຂະນະດຽວກັນ, ທ່ານ ນາງ ແອນນາ ໄດຊັນ ຊີ້ໃຫ້ເຫັນວ່າ: ອຸປະກອນທີ່ມອບໃຫ້ແກ່ສອງພາກ ສ່ວນ ໃນຄັ້ງນີ້ ແມ່ນສືບເນື່ອງມາຈາກການທີ່ ກະຊວງສຶກສາທິການ ແລະ ກິລາ ແລະ ລັດຖະບານອົດສະຕຣາລີ ໄດ້ມີການຮ່ວມມືຢ່າງແໜ້ນແຟ້ນ ໃນການພັດທະນາຂະແໜງການສຶກສາ ລວມທັງການພັດ ທະນາວຽກງານການໂຄສະນາທີ່ກວ້າງຂວາງ ກັບສູນໂຄສະນາຂ່າວສານ ການສຶກສາ ແລະ ກິລາ ເພື່ອສະໜັບສະໜູນການຈັດຕັ້ງປະຕິບັດ ຫລັກສູດຊັ້ນປະຖົມໃໝ່ໃຫ້ປະສົບຜົນສຳເລັດ.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
