ເພື່ອເຮັດໃຫ້ການນໍາໃຊ້ດິນປະເພດຕ່າງໆໄປຕາມເປົ້າໝາຍ ແລະ ການຂຸດຄົ້ນຊັບພະຍາກອນທໍາມະຊາດໃຫ້ຖືກຕ້ອງຕາມກົດໝາຍ ທັງໃຫ້ໄດ້ນໍາໃຊ້ແບບຍືນຍົງ ແລະ ບໍ່ກະທົບຕໍ່ສິ່ງແວດລ້ອມ.
ໃນ 6 ເດືອນຕົ້ນປີນີ້, ແຂວງຜົ້ງສາລີ ໄດ້ສືບຕໍ່ເອົາໃຈໃສ່ປົກປັກຮັກສາ, ຄຸ້ມຄອງ ແລະ ການນໍາໃຊ້ຊັບພະຍາກອນທໍາມະຊາດ ຕາມລະບຽບກົດໝາຍຢ່າງເຂັ້ມງວດຂຶ້ນກວ່າເກົ່າ; ໄດ້ເກັບກໍາຂຶ້ນບັນຊີດິນຂອງລັດທີ່ຂຶ້ນກັບຂະແໜງການ ແລະ ເມືອງ, ລວມທັງຂຶ້ນສໍາມະໂນທີ່ດິນ ແລະ ອອກໃບຕາດິນຂອງບ້ານ.
ມາຮອດປັດຈຸບັນນີ້, ການຂຶ້ນທະບຽນອອກປຶ້ມສໍາມະໂນທີ່ດິນໄດ້ທັງໝົດ 45.541 ຫົວ, ອອກທະບຽນໃບຕາດິນໄດ້ 17.140 ຕອນ, ສະເພາະ 6 ເດືອນຕົ້ນປີນີ້, ສາມາດອອກສໍາມະໂນທີ່ດິນທັງໝົດໄດ້ 326 ຫົວ, ເທົ່າກັບ 32,60%, ສ້າງແຜນນໍາໃຊ້ທີ່ດິນຂັ້ນບ້ານໄດ້ 5 ບ້ານ, ລະດັບກຸ່ມບ້ານໄດ້ 1 ກຸ່ມບ້ານ ແລະ ຂັ້ນເມືອງໄດ້ 1 ເມືອງ, ຂຶ້ນທະບຽນອອກໃບຕາດິນໄດ້ 1.154 ຕອນ, ເທົ່າກັບ 12,82% ຂອງແຜນການ ແລະ ສ້າງລາຍຮັບທີ່ດິນເຂົ້າງົບປະມານໄດ້ 271,95 ລ້ານກີບ; ພ້ອມກັນນັ້ນກໍໄດ້ແກ້ໄຂຂໍ້ຂັດແຍ່ງທີ່ດິນ, ແກ້ໄຂເຂດແດນເຊື່ອມຕໍ່ລະຫວ່າງແຂວງ, ເມືອງ ແລະ ລະຫວ່າງບ້ານ ໂດຍພື້ນຖານມີຄວາມສະຫງົບ ຊຶ່ງເຂດແດນລະຫວ່າງເມືອງໄດ້ແກ້ໄຂ 3 ຈຸດ ແລະ ລະຫວ່າງບ້ານມີ 11 ບ້ານ 9 ຈຸດ; ໃນນັ້ນ ຂໍ້ຂັດແຍ່ງເຂດແດນການຜະລິດຂອງປະຊາຊົນ ລະຫວ່າງ ບ້ານ ກັບ ບ້ານພາຍໃນເມືອງຍອດອູ 7 ບ້ານ 5 ຈຸດ, ເມືອງຜົ້ງສາລີ ກັບ ເມືອງຍອດອູ ມີ 2 ບ້ານ 1 ຈຸດ ແລະ ລະຫວ່າງ ເມືອງຜົ້ງສາລີ ກັບ ເມືອງບຸນເໜືອ ຈໍານວນ 3 ບ້ານ 3 ຈຸດ ແລະ ແກ້ໄຂການບຸກລຸກທີ່ດິນເຂດສະຫງວນຂອງລັດຫຼາຍກໍລະນີ; ຄຸ້ມຄອງ ແລະ ປົກປັກຮັກສາສິ່ງແວດລ້ອມ ບັນດາໂຄງການກໍາລັງສຶກສາສໍາຫຼວດ ແລະ ຂຸດຄົ້ນແຮ່ທາດຕ່າງໆໃຫ້ໄປຕາມຂັ້ນຕອນຂອງລະບຽບການຢ່າງເຂັ້ມງວດ ເພື່ອບໍ່ໃຫ້ມີຜົນກະທົບໃນໄລຍະຍາວ.
(ໂດຍ: ຕະວິນຍານ)
Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
