ພິທີເຊັນສັນຍາຮ່ວມມື ລະຫວ່າງ ທະນາຄານການຄ້າຕ່າງປະເທດລາວ ມະຫາຊົນ(ທຄຕລ) ແລະ ບໍລິສັດ ດາວທຽມລາວ ເອເຊຍ-ປາຊີຟິກ ຈຳກັດ ວ່າດ້ວຍການ ບໍລິການຊຳລະສະສາງຄ່າບໍລິການຕ່າງໆຜ່ານ ທຄຕລ (Bill Payment) ໄດ້ຈັດຂຶ້ນໃນວັນທີ 9 ກັນຍາ 2022 ໂດຍການຮ່ວມລົງນາມ ລະຫວ່າງ ທ່ານ ນາງ ສາຍສະໜອນ ຈັນທະຈັກ ຜູ້ອຳນວຍການ ທຄຕລ ແລະ ທ່ານ Mr WU FANGJIE ຜູ້ອໍານວຍການ ບໍລິສັດ ດາວທຽມລາວ ເອເຊຍ-ປາຊີຟິກ ຈຳກັດ ໂດຍມີພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.
ສັນຍາວ່າດ້ວຍການຮ່ວມມືການຊໍາລະຄ່າບໍລິການຜ່ານ Bill Payment ໃນຄັ້ງນີ້ ແມ່ນເພື່ອອໍານວຍຄວາມສະດວກຫລາຍຂຶ້ນ ໃນການຊຳລະຄ່າບໍລິການຕ່າງໆ ຂອງບໍລິສັດດາວທຽມລາວ ຜ່ານ ທຄຕລ ເພື່ອເພີ່ມຊ່ອງທາງການໃຫ້ບໍລິການລູກຄ້າຂອງ ບໍລິສັດ ດາວທຽມລາວ ເອເຊຍ-ປາຊີຟິກ ຈຳກັດ ໃຫ້ມີຫລາຍຊ່ອງທາງຂື້ນຕື່ມ ໂດຍ ທຄຕລ ຈະໃຫ້ການບໍລິການຮັບຊຳລະຄ່າບໍລິການ ຄ່າຮັບຊົມກ່ອງຮັບສັນຍານໂທລະພາບ ຜ່ານດາວທຽມລາວ (Laosat HD) ຜ່ານເຄົາເຕີບໍລິການທົ່ວລະບົບ ທຄຕລ, ຜ່ານ BCEL One ແລະ ຜ່ານ BCEL I-Bank.
ການບໍລິການຊຳລະຄ່າ ສາທາລະນຸປະໂພກ ຜ່ານລະບົບທະນາຄານ ຫລື Bill Payment ຂອງ ທຄຕລ ໄດ້ເລີ່ມໃຫ້ບໍລິການທຳອິດໃນປີ 2012 ແລະ ເປັນບໍລິການທີ່ໄດ້ມີການຊົມໃຊ້ຫລາຍ, ມາຮອດປັດຈຸບັນ, ທຄຕລ ໄດ້ໃຫ້ບໍລິການ Bill
Payment ຮ່ວມກັບ 54 ພາກສ່ວນ ໃນນັ້ນ, ປະກອບມີການໃຫ້ບໍລິການຊຳລະຄ່າ ສາທາລະນຸປະໂພກພື້ນຖານ ເຊັ່ນ: ຊຳລະຄ່າໄຟຟ້າ, ນໍ້າປະປາ, ຄ່າໂທລະສັບ, ຄ່າພາສີອາກອນ, ຄ່າສາຍເຊົ່າ, ບັດນໍ້າມັນ, ຄ່າບັດຂ້າມຂົວມິດຕະພາບ ລາວ-ໄທ ແຫ່ງທີ່ 1 ແລະ ຊຳລະຄ່າງວດເຊົ່າສິນເຊື່ອ ເຊິ່ງການບໍລິການ Bill Payment ໄດ້ພັດທະນາໃຫ້ສາມາດຊຳລະຜ່ານຫລາຍຊ່ອງທາງຄື: ຜ່ານ BCEL One, i-Bank ແລະ ຜ່ານປ່ອງບໍລິການ ທຄຕລ, ທະນາຄານການຄ້າຕ່າງປະເທດລາວມະຫາຊົນ ເຊື່ອໝັ້ນວ່າ ຖ້າຂະຫຍາຍການຊຳລະແບບເອເລັກໂຕຣນິກ ອອກໄປໃຫ້ກວ້າງຂວາງເທົ່າໃດ ກໍຈະເປັນການສ້າງເງື່ອນໄຂອຳນວຍຄວາມສະດວກ ໃຫ້ລູກຄ້າຂອງທະນາຄານໃນທີ່ຊົມໃຊ້ ການບໍລິການທີ່ຫລາກຫລາຍຂຶ້ນເທົ່ານັ້ນ.
ຂ່າວ-ພາບ: ກິດຕາ
