ວັນທີ 5 ກັນຍາ ຜ່ານມາ, ທ່ານ ນາງ ສູນທອນ ໄຊຍະຈັກ ເລຂາທິ ການສູນກາງພັກ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ(ສສຊ)ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ພ້ອມດ້ວຍສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນອງ ລົງເຜີຍແຜ່ຜົນສຳເລັດ ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງ ຊຸດທີ II ແລະ ພົບປະຜູ້ມີສິດເລືອກຕັ້ງ ຢູ່ເຂດໂຮງຮຽນປະຖົມສົມບູນນາກອງ ເຂດບ້ານຕຳລວງ ເມືອງນອງ. ພ້ອມທັງໄດ້ຮັບຟັງລາຍງານໂດຍຫຍໍ້ຈາກຜູ້ຕາງໜ້າ 7 ບ້ານ ເຂດຕຳລວງ ກ່ຽວກັບການພັດທະນາເສດຖະກິດ-ສັງຄົມ ຮອບດ້ານຂອງກຸ່ມບ້ານດັ່ງກ່າວ.
ໂອກາດນີ້, ທ່ານຮອງປະມານສະພາແຫ່ງຊາດ ໄດ້ມີຄຳເຫັນໂອ້ລົມ ແລະ ຮຽກ ຮ້ອງໃຫ້ປະຊາຊົນ ເອົາໃຈໃສ່ໃນການສ້າງເສດຖະກິດຄອບຄົວ ເພື່ອໃຫ້ຫລຸດພົ້ນອອກຈາກຄວາມທຸກຍາກ, ຊາວໜຸ່ມໃຫ້ຫ່າງໄກຢາເສບຕິດ, ສ້າງທ່າແຮງປູກພືດ, ເຮັດຫັດຖະກຳ ເຊັ່ນ: ກ້ວຍ, ມັນຕົ້ນ, ຕໍ່າຫູກທໍໄໝ ໃຫ້ກາຍເປັນສິນຄ້າໜຶ່ງຜະລິດຕະພັນຂອງ ແລະ ໃຫ້ປະຊາຊົນຫັນມານຳໃຊ້ວິດຖ່າຍ ເພື່ອບໍ່ໃຫ້ເກີດພະຍາດຕິດແປດ, ພ້ອມທັງຈະຊຸກຍູ້ໃຫ້ ສະ ພາແຫ່ງຊາດ ລົງເຄື່ອນໄຫວຕິດຕາມກວດກາ ໃຫ້ເປັນປົກກະຕິ ເພື່ອພັດທະນາໂຄງລ່າງຂອງບ້ານໃຫ້ຫລາຍຂຶ້ນ. ນອກຈາກນັ້ນ, ທ່ານຍັງໄດ້ນໍາເອົາເນື້ອໃນສໍາຄັນຂອງກອງປະຊຸມ ໃນການຮັບຮອງເອົາການປັບປຸງຄະນະລັດຖະບານ, ແຜນພັດທະນາເສດຖະ ກິດ-ສັງຄົມ, ງົບປະມານແຫ່ງລັດ, ເງິນຕາ ມາເຜີຍແຜ່ໃຫ້ປະຊາຊົນຮັບຮູ້ ແລະ ເຂົ້າໃຈ ແລະ ຂໍໃຫ້ສາມັກຄີກັບ ພັກ-ລັດຖະບານ ບໍ່ໃຫ້ມີປາກົດການຫຍໍ້ທໍ້ໃນບ້ານຂອງຕົນ ເພື່ອສ້າງຄອບຄົວໃຫ້ມີຄວາມຮັ່ງມີ ປະເທດຊາດກໍຈະຫລຸດພົ້ນອອກຈາກຄວາມທຸກຍາກ.
ພ້ອມກັນນັ້ນ, ຄະນະຜູ້ແທນ ຍັງໄດ້ຮັບຟັງຄຳສະເໜີຂອງປະຊາຊົນ ແລະ ມອບເຄື່ອງອຸປະກອນການສຶກສາ ປະກອບມີ: ປຶ້ມ, ບິກ, ສໍ, ກະເປົາ ແລະ ອຸປະກອນກິລາຈຳນວນໜຶ່ງ ໃຫ້ກັບໂຮງຮຽນປະຖົມສົມບູນນາກອງ ເຂດບ້ານຕໍາລວງ.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
