ທ່ານ ຫງວຽນ ຊວານ ຟຸກ ປະທານປະ ເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ໄດ້ໃຫ້ກຽດຕອບສຳພາດຕໍ່ສື່ມວນຊົນ ໃນວັນທີ 5 ກັນຍາ 2022 ທີ່ນະຄອນຫລວງຮ່າ ໂນ້ຍ ເນື່ອງໃນໂອກາດ ວັນສ້າງຕັ້ງສາຍພົວພັນການທູດ ຫວຽດ ນາມ-ລາວ ຄົບຮອບ 60 ປີ(05 ກັນຍາ 1962–05 ກັນຍາ 2022).
ຄຳຖາມທີ 1: ຂໍໃຫ້ທ່ານປະທານປະເທດ ຕີລາຄາກ່ຽວກັບຄວາມສຳຄັນ ແລະ ຄວາມໝາຍຂອງ ສາຍພົວພັນມິດຕະ ພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດ ນາມ-ລາວ?
ຄໍາຕອບ: ຫວຽດນາມ ແລະ ລາວ ເປັນສອງປະເທດບ້ານໃກ້ເຮືອນຄຽງ ທີ່ສະໜິດສະໜົມ ປຽບເໝືອນອ້າຍນ້ອງຮ່ວມອຸທອນດຽວກັນ, ຫ່າງກັນພຽງສາຍພູດຽວເທົ່ານັ້ນ, ຮ່ວມສາຍ ແມ່ນ້ຳຂອງ, ມີສາຍພົວພັນອັນເປັນມູນເຊື້ອ ແລະ ຕິດພັນກັນມາຍາວນານ. ປະຊາຊົນສອງປະເທດ ໄດ້ປຽບເໝືອນອ້າຍນ້ອງໃນຄອບຄົວດຽວກັນ, ໄດ້ມີການບິແບ່ງ, ສະໜັບສະໜູນ ແລະ ຊ່ວຍເຫລືອເຊິ່ງກັນ ແລະ ກັນ ຢ່າງເປັນປົກກະຕິ ໃນທຸກສະຖານະການ.
ຈາກຄວາມສາມັກຄີອັນເນື່ອງມາຈາກເງື່ອນໄຂທາງທຳມະຊາດ ກໍຄືທາງດ້ານ ປະຫວັດສາດຂອງປະຊາຊົນສອງປະເທດ ເພື່ອຈຸດມຸ່ງໝາຍອັນດຽວກັນ ນັ້ນຄືຍາດເອົາເອກະລາດ, ເສລີ ພາບ ມາໃຫ້ປະ ເທດຊາດ ແລະພາຍໃຕ້ການນຳພາຂອງພັກກອມມູນິດອິນດູຈີນເຊິ່ງເປັນຕົ້ນກໍາເນີດຂອງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ ໃນປັດຈຸບັນ.ດ້ວຍເຈດຈໍານົງການປະຕິວັດອັນເດັດດ່ຽວ, ປະຊາຊົນຫວຽດນາມ ແລະ ລາວໄດ້ລຸກຮືຂຶ້ນຕໍ່ສູ້ຍຶດເອົາອຳນາດການປົກຄອງໃນປີ 1945, ສະຖາປະນາສາທາລະນະລັດ ປະຊາທິປະໄຕ ຫວຽດນາມ ໃນວັນທີ 2/9/1945 ແລະ ລັດຖະບານ ລາວ ອິດສະຫລະ ໃນວັນທີ 12/10/1945.
ໄຊຊະນະອັນສະຫງ່າລາສີຂອງການປະຕິວັດລາວ ເວົ້າສະເພາະການຮ່ວມສໍາພັນສູ້ຮົບ ຫວຽດ ນາມ-ລາວ ໃນຊຸມປີຕໍ່ມາໄດ້ກ້າວໄປສູ່ການລົງນາມໃນສົນທິສັນຍາເຈນີວາ ກ່ຽວກັບປະເທດລາວ ໃນ ວັນທີ 23 ກໍລະກົດ 1962 ໄດ້ຮັບຮູ້ເຖິງຄວາມເປັນເອກະລາດ, ອະທິປະໄຕ ແລະ ຜືນແຜ່ນດິນ ອັນ ຄົບຖ້ວນຂອງລາວ.
ພຽງແຕ່ສອງເດືອນຕໍ່ມາຫວຽດນາມ ແລະ ລາວ ໄດ້ສ້າງຕັ້ງສາຍພົວພັນທາງ ການທູດຢ່າງເປັນທາງການ ໃນວັນທີ 5/9/1962. ນີ້ແມ່ນຂີດໝາຍແຫ່ງການພັດທະນາໃໝ່ ຂອງການພົວພັນລະຫວ່າງສອງປະເທດໃນຍຸກສະໄໝໃໝ່. ນັບແຕ່ນັ້ນເປັນຕົ້ນມາ, ການຮ່ວມສໍາພັນສູ້ຮົບຂອງກອງທັບ ແລະ ປະຊາຊົນສອງປະ ເທດ ຫວຽດນາມ-ລາວ ໄດ້ຮັບການຮັດແໜ້ນນັບມື້ນັບແໜ້ນແຟ້ນຂຶ້ນ, ທັງດ້ານການທະຫານ ແລະ ການທູດ. ນ້ຳໃຈ ຄວາມສາມັກຄີອັນສະໜິດຕິດແໜ້ນ “ເຂົ້າເມັດຫັກ, ພັກເສັ້ນໜຶ່ງກໍແບ່ງກັນກິນ” ໄດ້ນຳພາການປະຕິວັດຂອງສອງປະເທດ ຍາດໄດ້ໄຊຊະນະ ຈາກໄຊຊະນະນີ້ໄປສູ່ໄຊຊະນະອື່ນ ຊຶ່ງໄຊຊະນະອັນພົ້ນເດັ່ນ ແລະ ມີຄວາມໝາຍເປັນປະຫວັດຊາດ ແມ່ນໄຊ ຊະນະ ໃນລະດູບານໃໝ່ 30 ເມສາ 1975 ຢູ່ປະເທດ ຫວຽດນາມ ແລະ ໄຊຊະນະ ວັນທີ 2 ທັນວາ 1975 ທີ່ປະເທດລາວ.
ກ້າວເຂົ້າສູ່ໄລຍະໃໝ່, ຢືນຢູ່ຕໍ່ໜ້າບັນດາຄວາມຮຽກຮ້ອງຕ້ອງການ ແລະ ສິ່ງທ້າທາຍຕ່າງໆ ຂອງພາລະກິດແຫ່ງການສ້າງສາ ແລະ ພັດທະນາ ຢູ່ແຕ່ລະປະ ເທດ, ບົນພື້ນຖານຄວາມຮັບຮູ້ຢ່າງເລິກເຊິ່ງ ກ່ຽວກັບຄວາມໝາຍ ແລະ ຄວາມສຳຄັນ ຂອງສາຍພົວພັນແບບພິເສດ ຫວຽດນາມ-ລາວ, ສອງຝ່າຍໄດ້ລົງນາມສົນທິສັນຍາມິດຕະພາບ ແລະ ການຮ່ວມມືໃນວັນທີ 18 ກໍລະກົດ 1977, ນີ້ ເປັນການຢືນຢັນຄວາມສາມັກຄີອັນໜັກແໜ້ນ ແລະ ຄຳໝັ້ນສັນຍາ ອັນແຂງແຮງໃນການຮ່ວມມື, ສະ ໜັບສະໜູນ ແລະ ການຊ່ວຍເຫລືອ ເຊິ່ງກັນ ແລະ ກັນ ໃນພາລະກິດແຫ່ງການສ້າງສາ ແລະ ປົກປັກຮັກສາຄວາມເປັນເອກະລາດ, ອະທິປະ ໄຕ ແລະ ຜືນແຜ່ນດິນອັນຄົບຖ້ວນຂອງແຕ່ລະປະເທດ.
ໃນຕະຫລອດ 45 ປີຜ່ານມາ, ສົນທິສັນ ຍາສະບັບດັ່ງກ່າວໄດ້ກາຍເປັນຊັບສິນອັນລ້ຳຄ່າ ແລະ ມີຄວາມໝາຍຄວາມສໍາຄັນເປັນຢ່າງຍິ່ງ, ເປັນພື້ນຖານດ້ານນິຕິກໍາທີ່ໝັ້ນຄົງ ເພື່ອໃຫ້ສອງປະເທດສືບຕໍ່ເສີມຂະຫຍາຍສາຍພົວພັນມິດຕະພາບແບບພິເສດ ແລະ ການຮ່ວມມືຮອບດ້ານ. ສົນທິສັນຍາ ຍັງເປັນ ປະຖົມປັດໄຈ ເພື່ອໃຫ້ສອງປະເທດລົງນາມໃນບັນດາເອກະສານ ແລະ ສັນຍາຮ່ວມມືຕ່າງໆ ໃນຂົງເຂດການເມືອງ, ການຕ່າງປະເທດ, ປ້ອງກັນຊາດ, ປ້ອງກັນຄວາມສະຫງົບ, ເສດຖະກິດ, ການຄ້າ, ການລົງທຶນ, ການສຶກສາ ແລະ ບຳລຸງສ້າງ. ສາມາດເວົ້າໄດ້ວ່າ ການພົວພັນແບບພິເສດລະຫວ່າງຫວຽດນາມ-ລາວ ໄດ້ຮັບການກໍ່ຕັ້ງໂດຍການນຳຜູ້ຍິ່ງໃຫຍ່ຂອງສອງຊາດ ຄື: ປະທານ ໂຮ່ຈິມິນ, ປະ ທານໄກສອນ ພົມວິຫານ ແລະ ປະທານ ສຸພານຸວົງ, ໄດ້ຮັບການຖະນຸຖະໜອມ ແລະ ເພີ່ມພູນ ຄູນ ສ້າງ ດ້ວຍເລືອດເນື້ອເຫື່ອແຮງຂອງການນຳ, ທະຫານ ແລະ ປະຊາຊົນ ສອງປະເທດຮຸ່ນຕ່າງໆ ແລະນັບມື້ໄດ້ຮັບການປັບປຸງ, ພັດທະນາຢ່າງບໍ່ຢຸດຢັ້ງ ແລະ ໄດ້ກາຍເປັນແວ່ນແຍງອັນເປັນແບບຢ່າງທີ່ບໍລິສຸດຜຸດຜ່ອງ, ໃສແຈ້ງ, ໝັ້ນຄົງ, “ມີໜຶ່ງດຽວໃນໂລກ” ໃນການພົວພັນລະຫວ່າງບັນດາປະເທດ.
ປະຫວັດສາດອັນໃກ້ຊິດຂອງສອງປະເທດ ໄດ້ພິສູດໃຫ້ເຫັນວ່າ: ຖ້າບໍ່ມີການພົວພັນຮ່ວມສໍາ ພັນສູ້ຮົບ ແລະ ຄວາມສາມັກຄີແບບພິເສດລະຫວ່າງ ຫວຽດນາມ-ລາວ, ພາລະກິດແຫ່ງການຕໍ່ສູ້ປົດປ່ອຍຊາດຂອງສອງປະເທດກ່ອນໜ້ານີ້ ອາດຈະບໍ່ສາມາດບັນລຸໄຊຊະນະຢ່າງຄົບຖ້ວນໄດ້, ພາລະ ກິດແຫ່ງການປົກປັກຮັກສາປະເທດຊາດ ແລະ ສ້າງສາປະເທດ ໃນໄລຍະແຫ່ງການປ່ຽນແປງໃໝ່ ແລະ ເຊື່ອມໂຍງຢູ່ແຕ່ລະປະເທດ, ແມ່ນບໍ່ສາມາດບັນລຸບັນດາໝາກຜົນ ອັນໃຫຍ່ຫລວງຄືດັ່ງປັດຈຸບັນໄດ້.
ຄຳຖາມທີ 2: ຂໍໃຫ້ທ່ານປະທານປະເທດ ຊີ້ໃຫ້ເຫັນກ່ຽວກັບບັນດາໝາກຜົນອັນພົ້ນເດັ່ນ ທີ່ສຸດໃນການ ພົວພັນລະຫວ່າງສອງປະເທດ ແລະ ຈຸດພົ້ນເດັ່ນໃນໄລຍະມໍ່ໆມານີ້?
ຄໍາຕອບ: ໃນໄລຍະເວລາ 60 ປີ ຜ່ານມາ, ເຖິງແມ່ນວ່າສະພາບການຂອງໂລກ ແລະ ພາກ ພື້ນພວມມີການຜັນແປຢ່າງສັບສົນ, ບັນດາຂໍ້ສະດວກ ແລະ ສິ່ງທ້າທາຍ ສະ ຫລັບສັບຊ້ອນກັນ, ແຕ່ ສາມາດຢັ້ງຢືນໄດ້ວ່າການພັວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມື ຮອບດ້ານ ຫວຽດນາມ-ລາວ ໄດ້ມີການພັດທະນາທີ່ແໜ້ນແຟ້ນຢ່າງບໍ່ຢຸດຢັ້ງ, ນັບມື້ນັບເລິກເຊິ່ງ ກວ້າງຂວາງ, ແທ້ຈິງ ແລະ ມີປະສິດທິຜົນ.
ການພົວພັນດ້ານການເມືອງ-ການຕ່າງປະເທດ ນັບມື້ນັບສະໜິດສະໜົມ, ໃກ້ ຊິດ ດ້ວຍການ ແລກປ່ຽນຄະນະ, ການພົບປະຂັ້ນສູງຢ່າງເປັນປົກກະຕິ. ສອງຝ່າຍພະຍາຍາມຮັກສາ ແລະ, ເສີມຂະ ຫຍາຍຢ່າງມີປະສິດທິຜົນບັນດາກົນໄກທະວິພາຄີ ໃນທຸກຂະແໜງການ, ທ້ອງ ຖິ່ນ, ສົມທົບກັນຜັນຂະ ຫຍາຍເປັນຢ່າງດີບັນດາຂໍ້ຕົກລົງຂັ້ນສູງ ແລະ ແຕ່ລະຂັ້ນ. ການສົມທົບອັນແໜ້ນແຟ້ນ ແລະ ສະ ໜັບ ສະໜູນ ເຊິ່ງກັນ ແລະ ກັນ ໃນເວທີຫລາຍຝ່າຍ ໄດ້ປະກອບສ່ວນເຂົ້າໃນການປົກປ້ອງຜົນປະໂຫຍດ, ຍົກສູງອິດທິພົນ ແລະ ຖານະບົດບາດຂອງສອງປະເທດໃນ ພາກພື້ນ ແລະ ໃນໂລກ.
ການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ ໄດ້ຮັບການຍູ້ແຮງຢ່າງບໍ່ຢຸດຢັ້ງ, ສືບຕໍ່ເປັນໜຶ່ງໃນບັນດາເສົາຄ້ຳທີ່ສຳຄັນໃນສາຍພົວພັນພິເສດ ຫວຽດ ນາມ-ລາວ, ປະກອບສ່ວນຮັບປະ ກັນຄວາມເປັນເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງແຕ່ລະປະເທດ ກໍຄື ສະ ພາບແວດລ້ອມແຫ່ງສັນຕິພາບ, ສະຖຽນລະພາບ ເພື່ອຮັບໃຊ້ການພັດທະນາ ແລະ ການຮ່ວມມື.
ການຮ່ວມມືດ້ານເສດຖະກິດ ບັນລຸໄດ້ຕາມເປົ້າຫມາຍ ແລະ ໄດ້ຮັບຜົນສຳເລັດ ຢ່າງຕັ້ງໜ້າ ຊຶ່ງນຳເອົາຜົນປະໂຫຍດອັນແທ້ຈິງໃຫ້ແກ່ປະຊາຊົນ ແລະ ນັກທຸລະກິດຂອງສອງຝ່າຍ, ການແລກ ປ່ຽນການຄ້າສອງສົ້ນໃນມໍ່ໆມານີ້ມີການຂະຫຍາຍຕົວຢ່າງຕໍ່ເນື່ອງໃນແຕ່ລະປີຢູ່ໃນ ລະດັບສອງໂຕ ເລກ; ມູນຄ່າການຄ້າສອງສົ້ນ 8 ເດືອນຕົ້ນປີ 2022 ບັນລຸໄດ້ 1 ຕື້ກວ່າໂດລາສະຫະລັດ, ເພີ່ມຂຶ້ນ ກວ່າ 20% ເມື່ອທຽບໃສ່ໄລຍະດຽວກັນຂອງປີກາຍນີ້. ຫວຽດນາມ ຍາມໃດກໍເປັນປະເທດທີ່ມີການ ລົງທຶນຢູ່ລາວໃຫຍ່ໃນອັນດັບທີສາມ ໂດຍມີໂຄງການ FDI ຈໍານວນ 200 ກວ່າໂຄງການ ກໍາລັງ ຈັດຕັ້ງປະຕິບັດ ແລະ ມີຍອດມູນຄ່າການລົງທຶນຈໍານວນ 5 ຕື້ກວ່າໂດລາສະ ຫະລັດ.
ການຮ່ວມມືດ້ານສຶກສາ-ກໍ່ສ້າງ ແມ່ນການຮ່ວມມືຍຸດທະສາດ ໄປຕາມທິດສຸມໃສ່ຄຸນນະພາບ ສູງ ໃນບັນດາຂົງເຂດຕ່າງໆເຊັ່ນ ພະລັງງານ, ຄົມມະນາຄົມ, ວັດ ທະນາທຳ, ສາທາລະນະສຸກແລະ ອື່ນໆ ໄດ້ຮັບການປັບປຸງເຂົ້າສູ່ລວງເລິກຢ່າງບໍ່ຢຸດຢັ້ງ. ການຮ່ວມມືລະຫວ່າງບັນດາທ້ອງຖິ່ນ ໂດຍ ສະເພາະແມ່ນ ບັນດາທ້ອງຖິ່ນທີ່ມີຊາຍແດນຕິດຈອດກັນ, ນັບມື້ນັບສະໜິດຕິດພັນຢ່າງໜັກແໜ້ນ. ເຖິງວ່າຍັງມີບັນດາຂໍ້ຂາດຕົກບົກພ່ອງ, ແຕ່ມາຮອດປັດຈຸບັນນີ້, ໄດ້ມີໂຄງການຊ່ວຍເຫລືອພັດທະນາ ODA ນັບເປັນພັນໂຄງການ, ບັນດາໂຄງການຮ່ວມມື, ບ້ວງເງິນຊ່ວຍເຫລືອຂອງບັນດາກະຊວງ, ອົງ ການ, ທ້ອງຖິ່ນຫວຽດນາມ ທີ່ໄດ້ຮັບການກໍ່ສ້າງ, ຜັນຂະຫຍາຍ ແລະ ເສີມຂະ ຫຍາຍປະສິດທິຜົນ ເພື່ອຊ່ວຍເຫລືອປະ ເທດເພື່ອນບ້ານລາວໃນເວລາປະເຊີນໜ້າກັບພະຍາດ ໂຄວິດ-19, ສອງຝ່າຍໄດ້ຊ່ວຍເຫລືອ ເຊິ່ງກັນ ແລະ ກັນ ຢ່າງທັນການ, ມີປະສິດທິຜົນທາງດ້ານການເງິນ, ອຸປະກອນການແພດ, ສົ່ງທີມງານມາຊ່ວຍເຫລືອ ຕ້ານ ແລະ ສະກັດກັ້ນການແຜ່ລະບາດຂອງພະຍາດ ໂດຍຈິດໃຈເອື້ອເຟື້ອຊ່ວຍເຫລືອ ແລະ ຢູ່ຄຽງຂ້າງກັນໃນທຸກໆສະພາບການ. ໂຄງການຫໍສະພາແຫ່ງຊາດລາວ ຫລັງໃໝ່ ຊຶ່ງເປັນຂອງຂວັນ ຈາກພັກ, ລັດ ແລະ ປະຊາຊົນຫວຽດນາມ ໃຫ້ແກ່ ພັກ, ລັດ ແລະ ປະ ຊາຊົນລາວ ທີ່ໄດ້ມອບ-ຮັບ ແລະ ເປີດນຳໃຊ້ໃນປີ 2021 ໄດ້ກາຍເປັນໜຶ່ງໃນບັນດາສັນຍາລັກ ຂອງສາຍພົວພັນພິເສດ ຫວຽດ-ລາວໃນໄລຍະໃໝ່. ການທີ່ທ່າ ເຮືອສາກົນ ລາວ-ຫວຽດ ຢູ່ຫວຸງອ໋າງ, ແຂວງຮ່າຕິງ ຈະເລີ່ມນຳໃຊ້ໃນ ເວລາມໍ່ໆນີ້ ໄດ້ປະກອບສ່ວນຊ່ວຍໃຫ້ປະເທດເພື່ອນບ້ານລາວ ມີທາງອອກສູ່ທະເລ.
ພ້ອມດຽວກັນນັ້ນ, ບັນດາໂຄງການຮ່ວມມືທີ່ມີສັນຍາລັກຂອງນ້ຳໃຈມິຕະພາບ ຫວຽດ-ລາວ ພວມນັບມື້ປະກົດຕົວ ຢູ່ ຫລາຍແຫ່ງໃນປະເທດດອກຈຳປາອັນສວຍງາມ. ພົ້ນເດັ່ນໃນຫັ້ນ ແມ່ນບໍລິສັດຮ່ວມທຸລະກິດ ໂທລະ ຄົມມະນາຄົມ Unitel (Viettel) ທີ່ເລີ່ມດຳເນີນທຸລະ ກິດຕັ້ງແຕ່ ປີ 2009, ປັດຈຸບັນນີ້ ເປັນບໍລິສັດ ສະໜອງເຄື່ອຂ່າຍອິນເຕີເນັດທີ່ທັນສະໃໝ ແລະ ໃຫຍ່ທີ່ສຸດ, ສະໜອງໄດ້ 57% ຂອງຕະຫລາດ ຢູ່ ລາວ.
ຄຳຖາມທີ 3: ທ່ານ ປະທານປະເທດ ຢາກເຫັນການພົວພັນຮ່ວມມືຮອບດ້ານ ລະ ຫວ່າງ ຫວຽດນາມ ແລະ ລາວໃນໄລຍະຕໍ່ໜ້າ ຈະພັດທະນາເປັນແນວໃດ?
ຄໍາຕອບ: ສ່ວນຕົວຂ້າພະເຈົ້າຢູ່ໃນຖານະຕຳແໜ່ງຕ່າງໆ ທີ່ໄດ້ມີຄວາມສະໜິດຕິດພັນ ແລະ ປະກອບສ່ວນ ເຂົ້າໃນການພັດ ທະນາຂອງການພົວພັນຮ່ວມມື ຫວຽດ- ລາວ ເປັນເວລາຫລາຍປີມາ ແລ້ວ. ດ້ວຍຄວາມຮັກແພງອັນດູດດື່ມທີ່ມີຕໍ່ປະເທດລາວ ອ້າຍນ້ອງ ແລະ ການພົວພັນສອງປະເທດ, ຂ້າພະເຈົ້າຍາມໃດກໍມຸ່ງຫວັງ ແລະ ເຊື່ອໝັ້ນວ່າ ສາຍພົວພັນມິດຕະ ພາບອັນຍິ່ງໃຫຍ່, ຄວາມສາມັກ ຄີພິເສດ ແລະ ການຮ່ວມມືຮອບດ້ານ ຈະສືບຕໍ່ໃຫ້ບັນດາການນຳ ແລະ ປະຊາຊົນ ສອງປະເທດຮຸ່ນ ຕ່າງໆຈະສືບຕໍ່ ພັັດທະນາ ແລະ ເພີ່ມພູນຄູນສ້າງ ໃຫ້ແຕກດອກອອກຜົນ, ນໍາເອົາຜົນປະໂຫຍດໃຫ້ແກ່ປະຊາຊົນສອງປະເທດ.
ດ້ວຍພື້ນຖານການພົວພັນອັນໝັ້ນແກ່ນ ຊຶ່ງໄດ້ຜ່ານພາການທົດສອບ, ຫວຽດນາມ ແລະ ລາວ ມີຂໍ້ສະດວກ ແລະ ຄວາມສາມາດ ບົ່ມຊ້ອນອັນໃຫຍ່ຫລວງຫລາຍປະການ ເພື່ອຍູ້ແຮງຂະໜາດການຮ່ວມ ມື. ສິ່ງເຫລົ່ານັ້ນ ຮຽກຮ້ອງໃຫ້ສອງຝ່າຍຕ້ອງມີຄວາມຕັດສິນໃຈສູງ, ມານະພະຍາຍາມຢ່າງແຮງ, ຍົກສູງປະສິດທິຜົນການຮ່ວມມື ໃນຕໍ່ໜ້າ:
ໜຶ່ງ: ສືບທອດມູນເຊື້ອການປະຕິວັດ ອັນພິລະອົງອາດ ຂອງຄົນຮຸ່ນກ່ອນ, ຮ່ວມ ກັນປົກປັກຮັກສາ, ປັບປຸງເສົາຄ້ຳການພົວພັນດ້ານການເມືອງຢ່າງບໍ່ຢຸດຢັ້ງ ເພື່ອກຳນົດທິດລວມຂອງສາຍພົວພັນມິດ ຕະພາບ ຫວຽດ-ລາວ ບົນພື້ນຖານໝູນໃຊ້ຢ່າງມີຫົວຄິດປະດິດສ້າງ ລັດທິມາກ- ເລນິນ, ແນວຄິດ ໂຮ່ຈິມິນ ແລະ ແນວຄິດ ໄກສອນ ພົມວິຫານ.
ສອງ: ມານະພະຍາຍາມຍົກລະດັບການຮ່ວມມື ດ້ານເສດຖະກິດກາຍເປັນເສົາຄ້ຳ ໃຫ້ສົມຄູ່ກັບການພົວພັນ ຫວຽດ-ລາວ, ມີຈິນຕະນາການຮ່ວມມືໃໝ່ ໂດຍມີບັນດາມາດຕະການ, ມີການບຸກທະລຸ, ທັງເສີມຂະຫຍາຍກຳລັງແຮງພາຍໃນ, ທັງເປີດກ້ວາງການຮ່ວມມືສາກົນ. ກໍ່ສ້າງພື້ນຖານເສດຖະກິດຂອງລາວ ໃຫ້ມີຄວາມເປັນເອກະລາດເປັນເຈົ້າຕົນເອງ, ເຊື່ອມໂຍງເຂົ້າກັບສາກົນ. ຈຸດສຸມແມ່ນການຊຸກຍູ້ການຮ່ວມມືດ້ານການຄ້າ, ການລົງທຶນ, ການດໍາເນີນທຸລະກິດ, ເປີດກ້ວາງການເຊື່ອມຕໍ່ດ້ານພະ ລັງງານ, ໂທລະຄົມມະນາຄົມ, ການຄົມມະນາຄົມ, ຫັນການຂົນສົ່ງສິນຄ້າຂອງລາວອອກຜ່ານທາງ ທະເລ ຫວຽດນາມ ໄປສາກົນ; ເອົາໃຈໃສ່ ແລະ ແກ້ໄຂຢ່າງທັນການບັນດາຄວາມຫຍຸ້ງຍາກ, ຂໍ້ຄົງ ຄ້າງໃຫ້ແກ່ວິສາຫະກິດ.
ສາມ: ບົນພື້ນຖານການພົວພັນດ້ານການເມືອງທີ່ໜ້າເຊື່ອຖື, ສືບຕໍ່ປັບປຸງເສົາຄ້ຳການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ ເພື່ອຮ່ວມກັນປົກປັກຮັກສາສະພາບແວດລ້ອມ ສັນຕິພາບ, ສະຖຽນລະພາບທາງການເມືອງ, ປົກປັກຮັກສາເອກະລາດ, ອະທິປະໄຕ, ສະກັດກັ້ນຢ່າງທັນການທຸກ ກົນອຸບາຍ “ຫັນປ່ຽນໂດຍສັນຕິ”, ມ້າງເພທຳລາຍ, ກໍ່ຄວາມແບ່ງແຍກການພົວພັນສອງປະເທດ.
ສີ່: ສອງຝ່າຍສືບຕໍ່ຖືເອົາວຽກງານສຶກສາບຳລຸງສ້າງ, ພັດທະນາແຫລ່ງຊັບພະຍາ ກອນມະນຸດ ເປັນຂົງເຂດຮ່ວມມືຍຸດ ທະສາດ, ມີລັກສະນະ “ບຸກທະລຸ”, ບໍ່ພຽງແຕ່ຮັບໃຊ້ ຄວາມຕ້ອງການພັດທະນາຂອງແຕ່ລະປະເທດເທົ່ານັ້ນ, ແຕ່ຮາກຍັງເປັນການປະກອບສ່ວນເຂົ້າໃນການຮັກແໜ້ນຄວາມຮັກແພງ ອັນສະໜິດສະໜົມ ແລະ ຄວາມສາມັກຄີລະຫວ່າງສອງປະເທດ; ປະສານສົມທົບກັນຢ່າງແໜ້ນແຟ້ນ ໃຫ້ຫລາຍກ່ວາເກົ່າອີກ ເພື່ອຍົກສູງຄຸນນະ ພາບຂອງການຄັດເລືອກນັກຮຽນ, ການສິດສອນ ແລະ ຮ່ຳຮຽນ ແນໃສ່ຕອບສະໜອງຄວາມຕ້ອງການຂອງຕະຫລາດແຮງງານຂອງລາວ ໃຫ້ດີກວ່າເກົ່າ.
ສຸດທ້າຍ, ສອງຝ່າຍຍູ້ແຮງການໂຄສະນາສຶກສາອົບຮົມ ກ່ຽວກັບມູນເຊື້ອການພົວພັນມິດຕະ ພາບພິເສດ ແລະ ການຮ່ວມມືຮອບດ້ານຂອງສອງປະເທດ, ດ້ວຍຫລາຍຮູບຫລາຍແບບ, ແທດ ເຫມາະກັບຕົວຈິງ, ມີປະສິດທິຜົນຕິດພັນກັບບັນດາໝາກຜົນ ການຮ່ວມມືລະອຽດໃນຊີວິດ ເພື່ອໃຫ້ປະຊາຊົນທຸກຊັ້ນຄົນ ເປັນຕົ້ນແມ່ນຄົນຮຸ່ນໜຸ່ມສອງປະເທດ, ມີຄວາມໄວ້ເນື້ອເຊື່ອໃຈກ່ວາເກົ່າອີກ, ຮ່ວມແຮງຮ່ວມໃຈປົກປັກຮັກສາ, ເພີ່ມພູນຄູນສ້າງພັດທະນາ ແລະ ເຮັດໃຫ້ການພົວພັນມິດຕະພາບມູນເຊືື້ອລະຫວ່າງສອງປະ ເທດອັນສວຍງາມ.
ໃນບັນຍາກາດອັນເບີກບານມ່ວນຊື່ນຂອງ “ປີສາມັກຄີມິດຕະພາບຫວຽດ ນາມ- ລາວ; ລາວ- ຫວຽດນາມ 2022” ແລະ ການສະເຫລີມສະຫລອງ ວັນສ້າງຕັ້ງສາຍພົວພັນທາງການທູດ ຄົບຮອບ 60 ປີ ລະ ຫວ່າງສອງປະເທດ, ພວກເຮົາເຊື່ອ ໝັ້ນຢ່າງໜັກແໜ້ນວ່າ ພາຍໃຕ້ການນຳພາອັນສະຫລາດສ່ອງໃສຂອງພັກກອມມູນິດ ຫວຽດນາມ ແລະ ພັກປະຊາຊົນ ປະຕິວັດລາວ ອ້າຍນ້ອງ, ສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ ຈະສືບຕໍ່ໄດ້ຮັບການປັບປຸງ ແລະ ຂຶ້ນສູ່ລະດັບສູງໃໝ່, ພັດທະນາເປັນເຈົ້າຕົນ ເອງ, ວັດທະນາຖາວອນ ເພື່ອປະຊາຊົນສອງປະເທດ, ປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ.
