ທ່ານ Khalil Al Mohannadi ປະທານສະຫະພັນກິລາປິ່ງປ່ອງອາຊີ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ທ່ານ ສຈ.ປອ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ພ້ອມຕີລາຄາສູງຕໍ່ການພັດທະນາກິລາປິ່ງປ່ອງລາວ ມີການເຕີບໃຫຍ່ຂະຫຍາຍຕົວຢ່າງກວ້າງຂວາງ ແລະ ຍັງຢືນຢັນຈະໃຫ້ການສະໜັບສະໜູນການພັດທະນາວົງການກິລາປິ່ງປ່ອງລາວ ຢ່າງເຕັມທີ່ ໂດຍສະເພາະການຈັດຝຶກອົບຮົມຄູຝຶກ ແລະ ຝຶກອົບຮົມດ້ານການບໍລິຫານການຈັດການດ້ານວຽກງານຕ່າງໆໃນໄວໆນີ້.
ໃນຕອນເຊົ້າວັນທີ 5 ກັນຍາ 2022 ທີ່ສຳນັກງານນາຍົກລັດຖະມົນຕີ, ທ່ານ ສຈ.ປອ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ທ່ານ Khalil Al Mohannadi ປະທານສະຫະພັນກິລາປິ່ງປ່ອງອາຊີ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຢ່າງເປັນທາງການ ພ້ອມເຂົ້າຮ່ວມຊົມການແຂ່ງຂັນງານກິລາປິ່ງປ່ອງຊີງແຊ໋ມເຍົາວະຊົນ-ຊາວໜຸ່ມອາຊີ ຄັ້ງທີ 26 ທີ່ສປປ ລາວ ຮັບກຽດເປັນເຈົ້າພາບ ລະຫວ່າງວັນທີ 1-6 ກັນຍາ 2022 ໂດຍມີ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ນາງ ແສງເດືອນ ຫຼ້າຈັນທະບູນ ປະທານສະຫະພັນປິ່ງປ່ອງແຫ່ງຊາດລາວ ພ້ອມດ້ວຍຄະນະ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ສຈ.ປອ ກິແກ້ວ ໄຂຄຳພິທູນ ກໍໄດ້ກ່າວສະແດງຄວາມຕ້ອນຮັບຢ່າງອົບອຸ່ນຕໍ່ການມາຢ້ຽມຢາມ ສປປ ລາວ ຂອງ ທ່ານ Khalil Al Mohannadi ປະທານສະຫະພັນກິລາປິ່ງປ່ອງ ອາຊີ ພ້ອມດ້ວຍຄະນະ ສະນັ້ນ, ຕາງໜ້າລັດຖະບານ ສປປ ລາວ ຂໍສະແດງຄວາມຂອບໃຈເປັນຢ່າງສູງມາຍັງສະຫະພັນກິລາປິ່ງປ່ອງອາຊີ ທີ່ໄດ້ໃຫ້ການສະໜັບສະໜູນຢ່າງແຂງແຮງເຮັດໃຫ້ ສປປ ລາວ ໄດ້ຮັບມອບໝາຍເປັນເຈົ້າພາບ ຈັດແຂ່ງຂັນກິລາປິ່ງປ່ອງຊີງແຊ໋ມເຍົາວະຊົນ-ໄວໜຸ່ມອາຊີ ຄັ້ງທີ 26 ແລະ ໄດ້ໄຂຂຶ້ນຢ່າງມີຜົນສຳເລັດຈົບງາມ. ແນວໃດກໍດີ, ທາງລັດຖະບານລາວ ແມ່ນໄດ້ໃຫ້ຄວາມສຳຄັນ ແລະ ເອົາໃຈໃສ່ຕໍ່ການພັດທະນາກິລາໄປຕາມທິດທາງທີ່ໄດ້ກຳນົດໄວ້ ແລະ ໄດ້ໃຫ້ກະຊວງສຶກສາທິການ ແລະ ກິລາ ເປັນຜູ້ຊີ້ນຳນຳພາການພັດທະນາເປັນຕົ້ນຕໍ ແລະ ໜຶ່ງໃນກິລາຕ່າງໆທີ່ໄດ້ຈັດການແຂ່ງຂັນຢ່າງຕໍ່ເນື່ອງນັ້ນ ກໍແມ່ນກິລາປິ່ງປ່ອງ ແລະ ການຈັດແຂ່ງຂັນໃນຄັ້ງນີ້ ກໍໄດ້ຮັບຜົນສຳເລັດຫຼາຍດ້ານ ເປັນຕົ້ນແມ່ນນັກກິລາໄດ້ຮັບການພັດທະນາທາງດ້ານສີມື, ດ້ານເຕັກນິກຈັດການແຂ່ງຂັນ ແລະ ອື່ນໆ ໂດຍສະເພາະໄດ້ເພີ່ມພູນຄວາມສາມັກຄີຄວາມເຂົ້າອົກເຂົ້າໃຈກັນຂອງບັນດາປະເທດທີ່ຢູ່ອ້ອມຂ້າງໂດຍສະເພາະແມ່ນອາຊີຂອງພວກເຮົາ. ແນວໃດກໍດີ, ຕໍ່ການສະໜັບສະໜູນຢ່າງແຂງແຮງຂອງສະຫະພັນປິ່ງປ່ອງອາຊີ ເຊື່ອໝັ້ນວ່າໃນໂອກາດຕໍ່ໄປທາງສປປ ລາວ ຈະສາມາດທີ່ຈະກ້າວຂຶ້ນບວກກັບປະສົບການທີ່ຮັບກ້າວຂຶ້ນເພື່ອຈັດແຂ່ງຂັນທີ່ສູງກວ່າເກົ່າໄດ້ຢ່າງມີປະສິດທິພາບ.
ໂອກາດດຽວກັນ, ທ່ານ Khalil Al Mohannadi ກ່າວວ່າ: ຮູ້ສຶກດີໃຈຫຼາຍທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຕາມການເຊື້ອເຊີນຂອງທ່ານປະທານສະຫະພັນປິ່ງປ່ອງແຫ່ງຊາດລາວ ເພື່ອເຂົ້າຮ່ວມການແຂ່ງຂັນປິ່ງປ່ອງຊີງແຊ໋ມເຍົາວະຊົນ-ໄວໜຸ່ມອາຊີ ຄັ້ງທີ 26 ຊຶ່ງລາຍການນີ້ ເປັນໜຶ່ງໂຄງການທີ່ສະຫະພັນປິ່ງປ່ອງອາຊີ ໄດ້ປຶກສາຫາລື ແລະ ຢາກໃຫ້ ສປປ ລາວ ເປັນເຈົ້າພາບ ເພື່ອເປັນການແຂ່ງຂັນມີຄວາມສຳຄັນຈະເຮັດໃຫ້ກິລາປິ່ງປ່ອງລາວ ກ້າວຂຶ້ນໃນລະດັບສາກົນ ໃນອະນາຄົດ. ແນວໃດກໍຕາມ, ພວກເຮົາຈະສືບຕໍ່ໄດ້ມີການສະໜັບສະໜູນໃຫ້ມີການແຂ່ງຂັນເກີດຂຶ້ນອີກ ໃນຝ່າຍຂອງ ເອທີທີຢູ ພ້ອມທັງຢືນຢັນຈະໃຫ້ການສະໜັບສະໜູນການພັດທະນາວົງການກິລາປິ່ງປ່ອງລາວ ຢ່າງເຕັມທີ່ ໂດຍສະເພາະຈະຈັດການຝຶກອົບຮົມຄູຝຶກ ແລະ ຝຶກອົບຮົມດ້ານການບໍລິຫານການຈັດການດ້ານວຽກງານຕ່າງໆໃນໄວໆນີ້.
ໂດຍ: ສົງການ ພັນແພງດີ
