ພະອາຈານ ບຸນນໍາ ທໍາມະວົງ ຄະນະບໍລິຫານງານປະຈໍາ ອົງການພຸດທະສາສະໜາສຳພັນລາວ (ອພສ) ແຂວງ ປະທານ ອພສ ເມືອງຫ້ວຍຊາຍ ເຈົ້າອະທິການວັດປ່າອ້ອຍມະນີວັນ ພ້ອມດ້ວຍພະສົງສາມະເນນ ໄດ້ນຳເອົາເຄື່ອງອຸປະໂພກ, ບໍລິໂພກ, ໄປມອບໃຫ້ແກ່ ຄ້າຍຄຸ້ມຂັງ-ດັດສ້າງ ແຂວງບໍ່ແກ້ວ ຫວ່າງບໍ່ດົນມານີ້ ຊຶ່ງປະກອບມີ ນ້ຳດື່ມ, ກາເຟ, ໂອວັນຕິນ, ໝີ່ສຳເລັດຮູບ, ໄຂ່ໄກ່, ປາກະປ່ອງ, ເຂົ້າສານ, ໝໍ້ຫຸງເຂົ້າ ແລະ ອຸປະກອນປ້ອງກັນພະຍາດໂຄວິດ-19 ຈໍານວນໜຶ່ງ ລວມມູນຄ່າທັງໝົດ ເກືອບ 8 ລ້ານກີບ ເພື່ອເປັນການຊຸກຍູ້ນໍ້າໃຈຂອງເຈົ້າໜ້າທີ່ອ້າຍ-ນ້ອງຕຳຫຼວດ ທີ່ປະຕິບັດໜ້າ ໃນການປ້ອງກັນບໍ່ໃຫ້ຜູ້ກະທຳຜິດໄດ້ເຄື່ອນໄຫວສ້າງຄວາມບໍ່ສະຫງົບຕໍ່ສັງຄົມ ແລະ ເປັນການໃຫ້ກຳລັງໃຈໃຫ້ຜູ້ຕ້ອງຫາ, ຜູ້ຖືກໂທດ ໄດ້ມີຈິດສຳນຶກ, ປ່ຽນແປງຕົນເອງປະພຶດແຕ່ສິ່ງທີ່ດີ, ສ້າງຊີວິດໃຫ້ມີຄ່າ ແລະ ກັບມາເປັນຄົນດີຂອງຄອບຄົວ, ສັງຄົມໃນຕໍ່ໜ້າ.
ກ່າວຮັບເຄື່ອງດັ່ງກ່າວ, ໂດຍ ທ່ານ ພັທ ສົມລອງ ພົມມະສັກ ຫົວໜ້າຄ້າຍຄຸ້ມຂັງ-ດັດສ້າງ ແຂວງ ພ້ອມຄະນະ ແລະ ເຈົ້າໜ້າທີ່ອ້າຍນ້ອງຕຳຫຼວດ ເຂົ້າຮ່ວມ ພ້ອມສະແດງຄວາມຂອບໃຈ ມາຍັງເຈົ້າອະທິການວັດປ່າອ້ອຍມະນີວັນ ພ້ອມດ້ວຍພະສົງສາມະເນນ ທີ່ເຫັນໄດ້ຄວາມສຳຄັນຕໍ່ຄວາມຫຍຸ້ງຍາກຂາດເຂີນ.
Medialaos MMD (ແຫູ່ງຂໍ້ມູນຈາກ: ໜັງສືພິມ ປະຊາຊົນ)
