ໃນໂອກາດເຄື່ອນໄຫວຢ້ຽມຢາມ ສສ ຫວຽດນາມ ຊຶ່ງນຳໂດຍ ທ່ານ ສະຫວັນຄອນ ລາຊະມຸນຕີ ປະທານສະມາຄົມນັກຂ່າວ ແຫ່ງ ສປປ ລາວ ພ້ອມຄະນະ ເມື່ອທ້າຍເດືອນສິງຫາທີ່ຜ່ານມາ ແລະ ມີໂອກາດໄດ້ໄປຢ້ຽມຢາມ ເຮັດວຽກຮ່ວມກັບສະມາຄົມນັກຂ່າວ ນະຄອນຮາຍຟອງ ທີ່ນະຄອນຮາຍຟອງ.
ໃນໂອກາດດັ່ງກ່າວ, ທ່ານ ສະຫວັນຄອນ ລາຊະມຸນຕີ ໄດ້ໃຫ້ສຳພາດຕໍ່ສື່ມວນຊົນນະຄອນຮາຍຟອງ ມີບາງຕອນສຳຄັນວ່າ: ການມາຢ້ຽມຢາມສະມາຄົມນັກຂ່າວນະຄອນຮາຍຟອງ ສສ ຫວຽດນາມ ໃນຄັ້ງນີ້ ເປັນປີທີ່ມີຄວາມໝາຍສຳຄັນ ລະຫວ່າງ ລາວ ແລະ ຫວຽດນາມ ເພາະເປັນປີຄົບຮອບ 45 ປີ ການເຊັນສົນທິສັນຍາມິດຕະພາບການຮ່ວມມືລະຫວ່າງ ລາວ-ຫວຽດນາມ ແລະ ເປັນປີຄົບຮອບ 60 ປີ ການເຊັນສັນຍາການພົວພັນການທູດ ລະຫວ່າງ ລາວ ແລະ ຫວຽດນາມ. ດັ່ງນັ້ນ, ຂ້າພະເຈົ້າເຫັນວ່າຕະ ຫລອດໄລຍະຜ່ານມາ ການພົວພັນຮ່ວມມື ສອງປະເທດນັບມື້ນັບເຕີບໃຫຍ່ເຂັ້ມແຂງ ນັບມື້ເກີດດອກອອກຜົນ ສະແດງອອກໃນການຮ່ວມມືໃນທຸກດ້ານ ນັບແຕ່ລະດັບການນຳຂັ້ນສູງສຸດຂອງພັກ-ລັດຖະບານ, ລະ ດັບທ້ອງຖິ່ນ ປະຊາຊົນລາວ ແລະ ປະຊາຊົນ ຫວຽດນາມ ລ້ວນແລ້ວແຕ່ໄດ້ຊົມໃຊ້ໝາກຜົນຂອງຄວາມສາມັກຄີອັນພິເສດທີ່ຫາຍາກ ແລະ ໄດ້ຊົມໃຊ້ໝາກຜົນຂອງການຮ່ວມມືໃນການສ້າງສາພັດທະນາ ເຮັດໃຫ້ຊີວິດການເປັນຢູ່ນັບມື້ມີຄຸນນະພາບສູງຂຶ້ນ. ພ້ອມນັ້ນ, ລາວ-ຫວຽດນາມ ໄດ້ມີການແລກປ່ຽນຄວາມຮູ້ທຸກດ້ານ ໂດຍສະເພາະນັກສຶກສາລາວ, ພະນັກງານລາວ ໄດ້ມາສຶກສາຄົ້ນຄວ້າຮ່ຳຮຽນຢູ່ ສສ ຫວຽດນາມ ແລະ ນະຄອນອື່ນໆ. ຂ້າພະເຈົ້າຕີລາຄາສູງທີ່ສຸດ ໃນການສ້າງບຸກຄະລາກອນໃນທຸກຂັ້ນ ມີທັງຂັ້ນການນຳ, ຂັ້ນວິຊາການ ແລະ ມີຄວາມເພິ່ງພໍໃຈຕໍ່ການເຕີບໃຫຍ່ຂະຫຍາຍຕົວ, ມີຄວາມເຂັ້ມແຂງໜັກແໜ້ນໃນການພົວພັນຮ່ວມມື ລາວ-ຫວຽດນາມ.
ປະທານສະມາຄົມນັກຂ່າວ ແຫ່ງ ສປປ ລາວ ກ່າວຕື່ມວ່າ: ໃນນາມສື່ມວນຊົນ ຄືດັ່ງທີ່ພວກເຮົາຮູ້ນຳກັນແລ້ວວ່າ ໜ້າທີ່ພາລະກິດຂອງພວກເຮົາຍັງແມ່ນສືບຕໍ່ເພີ່ມທະວີ ສົ່ງກະຈາຍຂໍ້ມູນທຸກການເຄື່ອນ ໄຫວ, ທຸກການຮ່ວມມືການພົວພັນລະຫວ່າງ ລາວ-ຫວຽດນາມ ເພື່ອໃຫ້ທຸກຊັ້ນຄົນສ່ວນຫລວງຫລາຍ ໄດ້ມີຂໍ້ມູນຂ່າວສານທີ່ຖືກຕ້ອງຊັດເຈນຕົວຈິງ ໝາຍເຖິງໝາກຜົນທີ່ເກີດຂຶ້ນຈາກການພົວພັນຮ່ວມມື ແລະ ມີແຕ່ສື່ມວນຊົນເທົ່ານັ້ນ ຈະເປັນຜູ້ຕອບສະໜອງແກ່ສັງຄົມ.
ແນວໃດກໍຕາມ ຍັງມີສິ່ງທ້າທາຍທີ່ສຸດສຳລັບສື່ມວນຊົນພວກເຮົາ ຈະເວົ້າ, ຈະຂຽນແນວໃດໃນເວລາສັ້ນໆ ແຕ່ໃຫ້ຜູ້ອ່ານ-ຜູ້ຟັງ-ຜູ້ເບິ່ງ ໄດ້ເຂົ້າໃຈຄວາມເປັນຈິງ ໄດ້ຮັບໝາກຜົນການຮ່ວມມືກັນ ແລະ ໃນອະນາຄົດຈະຮ່ວມມືກັນສະໜັບສະໜູນກັນແນວໃດ ສື່ມວນຊົນຈະຕ້ອງໄດ້ເຮັດໃຫ້ປະຊາຊົນມີຄວາມເຂົ້າໃຈ. ທັງໝົດນີ້ ກໍຍັງແມ່ນໜ້າທີ່ຂອງສື່ມວນຊົນພວກເຮົາຈະຕ້ອງໃຫ້ປະຊາຊົນເຂົ້າຮ່ວມຕໍ່ການພັດທະນາ, ການຮ່ວມມືຕ້ອງມີທຸກຊັ້ນຄົນປະຊາຊົນເຂົ້າຮ່ວມ ໃນການຜັນຂະຫຍາຍແນວທາງນະໂຍບາຍຕ່າງໆຂອງພັກ ແລະ ລັດຖະບານ.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
