ທ່ານຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ກະຊວງສຶກສາທິການ ແລະ ກິລາ ຫຼື ສສກ ໄດ້ມີຄຳເຫັນແນະນຳໃຫ້ຜູ້ບໍລິຫານການສຶກສາ ແລະ ກິລາ ທຸກຂັ້ນ, ພະນັກງານ, ຄູ-ອາຈານ ແລະ ນັກຮຽນ-ນັກສຶກສາທຸກຄົນ ສືບຕໍ່ຕິດຕາມເຝົ້າລະວັງ ແລະ ປ້ອງກັນການແຜ່ລະບາດຂອງພະຍາດໂຄວິດ-19 (COVID-19) ຢ່າງໃກ້ຊິດ ເຖິງວ່າການແຜ່ລະບາດຈະຜ່ອນລົງແລ້ວກໍຕາມ ແລະ ໃຫ້ສືບຕໍ່ຈັດຕັ້ງປະຕິບັດມາດຕະການປ້ອງກັນຂັ້ນພື້ນຖານ ທີ່ຂະແໜງສາທາລະນະສຸກ ແລະ ຄະນະສະເພາະກິດຂັ້ນກະຊວງສຶກສາທິການ ແລະ ກິລາ ວາງອອກຢ່າງເຂັ້ມງວດ.
ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ທັງເປັນຫົວໜ້າຄະນະສະເພາະກິດຂັ້ນ ກະຊວງ ສສກ ໃຫ້ກ່າວມີຄຳເຫັນຕໍ່ພິທີໄຂສົກຮຽນໃໝ່ ສົກຮຽນ 2022-2023 ຊຶ່ງຈັດຂຶ້ນແບບເຊິ່ງໜ້າ ແລະ ອອນລາຍ ເມື່ອຕອນເຊົ້າວັນທີ 01 ກັນຍາ 2022 ທີ່ກະຊວງ ສສກ (ເຂດຊຽງຍືນ), ໂດຍພາຍໃຕ້ການເປັນປະທານຂອງ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ໃຫ້ຮູ້ວ່າ: ເພື່ອເປັນການສືບຕໍ່ເພີ່ມທະວີມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ໂຄວິດ-19 (COVID-19) ທົ່ວຂະແໜງການສຶກສາ ແລະ ກິລາ ໃນຂອບເຂດທົ່ວປະເທດ, ຄະນະສະເພາະກິດ ກະຊວງສຶກສາທິການ ແລະ ກິລາ ມີບາງຄໍາແນະນໍາບາງອັນ ເຊັ່ນ: ໃຫ້ຜູ້ບໍລິຫານການສຶກສາ ແລະ ກິລາ ທຸກຂັ້ນ, ພະນັກງານ, ຄູ-ອາຈານ ແລະ ນັກຮຽນ-ນັກສຶກສາທຸກຄົນ ສືບຕໍ່ຕິດຕາມເຝົ້າລະວັງ ແລະ ປ້ອງກັນການແຜ່ລະບາດຂອງພະຍາດ COVID-19 ເຖິງວ່າການແຜ່ລະບາດຈະຜ່ອນລົງແລ້ວກໍຕາມ ແຕ່ບໍ່ໃຫ້ລະເຫຼີງ ແລະ ໃຫ້ສືບຕໍ່ຈັດຕັ້ງປະຕິບັດມາດຕະການປ້ອງກັນຂັ້ນພື້ນຖານ ທີ່ຂະແໜງສາທາລະນະສຸກ ແລະ ຄະນະສະເພາະກິດຂັ້ນກະຊວງສຶກສາທິການ ແລະ ກິລາ ວາງອອກຢ່າງເຂັ້ມງວດ; ໃຫ້ສະຖານການສຶກສາກ່ອນໄວຮຽນ, ສາມັນສຶກສາ, ການສຶກສານອກໂຮງຮຽນ, ການສຶກສາຮຽນຮ່ວມ, ການສຶກສາສົງ, ການສຶກສາຄູ, ພະລະ ແລະ ສິລະປະສຶກສາ, ອາຊີວະສຶກສາ ແລະ ການສຶກສາຊັ້ນສູງ ທັງພາກລັດ ແລະ ເອກະຊົນ ດໍາເນີນການຈັດການຮຽນການສອນ ແບບເຊິ່ງໜ້າ ແຕ່ໃຫ້ສືບຕໍ່ປະຕິບັດມາດຕະການປ້ອງກັນ, ຄວບຄມການແຜ່ລະບາດຂອງພະຍາດໂຄວິດ-19 ຂອງຄະນະສະເພາະກິດວາງອອກ ເພື່ອຮັບປະກັນຄວາມປອດໄພໃນສະຖານການສຶກສາ ແຕ່ຖ້າຫາກວ່າພົບກໍລະນີບຸກຄົນ, ນັກຮຽນ-ນັກສຶກສາ, ຄູ-ອາຈານ, ພະນັກງານ ຕິດເຊື້ອໃນສະຖານການສຶກສາ ໃຫ້ສະເພາະຜູ້ກ່ຽວພັກຮຽນ-ພັກການເພື່ອປິ່ນປົວ ແລະ ຮຽນ ຫຼື ເຮັດວຽກຢູ່ບ້ານ ຫຼື ຜ່ານລະບົບທາງໄກ ທີ່ເໝາະສົມ. ກໍລະນີຫາກພົບຜູ້ຕິດເຊື້ອຈໍານວນຫຼາຍ ໃນຫ້ອງຮຽນ ຫຼື ໃນໂຮງຮຽນ ໃຫ້ຜູ້ບໍລິຫານສະຖານການສຶກສາ ແລະ ກິລາ ປະສານກັບຄະນະສະເພາະກິດໃນຂັ້ນຂອງຕົນ ເພື່ອປະເມີນສະພາບຄວາມສ່ຽງ ແລະ ພິຈາລະນາຮ່ວມກັນວ່າ ຄວນສືບຕໍ່ເປີດການຮຽນການສອນ ຫຼື ໂຈະການຮຽນການສອນ ແບບເຊິ່ງໜ້າຊົ່ວຄາວ ເປັນແຕ່ລະຫ້ອງຮຽນ ຫຼື ໝົດໂຮງຮຽນ ເພື່ອຄວາມປອດໄພ ແລະ ສອດຄ່ອງກັບມາດຕະການປ້ອງກັນພະຍາດ COVID-19 ທີ່ຄະນະສະເພາະກິດສູນກາງ ແລະ ທ້ອງຖິ່ນວາງອອກ.
ພ້ອມນັ້ນ, ກໍໃຫ້ຜູ້ບໍລິຫານການສຶກສາ ແລະ ກິລາ ທຸກຂັ້ນສືບຕໍ່ປຸກລະດົມ, ໂຄສະນາເຜີຍແຜ່ ແລະ ຊີ້ແຈງອະທິບາຍໃຫ້ ພະນັກງານ, ຄູ-ອາຈານ, ພໍ່ແມ່ຜູ້ປົກຄອງ ແລະ ນັກຮຽນ-ນັກສຶກສາ ເຂົ້າໃຈເຖິງຄວາມຈໍາເປັນ ແລະ ຄວາມສໍາຄັນໃນການສັກຢາວັກຊີນປ້ອງກັນພະຍາດ COVID-19 ແລະ ພ້ອມກັນໄປຮັບການສັກຢາວັກຊີນກັນພະຍາດ COVID-19 ໃຫ້ຄົບໂດດ ຕາມແຜນສັກຢາຂອງຂະແໜງສາທາລະນະສຸກ; ມອບໃຫ້ພະແນກສຶກສາທິການ ແລະ ກິລາແຂວງ/ນະຄອນຫຼວງ ສັງລວມກຸ່ມເປົ້າໝາຍນັກຮຽນອາຍຸ 6-11 ປີ ແລະ ນັກຮຽນອາຍຸ 12 ປີ ຂຶ້ນໄປ ທີ່ຍັງບໍ່ໄດ້ຮັບວັກຊີນຜ່ານມາ ເພື່ອປະສານໃຫ້ຂະແໜງສາທາລະນະສຸກໄປສັກວັກຊີນໃຫ້ ຫຼື ໄປຮັບການສັກວັກຊີນຕາມຈຸດບໍລິການຂອງຂະແໜງສາທາລະນະສຸກ; ກ່ອນເຂົ້າໂຮງຮຽນ ຄູ-ອາຈານ ຕ້ອງເກັບກໍາສະຖິຕິຈໍານວນນັກຮຽນທີ່ໄດ້ຮັບວັກຊີນ ພາຍຫຼັງສໍາເລັດແລ້ວໃຫ້ລາຍງານກະຊວງສຶກສາທິການ ແລະ ກິລາ ຮັບຊາບ ໃນອາທິດທີ 2 ຂອງເດືອນກັນຍາ 2022; ສໍາລັບການຈັດກອງປະຊຸມ, ສໍາມະນາ, ປາຖະກະຖາ, ຝຶກອົບຮົມຕ່າງໆຢູ່ສະຖານທີ່ຕ່າງໆ ໃນຮູບແບບເຊິ່ງໜ້າ, ຕ້ອງປະຕິບັດມາດຕະການປ້ອງກັນພະຍາດ COVID-19 ເຊັ່ນ: ວັດແທກອຸນຫະພູມ, ຮັກສາໄລຍະຫ່າງ 01 ແມັດຂຶ້ນໄປ, ໃສ່ຜ້າອັດປາກ-ດັງຕະຫຼອດເວລາ, ລ້າງມືດ້ວຍນໍ້າສະອາດໃສ່ສະບູ ຫຼື ເຈວລ້າງມື ເປັນປົກກະຕິ ຖ້າຜູ້ໃດມີອາການບໍ່ສະບາຍ ຄ້າຍຄືເປັນຫວັດ ຫຼື ເປັນໄຂ້ ແມ່ນບໍ່ໃຫ້ເຂົ້າຮ່ວມກອງປະຊຸມຮູບແບບເຊິ່ງໜ້າ ໃຫ້ເຂົ້າທາງອອນລາຍແທນ.
ຄຽງຄູ່ກັນນັ້ນ, ກໍໃຫ້ບັນດາສູນກິລາໃນຮົ່ມ, ກິລາກາງແຈ້ງ ໃນເມືອງ/ນະຄອນ ແລະ ແຂວງ ສືບຕໍ່ຈັດຕັ້ງປະຕິບັດມາດຕະການປ້ອງກັນພະຍາດ COVID-19 ຢ່າງເຂັ້ມງວດ ເປັນຕົ້ນ: ພະນັກງານ ແລະ ຜູ້ມາໃຊ້ບໍລິການຕ້ອງໄດ້ຮັບການສັກຢາວັກຊີນປ້ອງກັນພະຍາດ COVID-19 ຄົບໂດດ, ວັດແທກອຸນຫະພູມ, ຮັກສາໄລຍະຫ່າງ 1 ແມັດຂຶ້ນໄປ, ໃສ່ຜ້າອັດປາກ-ດັງ ແລະ ລ້າງມືດ້ວຍນໍ້າສະອາດໃສ່ສະບູ ຫຼື ເຈວລ້າງມື ເປັນປົກກະຕິ.
ຂ່າວໂດຍ: ລູກນ້ຳເຊ ອິນທະດາລິນ
ພາບຈາກ: ສູນຂ່າວສານການແພດສຸຂະສຶກສາ
