ທ່ານປະທານສະຫະພັນກິລາປິ່ງປ່ອງແຫ່ງຊາດລາວ ເຊື່ອໝັ້ນວ່າ ການເປັນເຈົ້າພາບ ຈັດງານແຂ່ງຂັນກິລາປິ່ງປ່ອງຊີງແຊ໋ມເຍົາວະຊົນ-ໄວໜຸ່ມອາຊີ ຄັ້ງທີ 26 ຂອງສປປ ລາວເຮົາ ຈະສາມາດສ້າງປະສົບການສູງໃຫ້ນັກກິລາປິ່ງປ່ອງລາວ ເພື່ອຕໍ່ຍອດໃນການພັດທະນາຕົນເອງ ກ້າວສູ່ຜົນສຳເລັດໃນອະນາຄົດ ໄດ້ຢ່າງແນ່ນອນ.
ທ່ານ ນາງ ແສງເດືອນ ຫຼ້າຈັນທະບູນ ອະດີດລັດຖະມົນຕີ ກະຊວງສຶກສາທິການ ແລະ ກິລາ ທັງເປັນປະທານສະຫະພັນກິລາປິ່ງປ່ອງແຫ່ງຊາດລາວ ໃຫ້ສຳພາດວ່າ: ການແຂ່ງຂັນກິລາປິ່ງປ່ອງຊີງແຊ໋ມເຍົາວະຊົນ-ໄວໜຸ່ມອາຊີ ຄັ້ງທີ 26 ທີ່ ສປປ ລາວ ຮັບກຽດເປັນເຈົ້າພາບ ໃນຄັ້ງນີ້ ກໍເພື່ອເຮັດໃຫ້ນັກກິລາປິ່ງປ່ອງລາວ ໄດ້ມີການພັດທະນາກ້າວຂຶ້ນໄປອີກລະດັບໜຶ່ງ ຖ້າທຽບໃສ່ນັກກິລາຈາກຊາດອື່ນແລ້ວ ກໍຖືວ່ານັກກິລາປິ່ງປ່ອງລາວ ຍັງອ່ອນກວ່າ ແຕ່ກໍຖືວ່າເປັນໂອກາດໄດ້ແຂ່ງຂັນກັບນັກກິລາປະເທດອື່ນໆ ທີ່ມີສີມືດີໃນຂົງເຂດອາຊີ.
ແນວໃດກໍຕາມ, ເປັນຫຍັງນັກກິລາໃນອາຊຽນ ໃນຈຳນວນ 3 ຊາດ ກໍຄື ມາເລເຊຍ, ໄທ ແລະ ສິງກະໂປ ໄດ້ຮ່ວມແຂ່ງຂັນໃນຄັ້ງນີ້ ກໍຍ້ອນວ່ານັກກິລາ 3 ຊາດດັ່ງກ່າວ ສາມາດຄອງແຊ໋ມໃນລະດັບອາຊຽນ ຜ່ານມາ ແລະ ນັກກິລາລາວ ກໍໄດ້ສິດທິພິເສດ ໃນນາມເປັນເຈົ້າພາບ ຈຶຶ່ງສາມາດເຂົ້າຮ່ວມແຂ່ງຂັນໄດ້ ສະນັ້ນ, ການເປັນເຈົ້າພາບຄັ້ງນີ້ ກໍເປັນໂອກາດທີ່ດີ ເຮັດໃຫ້ນັກກິລາປິ່ງປ່ອງເຍົາວະຊົນລາວ ໄດ້ເຫັນສີມືນັກກິລາຈາກຊາດອື່ນໆ ແລະ ຍັງຈະໄດ້ປະສົບການທີ່ດີກັບນັກກິລາປິ່ງປ່ອງລະດັບແຊ໋ມໃນທະວີບອາຊີ ແລະ ໂລກ ແລະ ລາຍການນີ້ ເຊື່ອໝັ້ນວ່າຈະເຮັດໃຫ້ນັກກິລາລາວ ໄດ້ມີຄວາມກະຕືລືລົ້ນຢາກພັດທະນາຕົນເອງ ກ້າວສູ່ຜົນສຳເລັດໃນອະນາຄົດ.
ແນວໃດກໍຕາມ, ພາຍຫຼັງພະຍາດໂຄວິດ-19 ໄດ້ຜ່ອນຄາຍລົງ ຈຶ່ງເປັນໂອກາດດີ ທີ່ສປປ ລາວ ໄດ້ຈັດແຂ່ງຂັນລາຍການນີ້ຂຶ້ນ ແລະ ຍັງສາມາດດຶງດູດຊາວຕ່າງຊາດເຂົ້າມາທ່ອງທ່ຽວໃນລາວ ໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ ຊ່ວຍກະຕຸ້ນເສດຖະກິດຂອງຊາດ ໃຫ້ດີຂຶ້ນ ເວົ້າລວມ, ເວົ້າສະເພາະແມ່ນນັກກິລາໃນຈຳນວນ 200 ກວ່າຄົນ ທີ່ເຂົ້າຮ່ວມແຂ່ງຂັນງານນີ້ ໄດ້ທ່ຽວຊົມສະຖານທີ່ສຳຄັນຕ່າງໆ ແລະ ງານນີ້ ກໍຍັງຈະເຮັດໃຫ້ພວກເຮົາມີການຜູກມິດກັບບັນດາປະເທດຕ່າງໆອີກດ້ວຍ. ແນວໃດກໍດີ, ໃນເບື້ອງຕົ້ນການສະໝັກເຂົ້າຮ່ວມແຂ່ງຂັນຂອງນັກກິລາ ມີທັງໝົດ 20 ປະເທດ ແຕ່ຕົວຈິງແລ້ວມີພຽງ 17 ປະເທດ ແລະ ເຂດແຄວ້ນ ສ່ວນອີກ 3 ຊາດນັ້ນ ໄດ້ຂໍຖອນຕົວບໍ່ຮ່ວມແຂ່ງຂັນໂດຍບໍ່ຊາບເຫດຜົນ.
ສຳລັບການແຂ່ງຂັນກິລາປິ່ງປ່ອງຊີງແຊ໋ມເຍົາວະຊົນ-ໄວໜຸ່ມອາຊີ ຄັ້ງທີ 26 ທີ່ ສປປ ລາວ ຮັບກຽດເປັນເຈົ້າພາບ ຊຶ່ງເປັນຄັ້ງປະຫວັດສາດ ຈັດຂຶ້ນລະຫວ່າງວັນທີ 1-6 ກັນຍາ 2022 ໂດຍມີຄະນະນຳ, ຄູຝຶກ ແລະ ນັກກິລາ ຈຳນວນ 240 ຄົນ. ໃນນີ້ແບ່ງເປັນນັກກິລາ 165 ຄົນ ທີ່ມາຈາກ 17 ປະເທດ ແລະ ເຂດແຄວ້ນ ເຂົ້າຮ່ວມ ແລະ ມີການຊີງໄຊທັງໝົດ 11 ລາຍການ ຄື: ລະດັບເຍົາວະຊົນ ຮຸ່ນອາຍຸບໍ່ເກີນ 15 ປີ (U15) 4 ລາຍການ ປະເພດດ່ຽວຍິງ-ຊາຍ, ທີມຍິງ-ຊາຍ; ລະດັບໄວໜຸ່ມ ຮຸ່ນອາຍຸບໍ່ເກີນ 19 ປີ (U19) ມີ 7 ລາຍການ ປະເພດດ່ຽວຍິງ-ຊາຍ, ຄູ່ຍິງ-ຊາຍ, ຄູ່ປະສົມ ແລະ ທີມຍິງ-ຊາຍ. ໃນນີ້ສຳລັບນັກກິລາ 17 ປະເທດ ແລະ ເຂດແຄວ້ນ ທີ່ເຂົ້າຮ່ວມຄັ້ງນີ້ ປະກອບມີ: ບາເຣນ, ບັງກລາເທດ, ສປ ຈີນ, ໄຊນີດ ໄທເປ, ຮົງກົງ, ອີຣານ, ອິນເດຍ, ຍີ່ປຸ່ນ, ຄາຊັກສະຖານ, ມາເລເຊຍ, ເນປານ, ກາຕາ, ສ.ເກົາຫຼີ, ສິງກະໂປ, ໄທ, ອູຊະເບກິສະຖານ ແລະ ສປປ ລາວ ເຈົ້າພາບ. ສະເພາະນັກກິລາລາວ ເຮົາໄດ້ບູລິມະສິດພິເສດໃນນາມເຈົ້າພາບ ສາມາດສົ່ງນັກກິລາເຂົ້າຮ່ວມແຂ່ງຂັນທັງໝົດ 16 ຄົນ ໂດຍລົງແຂ່ງຂັນ 10 ຈາກ 11 ລາຍການທີ່ບັນຈຸແຂ່ງຂັນ ເນື່ອງຈາກພວກເຮົາຂາດນັກກິລາຢູ່ 1 ລາຍການ ຄື: ປະເພດດ່ຽວຍິງ ຮຸ່ນອາຍຸບໍ່ເກີນ 19 ປີ. ຢ່າງໃດກໍຕາມ, ການແຂ່ງຂັນຄັ້ງນີ້ ນອກຈາກນັກກິລາ ຈຳນວນ 165 ຄົນ ຈາກ 17 ປະເທດ ແລະ ເຂດແຄວ້ນ ທີ່ເຂົ້າຮ່ວມ ກໍຍັງມີທີມງານກຳມະການຕັດສິນ ພ້ອມດ້ວຍວິຊາການ ແລະ ເຈົ້າໜ້າທີ່ກ່ຽວຂ້ອງ 100 ກວ່າຄົນ ຈາກຫຼາຍປະເທດ.
ໂດຍ: ສົງການ ພັນແພງດີ
