ແຫລ່ງຂ່າວຈາກ ແຂວງອັດຕະປື ໃຫ້ຮູ້ວ່າ: ວັນທີ 30 ສິງຫາ ຜ່ານມາ, ທ່ານ ເລ ຈີ້ ທັນ ຮອງເລຂາພັກແຂວງ, ປະທານຄະນະກຳມະການປະຊາຊົນ ແຂວງກວາງນາມ ສສ ຫວຽດນາມ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອັດ ຕະປື ໂດຍໄດ້ຮັບການຕ້ອນຮັບຈາກ ທ່ານ ເລັດ ໄຊຍະພອນ ກໍາມະການສູນກາງພັກ, ເລຂາພັກແຂວງ, ເຈົ້າແຂວງອັດຕະປື.
ໂອກາດນີ້, ທ່ານເຈົ້າແຂວງອັດຕະປື ໄດ້ຕີລາຄາສູງຕໍ່ ທ່ານຮອງເລາພັກແຂວງທີ່ໄດ້ນຳພາຄະນະເດີນທາງມາຢ້ຽມຍາມ ແລະ ເຮັດວຽກໃນຄັ້ງນີ້, ເພື່ອເປັນການເພີ່ມທະວີຮັດແໜ້ນສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ໄປສູ່ລະດັບໃໝ່ ເຊິ່ງມີຫລາຍຂົງເຂດວຽກງານ, ຫລາຍຂະແໜງການເຊັ່ນ: ຂົງເຂດການສຶກສາ, ກະສິກໍາ, ການຄ້າ, ການລົງທຶນ ແລະ ການທ່ອງທ່ຽວ ເຊິ່ງຖືວ່າເປັນໂອກາດທີ່ດີທີ່ສອງແຂວງຈະໄດ້ປຶກສາຫາລືບາງບັນຫາທີ່ຈະຮ່ວມມືໃນຕໍ່ໜ້າ ແລະ ນັກທຸລະກິດຂອງແຂວງກວາງນາມ ຈະໄດ້ສຶກສາເບິ່ງຄວາມອາດສາມາດໃນບັນດາຂະແໜງການ, ໂຄງການດຶງດູດການລົງທຶນຢູ່ພາຍໃນແຂວງອັດຕະປື ແລະ ຫວັງວ່າໃນຕໍ່ໜ້ານີ້, ສອງແຂວງຈະສືບຕໍ່ຮ່ວມມືກັນໃນຫລາຍວຽກງານ ເພື່ອພັດທະນາແຂວງອັດຕະປື ໃຫ້ດີຂຶ້ນເທື່ອລະກ້າວ.
ພ້ອມກັນນີ້, ຄະນະນໍາທັງສອງຝ່າຍ ຍັງໄດ້ມີການແລກປ່ຽນຄໍາຄິດຄໍາເຫັນດ້ວຍຄວາມຈິງໃຈ ແລະ ຕີລາຄາສູງຕໍ່ກັບຜົນສໍາເລັດທີ່ທັງສອງພັກ, ສອງລັດ ກໍຄື ປະຊາຊົນສອງຊາດ ລາວ-ຫວຽດນາມ ສາມາດຍາດມາໄດ້ໃນໄລຍະຜ່ານມາ ແລະ ໃນປັດຈຸບັນ.
ຂ່າວ-ພາບ: ມະນີວອນ
#Medialaos MMD
