ວັນທີ 30 ສິງຫາ 2022 ນີ້, ພະແນກໂຍທາທິການ ແລະ ຂົນສົ່ງ(ຍທຂ) ແຂວງບໍລິຄຳໄຊ ເປີດຊຸດອົບຮົມຍົກລະດັບວຽກງານ ເອກະສານທາງການ ໃຫ້ພະນັກງານພາຍໃນພະແນກ ຍທຂ ແນໃສ່ການຈັດຕັ້ງປະຕິບັດວຽກງານກ່ຽວກັບວຽກຄຸ້ມຄອງ ແລະ ສຳເນົາເອກະສານ ໃຫ້ມີຄວາມເປັນເອກະພາບ, ຖືກຕ້ອງ, ສອດຄ່ອງກັບສະພາບຄວາມເປັນຈິງ ແລະ ບັນລຸຈຸດປະສົົງເປົ້າໝາຍໃນຂອບເຂດທົ່ວປະເທດ.
ໂອກາດດັ່ນີ້, ທ່ານ ສີສຸນົນ ແກ້ວໄຊຍະວົງ ຮອງຫົວໜ້າພະແນກ ພາຍໃນແຂວງໄດ້ນຳສະເໜີ ຫລັກການສ້າງນິຕິກຳ ພ້ອມຍົກໃຫ້ເຫັນຄວາມໝາຍຄວາມສຳຄັນວຽກງານດ້ານເອກະສານ, ໃນນັ້ນເອກະສານທາງການປະກອບມີປະເພດ, ອົງປະກອບຂອງເອການສານທາງການ ແລະ ການສ້າງເອກະສານທາງການ, ການຄຸ້ມຄອງເອກະສານເຂົ້າ-ອອກ, ວຽກງານສໍາເນົາເອກະສານ, ການທໍາລາຍເອກະສານ, ສິດ, ໜ້າທີ່ການຄຸ້ມຄອງ ແລະ ກວດກາວຽກງານເອກະສານທາງການ.
ສຳລັບເອກະສານທາງການ ປະກອບມີ 3 ເພດຄື: ເອກະສານນິຕິກຳ, ເອກະສານ ບໍລິຫານ ແລະ ເອກະສານວິຊາສະເພາະຂອງຂະແໜງການ. ສ່ວນອົງປະກອບເອກະສານທາງການມີ 12 ອົງປະກອບ, ການຄຸ້ມຄອງເອກະສານເຂົ້າ-ອອກຕ້ອງລວມສູນຢູ່ບ່ອນດຽວກັນ.
ນອກນັ້ນ, ວິທະຍາກອນຈາກພະແນກ ພາຍໃນແຂວງ ຍັງໄດ້ນຳສະເໜີ ທາງດ້ານໂຄງປະກອບ, ຮູບແບບ ແລະ ຫລັກການຮ່າງເອກະສານທາງລັດຖະການ, ເຕັກນິກດ້ານຕັ້ງຄ່າໄມໂຄຣຊັອບເວີດ, ສຳລັບຕົວໜັງສືທີ່ນຳໃຊ້ເອກະສານທາງການຕ້ອງພິມຂະໜາດ 12 ທຳມະດາ, ຂະໜາດເຈ້ຍ A4 ຂອບເຈ້ຍດ້ານເທິງ, ດ້ານລຸ່ມ ແລະ ຂອບເຈ້ຍດ້ານຂວາ ຫ່າງຈາກຕົວໜັງສືແມ່ນ 2 ຊັງຕີແມັດ, ສ່ວນຂອບເຈ້ຍດ້ານຊ້າຍແມ່ນ 3 ຊັງຕີແມັດ.
#Medialaos (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
