ໃນວັນທີ 30 ສິງຫາ 2022 ນີ້, ກົມ 213, ກະຊວງປ້ອງກັນປະເທດ ຈັດກອງປະຊຸມຈັດຕັ້ງເຊື່ອມຊືມ ເອກະສານແຈ້ງຊັບສິນ ແລະ ລາຍຮັບ ຮອບພິເສດ ໂດຍພາຍໄຕ້ການເປັນປະທານຂອງ ສະຫາຍ ພັນເອກ ບຸນຕຽນ ໄຊຍຳວົງທັນ ຮອງຫົວໜ້າກົມ 213, ມີຄະນະພັກ-ຄະນະບັນຊາ, ຫ້ອງການ, ພະແນກການ ແລະ ພະນັກງານວິຊາການແຕ່ລະກົມກອງເຂົ້າຮ່ວມ.
ສະຫາຍ ພັນໂທ ວຽງຄອນ ພິມມະວົງ ຮອງປະທານກວດກາ ຮອງຫົວໜ້າຫ້ອງການເມືອງ ກົມ 213 ໄດ້ຂື້ນຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຊີ້ນຳລວມ ແລະ ຄະນະຮັບຜິດຊອບການເຄື່ອນໄຫວແຈ້ງຊັບສິນ ແລະ ລາຍຮັບຮອບພິເສດ ໂດຍອີງຕາມແຈ້ງການຂອງຄະນະພັກກະຊວງປ້ອງກັນປະເທດ ສະບັບເລກທີ 09/ຄກພຊທ ລົງວັນທີ 06 ທັນວາ 2021 ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນຳການແຈ້ງຊັບສິນ ແລະ ລາຍຮັບ ໃນນີ້ ກົມ 213 ແຕ່ງຕັ້ງຄະນະຮັບຜິດຊອບຊີ້ນຳລວມ 3 ສະຫາຍ, ແຕ່ງຕັ້ງອານຸກຳມະການ ແລະ ວິຊາການ 6 ສະຫາຍ, ຈຸດປະສົງກໍ່ເພື່ອຜັນຂະຫຍາຍດຳລັດຂອງລັດຖະບານ ເລກທີ 159/ລບ ແລະ ບົດແນະນຳການຈັດຕັ້ງປະຕິບັດດຳລັດ ວ່າດ້ວຍການແຈ້ງຊັບສິນ (ສະບັບປັບປຸງ) ຂອງອົງການກວດກາລັດຖະບານ ສະບັບເລກທີ 46/ອກລ, ລົງວັນທີ 20 ກຸມພາ 2017 ວ່າດ້ວຍການແຈ້ງຊັບສິນໃຫ້ຖືກຕ້ອງ, ເປັນເອກະພາບ, ມີປະສິດຕິຜົນ ແລະ ທົ່ວເຖິງທຸກເປົ້າໝາຍ ຕາມທີ່ໄດ້ກຳນົດໃນມາດຕາ 5 ຂອງດຳລັດສະບັບດັ່ງກ່າວ, ເພື່ອເປັນບ່ອນອີງໃຫ້ຄະນະພັກ-ຄະນະບັນຊາ ແລະ ຄະນະກວດກາແຕ່ລະຂັ້ນ ໃນການຈັດຕັ້ງປະຕິບັດລະອຽດ ກ່ຽວກັບການແຈ້ງຊັບສິນ ແລະ ລາຍຮັບຂອງພະນັກງານ-ນາຍທະຫານໃນກອງທັບ, ເຮັດໃຫ້ອົງການຮັບແຈ້ງຊັບສິນ ແລະ ຜູ້ທີ່ຢູ່ໃນເປົ້າໝາຍແຈ້ງຊັບສິນ ໄດ້ຮັບຮູ້, ເຂົ້່າໃຈ, ມີຄວາມເປັນເອກະພາບ ແລະ ເປັນເຈົ້າການໃນການຈັດຕັ້ງປະຕິບັດດ້ວຍຄວາມຮັບຜິດຊອບສູງ ແນໃສ່ເຮັດໃຫ້ການແຈ້ງຊັບສິນ ແລະ ລາຍຮັບ ໄດ້ດຳເນີນໄປຢ່າງຖືກຕ້ອງ, ຈະແຈ້ງ, ຄົບຖ້ວນ ແລະ ທັນຕາມເວລາທີ່ກຳນົດ. ພ້ອມດຽວກັນນີ້ ກົມກວດກາກະຊວງປ້ອງກັນປະເທດ ກໍໄດ້ອະທິບາຍ ກ່ຽວກັບຮ່າງຟອມເອກະສານ ແຈ້ງຊັບສິນ ແລະ ລາຍຮັບ ໃຫ້ພະນັກງານ-ນັກຮົບ ໄດ້ເຂົ້າໃຈວິທີການຂຽນຕື່ມອີກ.
ໂອກາດນີ້ ສະຫາຍ ພັນເອກ ບຸນຕຽນ ໄຊຍຳວົງທັນ ໄດ້ໂອ້ລົມ ແລະ ຍ້ອງຍໍຊົມເຊີຍຕໍ່ກົມກວດກາທີ່ໄດ້ຊີ້ນຳ, ລົງອະທິບາຍ ກ່ຽວກັບແບບຟອມລາຍຮັບ-ລາຍຈ່າຍ ໃຫ້ພະນັກງານ-ນັກຮົບ ພ້ອມນັ້ນສະຫາຍຍັງໄດ້ຮຽກຮ້ອງໃຫ້ ຄະນະພັກ-ຄະນະບັນຊາ, ພະນັກງານສະມາຊິກພັກ-ນັກຮົບທຸກຄົນ ຈິງໃຈ ລາຍງານຊັບສິນຂອງຕົນເອງ ໃຫ້ຖືກຕ້ອງ, ຄົບຖ້ວນ ແລະ ທັນຕາມເວລາທີ່ກຳນົດໄວ້. ຍົກສູງຄວາມຮັບຜິດຊອບ, ພ້ອມກັນເຮັດສຳເລັດໜ້າທີ່ວຽກງານ ທີ່ການຈັດຕັ້ງພັກ-ລັດ ຂັ້ນເທິງ ມອບໝາຍໃຫ້.
ຂ່າວ: ພຽງເພັດ ທຳມະໂຄດ
