ຕາມຂ່າວຈາກ dailynews ວັນທີ 29 ສິງຫານີ້ີ້, ກະຊວງຊັບພະຍາກອນມະນຸດ ຂອງສິງກະໂປ ອອກຖະແຫລງ ກ່ຽວກັບ ການປະຕິຮູບມາດຕະການອອກວີຊ່າເຮັດວຽກ ແລະ ເພື່ອການຢູ່ອາໄສແບບໃໝ່ເພື່ອດຶງດູດຊາວຕ່າງປະເທດ ທີ່ມີສີມືແຮງງານເກັ່ງໃຫ້ເຂົ້າມາເຮັດວຽກໃນປະເທດ ຊຶ່ງເປັນບາດກ້າວນຳໄປສູ່ການພັດທະນາເສດຖະກິດຂອງສິງກະໂປ ໃຫ້ເຂັ້ມແຂງ ຍິ່ງຂຶ້ນ ໂດຍວີຊ່າດັ່ງກ່າວມີໄລຍະເວລາ 5 ປີ ໂດຍຈະເປັນການອະນຸຍາດໃຫ້ກັບຜູ້ທີ່ມີລາຍໄດ້ຕໍ່ເດືອນຢ່າງໜ້ອຍ 30.000 ໂດລາ ສິງກະໂປ ພາຍໃນໄລຍະເວລາ 12 ເດືອນຫລ້າສຸດ ຜູ້ທີ່ໄດ້ຮັບການອະນຸມັດວີຊ່າປະເພດນີ້ສາມາດນຳຄອບຄົວ, ຄູ່ແຕ່ງງານ ແລະ ລູກເຂົ້າມາອາໄສໄດ້ອີກ ແລະ ສາມາດຕໍ່ອາຍຸວີຊ່າໄດ້ 5 ປີ ແບບບໍ່ຈຳກັດຄັ້ງໂດຍມາດຕະການນີ້ຈະມີຜົນບັງຄັບໃຊ້ ຕັ້ງແຕ່ເດືອນມັງກອນປີໜ້າ.
ແຕ່ຢ່າງໃດກໍ່ຕາມ ສຳລັບຜູ້ທີ່ມີຂີດຄວາມສາມາດລະດັບສູງຫາກມີລາຍໄດ້ບໍ່ເຖິງເກນທີ່ກຳນົດໄວ້ຂ້າງເທິງນັ້ນສາມາດຍື່ນຄຳຮ້ອງ ເພື່ອຂໍຮັບພິຈາລະນາວີຊ່າແບບດຽວກັນນີ້ໄດ້. ຂະນະທີ່ຜູ້ຊ່ຽວຊານດ້ານເຕັກໂນໂລຊີ ແລະ ວຽກງານອື່ນໆ ທີ່ຍັງຂາດແຄນໃນສິງກະໂປ ສາມາດຍື່ນຄຳຮ້ອງເພື່ອຂໍຮັບການພິຈາລະນາ ວີຊ່າ 5 ປີ ໄດ້ຕັ້ງແຕ່ເດືອນກັນຍາ ປີໜ້າຈາກປັດຈຸບັນຢູ່ລະຫວ່າງ 2-3ປີ.
(ພາກຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
