ວັນທີ 26 ສິງຫາ 2022 ຜ່ານມາ, ກອງສີລະປະກອນກອງທັບປະຊາຊົນລາວ ໄດ້ສະແດງຜ່ານລາຍການເພື່ອກະກຽມສະແດງຮັບໃຊ້ການຝຶກຊ້ອມກູ້ໄພພິບັດ 3 ກອງທັບ (ລາວ-ຫວຽດນາມ-ກຳປູເຈຍ). ໂດຍມີຄະນະນຳກະຊວງປ້ອງກັນປະເທດ, ຄະນະນຳບັນດາ ກົມໃຫຍ່, ກົມນ້ອຍ, ກົມກອງ, ຫ້ອງການ, ຄະນະຊີ້ນຳລວມ, ຄະນະຮັບຜິດຊອບ, ພ້ອມດ້ວຍພະນັກງານ-ນັກຮົບເຂົ້າຮ່ວມຮັບຊົມ.
ສະຫາຍ ພັນເອກ ຄຳພາ ດວງພະຈັນ ຫົວໜ້າການທະຫານ ກອງສີລະປະກອນກອງທັບ ໄດ້ລາຍງານໃຫ້ຮູ້ວ່າ : ການຝຶກຊ້ອມບັນດາລາຍການສະເເດງໃນຄັ້ງນີ້, ແມ່ນສະແດງໃຫ້ເຫັນຜົນສຳເລັດຂອງການຝຶກຊ້ອມລາຍການສະແດງແຕ່ລະປະເພດ, ເປັນຕົ້ນດ້ານເນື້ອໃນ, ອຸປະກອນຮັບໃຊ້ການສະແດງ ແລະ ແສງ,ສີ,ສຽງຕ່າງໆ, ເພື່ອຮັບປະກັນໃຫ້ແກ່ການສະແດງຮັັບໃຊ້ການຝຶກຊ້ອມກູ້ໄພພິບັດຮ່ວມ 3 ກອງທັບ ລາວ-ຫວຽດນາມ-ກຳປູເຈຍ,.
ທັງນີ້ກໍ່ເພື່ອເປັນການເພີ່ມທະວີຮັດແໜ້ນຄວາມສາມັກຄີລະຫວ່າງ 3 ກອງທັບໃຫ້ນັບມື້ເຂົ້າສູ່ລວງເລີກ ແລະ ຈະເລີນງອກງາມຍິ່ງໆຂຶ້ນ, ເຊິ່ງບັນດາລາຍການສະແດງແຕ່ລະປະເພດແມ່ນສະແດງໃຫ້ເຫັນເຖິງຜົນງານການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ, ໃນນີ້ຍັງໄດ້ສະແດງໃຫ້ເຫັນນໍ້າໃຈມິດຕະພາບອັນເປັນມູນເຊື້ອການພົວພັນຮ່ວມມືລະຫວ່າງ 3 ຊາດ ລາວ-ຫວຽດນາມ-ກຳປູເຈຍ ແລະ ທັງເປັນການສະເເດງໃຫ້ເຫັນມູນເຊື້ອ, ວິຖີຊີວິດ, ສີລະປະວັດທະນະທຳອັນດີງາມຂອງປະຊາຊົນລາວບັນດາເຜົ່າ ໂດຍຜ່ານເນື້ອຮ້ອງທຳນອງເພງ, ບົດຂັບລຳ, ບົດຟ້ອນ ແລະ ເຕັກນິກການສະແດງຕ່າງໆຢ່າງທົ່ວເຖິງ.
ພ້ອມດຽວກັນນີ້,ຄະນະຊີ້ນຳຍັງໄດ້ປະກອບຄຳຄິດຄຳເຫັນຕື່ມ ບາງບັນຫາເພື່ອເຮັດໃຫ້ເນື້ອໃນການສະເເດງແຕ່ລະລາຍການມີເນື້ອໃນຄົບຖ້ວນສົມບູນ.
ຂ່າວ-ພາບ: ລຸນທອງ
