ທ້າວ ເທພາລັກ ໄຂຄຳພິທູນ ເຈົ້າຂອງຜົນງານອັນດັບທີ 3 ເຍົາວະຊົນໂລກ ປີ 2016 ອະດີດທີມແຊັມເກົ່າ ພາເຮືອຄູ່ໃຈ ໝາຍເລກ 16 ເຂົ້າເສັ້ນໄຊ ເປັນອັນດັບທີ 1 ພາທີມ 137 ນາວາສັກສິດ ໄດ້ແຊັມການແຂ່ງຂັນເຮືອເຈັສກີ ຮຸ່ນ 1.800 ຊີຊີ ປະເພດມືໂປຣ ຫຼື 1.800 cc open & newgent ຊີງຂັນທ່ານເຈົ້າແຂວງຫຼວງພະບາງ ຄັ້ງທີ 3 ປະຈຳປີ 2022 ໃນງານວັນບຸນເຂົ້າປະດັບດິນ ປີ 2022 ໄປຄອງເປັນສະໄໝທີ 2 ຕິດຕໍ່ກັນ. ການແຂ່ງຂັນໄດ້ຈັດຂຶ້ນວັນທີ 25 ສິງຫາ ຜ່ານມາ ທີ່ຫາດດອນຊາຍມຸງຄຸນ ນະຄອນ-ຫຼວງພະບາງ ແຂວງຫຼວງພະບາງ ໂດຍໃຫ້ກຽດເຂົ້າຮ່ວມຂອງ ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ, ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ທ່ານ ວຽງທອງ ຮັກສະຈັນ ເຈົ້າຄອງນະຄອນ-ຫຼວງພະບາງ ແລະ ທ່ານ ສອນເພັດ ເມືອງວົງ ປະທານບໍລິສັດ ແສງເພັດ ເກັບກູ້ລະເບີດ ຈຳກັດຜູ້ດຽວ ພ້ອມດ້ວຍບັນດາ ຄະນະນຳແຕ່ພາກສ່ວນ ຕະຫຼອດຮອດນັກກິລາ ແລະ ມວນຊົນຊາວ ນະຄອນ-ຫຼວງພະບາງ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າຮ່ວມຢ່າງຫຼວງຫຼາຍ. ການແຂ່ງຂັນລາຍການດັ່ງກ່າວ ມີເຮືອເຂົ້າຮ່ວມເກືອບ 30 ລຳ ທີ່ມາຈາກ ນະຄອນຫຼວງວຽງຈັນ, ສະຫວັນນະເຂດ ແລະ ແຂວງຫຼວງພະບາງ, ແຂ່ງຂັນ 3 ລາຍການ ຫຼື 3 Moto ຊີງເງິນລາງວັນ ຫຼາຍກວ່າ 100 ລ້ານກີບ ສະຫຼອງງານບຸນຫໍ່ເຂົ້າປະດັບດິນປະຈຳປີນີ້ ພ້ອມທັງເປັນການສົ່ງເສີມການທ່ອງທ່ຽວລາວທ່ຽວລາວ ແລະ ທັງເປັນການໂຄສະນາດຶງດູດຊາວຕ່າງຊາດເຂົ້າມາທ່ຽວລາວໃຫ້ນັບມື້ຫຼາຍຂຶ້ນ ອີກດ້ານໜຶ່ງກໍຍັງເປັນການສົ່ງເສີມນັກກິລາແຈັສກີລາວ ໃຫ້ມີການເຄື່ອນໄຫວສາມາດພັດທະນາຕົນເອງໃຫ້ກ້າວທັນກັບນັກກິລາລະດັບອາຊີບໃນສາກົນ.
ຜ່ານການແຂ່ງຂັນຜົນປະກົດວ່າ: ທີ 1 ຮຸ່ນ 1.800 ຊີຊີ ທ້າວ ເທພາລັກ ໄຂຄຳພິທູນ ທີມ 137 ນາວາສັກສິດ, ທີ 2 ທ້າວ ສຸດໃຈ ໄຂຄຳພິທູນ ທີມເອກແມວນໍ້າເຈັສກີ ຈາກນະຄອນຫຼວງ, ທີ 3 ທ້າວ ຫຸມພັນ ຈັນດາພອນ ທີມໄຮເທັກ ຈາກນະຄອນຫຼວງ, ທີ 4 ທ້າວ ເບນ້ອຍ ທີມໄຮເທັກ ແລະ ທີ 5 ທ້າວ ແຊັກໂກ ເຮືອແພເມືອງຟ້າ ຈາກແຂວງສະຫວັນນະເຂດ; ຮຸ່ນ 1.100 ຊີຊີ ທີ 1 ທ້າວ ຫຸມພັນ ຈັນດາພອນ ທີມໄຮເທັກ, ທີ 2 ທ້າວ ເທພາລັກ ໄຂຄຳພິທູນ ທີມ 137 ນາວາສັກສິດ, ທີ 3 ທ້າວ ບິນລ້ຽນ ທີມ 36 ເລຊີ້ງ ບາຍ ບິນລ້ຽນ, ທີ 4 ທ້າວ ວັດທະນາ ແກ້ວດວງເດດ ຈາກທີມໄຮເທັກ ແລະ ທີ 5 ທ້າວ ແຟນຕ້າ ສີສົມບັດ ທີມໂກດ້າກ້ອນ ແລະ ຮຸ່ນ 700 ຊີຊີ ທີ 1 ທ້າວ ມອດ ຈາກທີມຫຼວງພະບາງ, ທີ 2 ທ້າວ ຫຸມພັນ ຈັນດາພອນ ທີມໄຮເທັກ, ທີ 3 ທ້າວ ຕຸກລິກ ທີມທີທີ ໂອໂຕ ຫຼວງພະບາງ, ທີ 4 ທ້າວ ມີໂນ້ ທີມບີບີ ໂອໂຕ ຊາວ ແລະ ທີ 5 ທ້າວ ແລັມ ທີມຫຼວງພະບາງ.
ນອກຈາກນັ້ນ, ຫຍັງມີການແຂ່ງຂັນເຈັສກີ ຮຸ່ນສະໝັກຫຼິ້ນອີກ 2 ລາຍການອີກດ້ວຍ. ສຳລັບລາງວັນ 3 ຮຸ່ນ ກໍຄື ຮຸ່ນ 1.800 cc open & newgent ອັນດັບທີ 1 ໄດ້ຮັບຂັນແຊັມ ພ້ອມເງິນລາງວັນ 15.000.000 ກີບ, ອັນດັບທີ 2 ໄດ້ຮັບຂັນ ແລະ ເງິນລາງວັນ 10.000.000 ກີບ ແລະ ອັນດັບທີ 3 ໄດ້ຮັບຂັນ ແລະ ເງິນລາງວັນ 5.000.000 ກີບ; ຮຸ່ນ 1.100 cc open & newgent ອັນດັບທີ 1 ໄດ້ຮັບຂັນແຊັມ ພ້ອມເງິນລາງວັນ 10.000.000 ກີບ, ອັນດັບທີ 2 ໄດ້ຮັບຂັນ ແລະ ເງິນລາງວັນ 5.000.000 ກີບ ແລະ ອັນດັບທີ 3 ໄດ້ຮັບຂັນ ແລະ ເງິນລາງວັນ 3.000.000 ກີບ ແລະ ຮຸ່ນ 700 cc open ອັນດັບທີ 1 ໄດ້ຮັບຂັນແຊັມ ພ້ອມເງິນລາງວັນ 5.000.000 ກີບ, ອັນດັບທີ 2 ໄດ້ຮັບຂັນ ແລະ ເງິນລາງວັນ 3.000.000 ກີບ ແລະ ອັນດັບທີ 3 ໄດ້ຮັບຂັນ ແລະ ເງິນລາງວັນ 2.000.000 ກີບ.
(ຂ່າວ-ພາບ: ສົງການ ພັນແພງດີ)
