ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມານີ້, ທະນາຄານພັດທະນາອາຊີ (ADB) ກ່າວວ່າ ການແຜ່ລະບາດຂອງພະຍາດໂຄວິດ-19 ຂວາງກັ້ນການຕໍ່ສູ້ກັບຄວາມທຸກຍາກໃນພາກພື້ນອາຊີ-ປາຊີຟິກມາແລ້ວຢ່າງໜ້ອຍ 2 ປີ ແລະ ຫຼາຍປະເທດຈະພົບວ່າ ການຫຼຸດພົ້ນອອກຈາກຄວາມທຸກຍາກກາຍເປັນເລື່ອງທີ່ຍາກຂຶ້ນ.
ຖ້າການແຜ່ລະບາດຂອງພະຍາດໂຄວິດ-19 ບໍ່ເກີດຂຶ້ນ ອັດຕາສ່ວນຂອງປະຊາກອນໃນພາກພື້ນທີ່ປະເຊີນກັບຄວາມທຸກຍາກຂັ້ນຮຸນແຮງ ໝາຍເຖິງການມີລາຍໄດ້ ຫຼື ລະດັບລາຍຈ່າຍເພື່ອການບໍລິໂພກຕໍ່ວັນຕ່ຳກວ່າ 1,90 ໂດລາ ອາດຈະຫຼຸດລົງເຫຼືອ 2,9% ເມື່ອປີ 2020 ແທນທີ່ຈະເພີ່ມຂຶ້ນເປັນ 5% ຂະນະທີ່ໂຕເລກດັ່ງກ່າວຢູ່ທີ່ 3,8% ໃນປີ 2021 ແລະ ຄາດວ່າຈະຢູ່ທີ່ 3% ໃນປີນີ້. ADB ກ່າວວ່າ ປະຊາກອນຂອງປະເທດກຳລັງພັດທະນາໃນອາຊີຢ່າງໜ້ອຍ 20% ມີຖານະທຸກຍາກປານກາງ ຫຼື ທຸກຍາກທີ່ສຸດໃນປີ 2021 ຊຶ່ງອັດຕາສ່ວນນີ້ອາດຈະຫຼຸດລົງເຄິ່ງໜຶ່ງພາຍໃນປີ 2030 ຖ້າຫາກລັດຖະບານໃນຫຼາຍປະເທດມຸ່ງເນັ້ນໄປທີ່ຄວາມຍືດຍຸ່ນ (Flexibility), ນະວັດຕະກຳ ແລະ ການເປີດກວ້າງເພື່ອສ້າງໂອກາດທາງດ້ານເສດຖະກິດທີ່ສົມດູນຫຼາຍຂຶ້ນ ແລະ ຄວາມຄ່ອງຕົວທາງສັງຄົມທີ່ດີຍິ່ງຂຶ້ນ. ທ່ານ ອັນເບີດ ພາກ ຫົວໜ້ານັກເສດຖະສາດຂອງ ADB ກ່າວວ່າ ກຸ່ມຄົນທຸກຍາກ ແລະ ກຸ່ມປະເທດທີ່ອ່ອນແອໄດ້ຮັບຜົນກະທົບຈາກພະຍາດໂຄວິດ-19 ໜັກທີ່ສຸດ ແລະ ໃນຂະນະທີ່ເສດຖະກິດກຳລັງຟື້ນຕົວຫຼາຍຄົນອາດຈະພົບວ່າ ການອອກຈາກຄວາມທຸກຍາກນັ້ນຍາກກວ່າທີ່ຜ່ານມາຫຼາຍ.
ນອກຈາກນີ້ ADB ຍັງໄດ້ກ່າວວ່າ ຄວາມບໍ່ແນ່ນອນຕ່າງໆເຊັ່ນ ຜົນກະທົບຢ່າງເຕັມຮູບແບບຂອງການສູນເສຍການຮຽນຮູ້ເປັນສິ່ງທີ່ທ້າທາຍ ໂອກາດທີ່ຄົນທຸກຍາກຈະກ້າວໄປສູ່ຖານະທາງເສດຖະກິດທີ່ດີຂຶ້ນ ອີກທັງເສດຖະກິດທີ່ສາມາດກັບມາສູ່ລະດັບກ່ອນເກີດການແຜ່ລະບາດຂອງພະຍາດໂຄວິດ-19 ໃນທາງດ້ານການຂະຫຍາຍຕົວຂອງໂຕເລກລວມຍອດຜະລິດຕະພັນພາຍໃນປະເທດ (GDP) ມີພຽງປະມານເຄິ່ງໜຶ່ງຂອງພາກພື້ນເທົ່ານັ້ນ ແລະ ການຟື້ນຕົວທາງດ້ານເສດຖະກິດຍັງຄົງຜັນແປ ເພາະເຊື້ອພະຍາດໂຄວິດ-19 ສາຍພັນໃໝ່ ລວມເຖິງຄວາມບໍ່ແນ່ນອນທາງດ້ານເສດຖະກິດທົ່ວໂລກທີ່ເກີດຈາກສະຖານະການໂລກໃນປັດຈຸບັນອີກດ້ວຍ.
