ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມສ້າງແຜນກໍານົດພະນັກງານການນໍາ-ຄຸ້ມຄອງຂັ້ນສູນກາງຄຸ້ມຄອງ ຂຶ້ນໃນວັນທີ 29 ສິງຫາ ນີ້ ທີ່ຫໍວັດທະນະທໍາແຫ່ງຊາດ. ໂດຍໃຫ້ກຽດເປັນປະທານຮ່ວມຂອງທ່ານ ນາງ ສວນສະຫັວນ ວິຍະເກດ ກໍາມະການສູນກາງພັກ ເລຂາຄະນະພັກ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ); ທ່ານ ທອງຈັນ ໂຂງພູມຄໍາ ຮອງຫົວໜ້າຄະນະຈັດຕັ້ງສູນກາງພັກ ມີທ່ານຮອງລັດຖະມົນຕີ ແລະ ບັນດາການນໍາຂັ້ນສູງ ອາວຸໂສບໍານານ, ຫົວໜ້າກົມ, ຮອງກົມ, ພ້ອມດ້ວຍພາກສ່ວນກ່ຽວຂ້ອງອ້ອມຂ້າງກະຊວງ ຖວທ ເຂົ້າຮ່ວມ.
ທ່ານລັດຖະມົນຕີກະຊວງ ຖວທ ໄດ້ກ່າວວ່າ: ການສ້າງແຜນກໍານົດພະນັກງານນໍາພາ-ຄຸ້ມຄອງ ຂັ້ນສູນກາງຄຸ້ມຄອງເປັນວຽກງານໜຶ່ງທີ່ສໍາຄັນພື້ນຖານຂອງວຽກງານພະນັກງານ, ຮັບປະກັນການຫັນວຽກງານພະນັກງານ ດໍາເນີນຕາມລະບຽບແບບແຜນເພື່ອຕອບສະໜອງໜ້າທີ່ການເມືອງຂອງພັກ-ລັດ ໃນສະເພາະໜ້າ ແລະ ຍາວນານ; ເປັນການຫັນຍຸດທະສາດກ່ຽວກັບວຽກງານພະນັກງານເປັນອັນລະອຽດ, ສ້າງໂຄງການສັງລວມພື້ນຖານ ໃຫ້ແກ່ການກໍ່ສ້າງ-ບໍາລຸງ, ຄາດຄະເນສັບຊ້ອນ ແລະ ຈັດວາງພະນັກງານຢ່າງສົມເຫດສົມຜົນ ຊຶ່ງແມ່ນຄວາມຮັບຜິດຊອບໂດຍກົງຂອງຄະນະພັກແຕ່ລະຂັ້ນ ຕາມຂອບເຂດສິດໃນການແບ່ງຂັ້ນຄຸ້ມຄອງພະນັກງານ; ບົນພື້ນຖານກໍາແໜ້ນການເລັ່ງທວງຂອງໜ້າທີ່ການເມືອງ ໃນສະເພາະໜ້າ ແລະ ຍາວນານຂອງພັກ, ແຜນພັດທະນາຂອງຂະແໜງການ ຊຶ່ງເລີ່ມຈາກສະພາບຄວາມເປັນຈິງຂອງຖັນແຖວພະນັກງານ, ຮັບປະກັນລັກສະນະເປີດກວ້າງ ແລະ ເຄື່ອນເໜັງ; ຮັບປະກັນຄວາມຖືກຕ້ອງໂປ່ງໃສ, ພາວະວິໄສ, ຮອບດ້ານ ແລະ ຍຸຕິທໍາ, ຄໍານຶງເຖິງໂຄງປະກອບເພດ, ເຜົ່າ ແລະ ເລັ່ງໃສ່ພະນັກງານໜຸ່ມໃຫ້ກວມອັດຕາສ່ວນຫຼາຍ. ການສ້າງແຜນກໍານົດພະນັກງານ ຍັງແມ່ນການຄາດຄະເນເປົ້າໝາຍພະນັກງານທີ່ຈະຈັດວາງເຂົ້າໃນຕໍາແໜ່ງນໍາພາ-ຄຸ້ມຄອງແຕ່ລະຂັ້ນ, ແຕ່ລະຂະແໜງການ ແນໃສ່ຮັບປະກັນລັກສະນະສືບທອດປ່ຽນແທນ ຕໍ່ເນື່ອງໃນສະເພາະໜ້າ ແລະ ຍາວນານ.
ການປະຊຸມຄັ້ງນີ້, ຈະໄດ້ດໍາເນີນເປັນເວລາ 3 ວັນ (29-31 ສິງຫາ 2022), ຈັດເປັນ 3 ຮອບ, ພາຍຫຼັງສໍາເລັດກອງປະຊຸມທັງ 3 ຮອບ ແລະ ແຜນກໍານົດພະນັກງານຖືກຮັບຮອງເອົາໃນການຈັດຕັ້ງປະຕິບັດຕົວຈິງ ທຸກຕໍາແໜ່ງ ແລະ ພະນັກງານທີ່ຢູ່ໃນແຜນກໍານົດຈະໄດ້ຮັບການຈັດວາງ, ສັບຊ້ອນ ຫຼືແຕ່ງຕັ້ງຕາມທີ່ໄດ້ກໍານົດໄວ້ ແລະ ຜ່ານການປະເມີນຄືນເຫັນວ່າຄົບມາດຖານ, ເງື່ອນໄຂທີ່ກໍານົດໄວ້ ຈຶ່ງພິຈາລະນາເຂົ້າໃນຈັດວາງ, ສັບຊ້ອນ ແລະ ແຕ່ງຕັ້ງເຂົ້າຮັບຕໍາແໜ່ງນໍາພາ-ຄຸ້ມຄອງ. ໃນໂອກາດດັ່ງກ່າວທ່ານລັດຖະມົນຕີກໍໄດ້ສະເໜີເນັ້ນບາງບັນຫາດັ່ງນີ້: ໃຫ້ຄະນະພັກ, ຄະນະນໍາແຕ່ລະຂັ້ນໃນທົ່ວກະຊວງຕ້ອງຄົ້ນຄວ້າເຊື່ອມຊຶມ, ກໍາແໜ້ນເນື້ອໃນມະຕິ, ຄໍາສັ່ງ, ຄໍາແນະນໍາຕ່າງໆ ໃນການສ້າງແຜນກໍານົດພະນັກງານນໍາພາ-ຄຸ້ມຄອງແຕ່ລະຂັ້ນໃຫ້ເລິກເຊິ່ງ; ອີງໃສ່ແຜນກໍານົດພະນັກງານນໍາພາ-ຄຸ້ມຄອງເປັນຕົ້ນຕໍ; ປະເມີນສະພາບພະນັກງານແຕ່ລະປະເພດທີ່ຢູ່ໃນຄວາມຮັບຜິດຊອບຂອງຕົນ, ໂດຍປະຕິບັດຕາມຂັ້ນຕອນ ເພື່ອຮູ້ດ້ານຈໍານວນ ແລະ ຄຸນະພາບຂອງພະນັກງານແຕ່ລະປະເພດທີ່ມີແລ້ວ; ສ້າງແຜນຈັດວາງ-ສັບຊ້ອນພະນັກງານ ພາຍຫຼັງມີແຜນກໍານົດ ແລະ ແຜນກໍ່ສ້າງ-ບໍາລຸງ; ຄຸ້ມຄອງ, ຕິດຕາມ, ກວດກາຢ່າງໃກ້ຊິດຕໍ່ການເຄື່ອນໄຫວປະຕິບັດໜ້າທີ່ ກໍຄືການຝຶກຝົນຫຼໍ່ຫຼອມຂອງພະນັກງານ ທີ່ຢູ່ໃນແຜນກໍານົດ.
ຂ່າວ-ພາບ: ຍຸພິນທອງ
