ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ຜູ້ຊີ້ນໍາວຽກງານຂົງເຂດການປົກຄອງ ແລະ ວັດທະນະທໍາ-ສັງຄົມ ພ້ອມດ້ວຍຄະນະ ໄດ້ເຄື່ອນໄຫວຕິດຕາມ, ກວດກາ ແລະ ຊຸກຍູ້ວຽກງານຢູ່ ແຂວງຊຽງຂວາງ ໃນວັນທີ 25-26 ສິງຫາ 2022 ທີ່ຜ່າມານີ້ ໂດຍມີ ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ພ້ອມດ້ວຍການນຳຫຼັກແຫຼ່ງຂອງແຂວງໃຫ້ການຕ້ອນຮັບ.
ການຢ້ຽມຢາມແຂວງຊຽງຂວາງ ຂອງທ່ານ ຮອງນາຍົກລັດຖະມົນຕີຄັ້ງນີ້ ແມ່ນເພື່ອຕິດຕາມ, ກວດກາ ເບິ່ງການກະກຽມຄວາມພ້ອມ ໃຫ້ແກ່ການຈັດງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ໃນທ້າຍປີ 2022 ນີ້.
ໃນໂອກາດນີ້, ທ່ານເຈົ້າແຂວງຊຽງຂວາງ ໄດ້ລາຍງານໃຫ້ຊາບ ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ປະຈຳປີ 2022 ແລະ ການກະກຽມຄວາມພ້ອມດ້ານຕ່າງໆ ໃຫ້ແກ່ການຈັດງານມະຫະກຳກິລາແຫ່ງຊາດ ຄັ້ງທີ XI ເຫັນວ່າ ປັດຈຸບັນ ທົ່ວແຂວງ ສືບຕໍ່ມີຄວາມສະຫງົບໂດຍພື້ນຖານ, ເສດຖະກິດ-ສັງຄົມ ສືບຕໍ່ຂະຫຍາຍຕົວຕໍ່ເນື່ອງ, ຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ນັບມື້ໄດ້ຮັບການປັບປຸງດີຂຶ້ນ, ຄາດຄະເນໝົດປີ ເສດຖະກິດ ຈະຂະຫຍາຍຕົວ 4,2%, ລາຍຮັບສະເລ່ຍຕໍ່ຫົວຄົນ 17,3 ລ້ານກີບຕໍ່ຄົນຕໍ່ປີ, ການເກັບລາຍຮັບເຂົ້າງົບປະມານ ສາມາດປະຕິບັດໄດ້ 33% ຂອງແຜນການປີ, ແຜນລາຍຈ່າຍປະຕິບັດໄດ້ 41% ຂອງແຜນການປີ, ການລະດົມທຶນທົ່ວສັງຄົມໄດ້ 35% ຂອງແຜນການປີ, ສາມາດດຶງດູດນັກທ່ອງທ່ຽວ ໄດ້ 31% ຂອງແຜນການປີ; ອັນພົ້ນເດັ່ນ ແມ່ນການປູກພືດ ແລະ ລ້ຽງສັດໃຫຍ່ ສາມາດປະຕິບັດໄດ້ລື່ນແຜນການ 11%, ການສົ່ງອອກສິນຄ້າ ສາມາດປະຕິບັດໄດ້ 88% ຂອງແຜນການປີ, ການພັດທະນາສີມືແຮງງານ ປະຕິບັດໄດ້ 63% ຂອງແຜນການປີ; ການຈັດຕັ້ງປະຕິບັດ 2 ວາລະແຫ່ງຊາດ ໄດ້ກາຍເປັນຮູບປະທຳ, ໄດ້ຮັບຜົນດີ ແລະ ມີປະສິດທິຜົນຫຼາຍຂຶ້ນເປັນກ້າວໆ.
ສຳລັບການກະກຽມຄວາມພ້ອມດ້ານຕ່າງໆ ໃຫ້ແກ່ການຈັດງານມະຫະກຳກິລາແຫ່ງຊາດ ຄັ້ງທີ XI ມາຮອດປັດຈຸບັນ ຄະນະຮັບຜິດຊອບ ຈັດງານມະຫະກຳກິລາແຫ່ງຊາດ ຄັ້ງທີ XI ໄດ້ເປັນເອກະພາບ ໃນການກຳນົດມື້ເປີດງານມະຫະກຳກິລາ ໃນວັນທີ 13 ທັນວາ ແລະ ມື້ປິດ ໃນວັນທີ 22 ທັນວາ 2022 ຊື່ງໄດ້ກຳນົດລາຍການແຂ່ງຂັນ 25 ປະເພດກິລາ (ແຂ່ງຂັນໃນຮົ່ມມີ 18 ປະເພດກິລາ ແລະ ແຂ່ງຂັນກາງແຈ້ງ 7 ປະເພດກິລາ); ດ້ານບຸກຄະລາກອນ ປະກອບດ້ວຍ 10 ກໍາມະການ ແລະ 38 ອະນຸກໍາມະການ ລວມທັງໝົດ 460 ຄົນ; ດ້ານພື້ນຖານໂຄງລ່າງ ຮັບໃຊ້ການແຂ່ງຂັນ ແລະ ຝຶກຊ້ອມ ສຳເລັດ 99%, ສ່ວນທີ່ຍັງບໍ່ທັນສໍາເລັດ ແມ່ນການປັບປຸງຄືນບາງຈຸດທີ່ເປ່ເພ, ອະນາໄມ ແລະ ປະດັບປະດາ; ສະຖານທີ່ຕ້ອນຮັບ ຄະນະນຳ, ຄູຝຶກ ແລະ ນັກກິລາ ແມ່ນໄດ້ກະກຽມທີ່ພັກ ຈໍານວນ 18 ໂຮງແຮມ, ຣີສອດ 2 ແຫ່ງ, ເຮືອນພັກ 118 ແຫ່ງ, ນອກຈາກນັ້ນ ຍັງໄດ້ກະກຽມ ໂຮງຮຽນອີກ 27 ແຫ່ງ, ສາມາດຮອງຮັບໄດ້ 8.580 ຄົນ.
ໃນໂອກາດດຽວກັນ, ທ່ານຮອງນາຍົກລັດຖະມົນຕີ ໄດ້ໃຫ້ກຽດມີຄຳເຫັນໂອ້ລົມ ຕໍ່ການນຳຫຼັກແຫຼ່ງຂອງແຂວງ ແລະ ຄະນະຮັບຜິດຊອບ ຈັດງານມະຫະກຳກິລາແຫ່ງຊາດ ຄັ້ງທີ XI ໂດຍໄດ້ຕີລາຄາສູງ ຕໍ່ການນຳພາຊີ້ນຳ ກໍຄືຄວາມພະຍາຍາມ, ຄວາມເອົາໃຈໃສ່ ແລະ ຮັບຜິດຊອບສູງຂອງອົງການປົກຄອງທຸກຂັ້ນ, ພ້ອມທັງ ຍົກໃຫ້ເຫັນຜົນສຳເລັດ, ຄວາມຫຍຸ້ງຍາກ ແລະ ສິ່ງທ້າທາຍ ໃນການພັດທະນາເສດຖະກິດ-ສັງຄົມ ແຫ່ງຊາດ, ລວມທັງ ສະພາບການພົ້ນເດັ່ນ ທີ່ເກີດຂຶ້ນ ຢູ່ພາຍໃນ ແລະ ຕ່າງປະເທດ. ອັນສຳຄັນ, ທ່ານ ຮອງນາຍົກລັດຖະມົນຕີ ໄດ້ຊີ້ນຳໃຫ້ອົງການປົກຄອງແຂວງຊຽງຂວາງ ແລະ ພາກສ່ວນກ່ຽວຂ້ອງ ເອົາໃຈໃສ່ຕື່ມບາງດ້ານ ເປັນຕົ້ນສືບຕໍ່ເອົາໃສ່ວຽກງານ ພັກ-ພະນັກງານ ແລະ ການນຳພາ-ຊີ້ນຳ ຂອງພັກ ໃຫ້ເລິກເຊິ່ງ, ແທດເຖິງ, ມີຄວາມປອດໃສ, ໜັກແໜ້ນ, ເຂັ້ມແຂງ; ກໍາແໜ້ນແນວທາງນະໂຍບາຍຂອງພັກ ແລະ ລັດ ພ້ອມທັງ ກຳນົດໜ້າທີ່ ແລະ ຄວາມຮັບຜິດຊອບໃນວຽກງານ ໃຫ້ຖືກຕ້ອງ, ຈະແຈ້ງ, ເໝາະສົມ ແລະ ຫັນເປັນແຜນວຽກລະອຽດ; ປຸກລະດົມທົ່ວສັງຄົມ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ເປັນຂະບວນການແຂງແຮງກວ່າເກົ່າ; ເອົາໃຈໃສ່ວຽກງານປັບປຸງການຈັດຕັ້ງ, ການກໍ່ສ້າງ, ເລືອກເຟັ້ນ ແລະ ຈັດວາງພະນັກງານ ຕາມທິດກະທັດຮັດ, ສົມເຫດສົມຜົນ, ມີຄຸນນະພາບ, ຖືກຕ້ອງຕາມກົດໝາຍ, ສອດຄ່ອງກັບຄວາມຕ້ອງການຂອງວຽກງານ ແລະ ປະຢັດມັດທະຍັດ; ໃຫ້ພະນັກງານການນໍາຫຼັກແຫຼ່ງພາຍໃນແຂວງເປັນເຈົ້າການເສີມຂະຫຍາຍຫົວຄິດປະດິດສ້າງ ປັບປຸງປ່ຽນແປງສູ່ອັນໃໝ່ ທີ່ດີຂຶ້ນ; ສືບຕໍ່ກະກຽມຄວາມພ້ອມດ້ານຕ່າງໆແກ່ງານມະຫາກໍາກິລາແຫ່ງຊາດ ໃຫ້ດີ ໂດຍສະເພາະ ດ້ານເນື້ອໃນ, ພື້ນຖານໂຄງລ່າງຮັບໃຊ້ ແລະ ອື່ນໆ ບົນພື້ນຖານ ຮັບປະກັນຜົນສຳເລັດ ຕາມຈຸດປະສົງ ແລະ ລະດັບຄາດໝາຍ ທີ່ກຳນົດໄວ້, ທັງຖືເປັນກາລະໂອກາດໂຄສະນາ ຊຸກຍູ້ສົ່ງເສີມການທ່ອງທ່ຽວ ແລະ ການພັດທະນາເສດຖະກິດ-ສັງຄົມຂອງແຂວງ ໃຫ້ດີຂຶ້ນ; ສືບຕໍ່ປະຕິບັດ 2 ວາລະແຫ່ງຊາດ ໂດຍສະເພາະ ດໍາລັດ ວ່າດ້ວຍລົດຂອງລັດ, ການແກ້ໄຂພາຫະນະທີ່ນໍາເຂົ້າບໍ່ຖືກຕ້ອງ ແລະ ວຽກຈຸດສຸມອື່ນໆ.
ໃນໂອກາດເຄື່ອນໄຫວຊີ້ນຳວຽກງານຢູ່ແຂວງຊຽງຂວາງໃນຄັ້ງນີ້, ຄະນະຂອງທ່ານຮອງນາຍົກລັດຖະມົນຕີຍັງໄດ້ໄປກວດກາເບິ່ງຄວາມພ້ອມດ້ານພື້ນຖານໂຄງລ່າງຮັບໃຊ້ການແຂ່ງຂັນກິລາແຫ່ງຊາດຄັ້ງທີ XI ໂດຍສະເພາະສະໜາມກິລາປະເພດຕ່າງໆ, ສະຖານທີ່ພັກເຊົາຂອງຄະນະນັກກິລາ. ນອກຈາກນັ້ນຍັງໄດ້ໄປກວດກາເບິ່ງໂຄງການກໍ່ສ້າງພະເຈົ້າອົງຫຼວງ, ໂຮງງານຂ້າສັດທັນສະໄໝ ແລະ ໂຮງງານປຸງແຕ່ງຫີນອ່ອນຕື່ມອີກ.
ຂ່າວ-ພາບ: ກົມປະຊາສຳພັນ ຫສນຍ
#Medialaos MMD
