ວັນທີ 25/8/2022 ນີ້ ທີ່ສະໂມສອນສື່ມວນຊົນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແລະ ອົງການແຄຣີຕັສລຸກຊໍາບວກ ປະຈໍາລາວ ນໍາໂດຍທ່ານ ຄໍາສິງ ນາມສະຫວັນ ຫົວໜ້າອົງການແຄຣີຕັສລຸກຊໍາບວກ ປະຈໍາລາວ ພ້ອມດ້ວຍຄະນະໄດ້ນໍາເອົາເສື້ອກັກຈໍານວນ 50 ຜືນ ແລະ ເສື້ອໂປໂລ ຈໍານວນ 700 ຜືນໄປມອບໃຫ້ພະແນກສາທາລະນະສຸກ ນະຄອນຫລວງວຽງຈັນ ມູນຄ່າ 67.000.000 ກີບ ໂດຍຜ່ານກະຊວງ ຖວທ ໂດຍການເຂົ້າຮ່ວມ ຂອງທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວແຫ່ງ ສປປ ລາວ, ທ່ານ ສົມສັກ ສະກຸນຄໍາ ຮອງຫົວໜ້າກົມສື່ມວນຊົນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ດຣ ບຸນທະວີ ເລີດບັນດິດ ຮອງຫົວໜ້າພະແນກສາທາລະນະສຸກ ນະຄອນຫລວງວຽງຈັນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄໍາສິງ ນາມສະຫວັນ ຫົວໜ້າອົງການແຄຣີຕັສລຸກຊໍາບວກ ປະຈໍາລາວ ມີຄໍາເຫັນວ່າ: ຈຸດປະສົງທີ່ນໍາເອົາເຄື່ອງໄປຊ່ວຍເຫລືອຄັ້ງນີ້ ເພື່ອເປັນການປະກອບສ່ວນຊຸກຍູ້ວຽກງານປ້ອງກັນ ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ກໍ່ຄືການຕ້ານ ຄວບຄຸມ ແລະ ສະກັດກັ້ນການລະບາດຂອງພະຍາດໄຂ້ຍຸງລາຍ ຫລື ໄຂ້ເລືອດອອກໃນຂອບເຂດທົ່ວປະເທດ ໂດຍສະເພາະແມ່ນຢູ່ນະຄອນຫລວງວຽງຈັນ ໃນການສະໜັບສະໜູນດ້ານບຸກຄະລາກອນເປັນຕົ້ນ: ພະນັກງານອາສາສະໝັກ ຫລື ອສບ ຂັ້ນບ້ານ ລວມທັງພະນັກງານແພດໝໍຂັ້ນຕ່າງໆ ທີ່ລົງປະຕິບັດວຽກງານຕົວຈິງ ກ່ຽວກັບການຕອບໂຕ້ການລະບາດຂອງພະຍາດໄຂ້ຍຸງລາຍໃຫ້ນັບມື້ຫລຸດລົງເທື່ອລະກ້າວ.
ໂອກາດນີ້ ທ່ານ ສະຫວັນຄອນ ຣາຊມຸນຕຣີ ໃນນາມປະທານສະມາຄົມນັກຂ່າວແຫ່ງ ສປປ ລາວ ຕາງໜ້າສະມາຄົມນັກຂ່າວ ກໍ່ຄືກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ສະແດງຄວາມຮູ້ບຸນຄຸນ ແລະ ຂອບໃຈ ອົງການແຄຣີຕັສລຸກຊໍາບວກ ປະຈໍາລາວ ຢ່າງສູງທີ່ຍາມໃດກໍ່ໃຫ້ການຊ່ວຍເຫລືອອຸປະຖໍາຕໍ່ວຽກງານການຕ້ານ ຄວບຄຸມ ແລະ ສະກັດກັ້ນການລະບາດຂອງພະຍາດໄຂ້ຍຸງລາຍຕະຫລອດມາ ພ້ອມທັງຮັບປາກວ່າຈະໄດ້ນໍາເອົາເຄື່ອງດັ່ງກ່າວນີ້ໄປແຈກຢາຍໃຫ້ບຸກຄະລາກອນທີ່ເຄື່ອນໄຫວໃນຂະບວນການຕ້ານໄຂ້ຍຸງລາຍໃຫ້ທົ່ວເຖິງ.
ນອກຈາກການນໍາເອົາເຄື່ອງມາຊ່ວຍເຫລືອຄັ້ງນີ້ແລ້ວ, ໄລຍະຜ່ານມາອົງການແຄຣີຕັສລຸກຊໍາບວກ ປະຈໍາລາວ ຍັງໄດ້ໃຫ້ການສະໜັບສະໜູນທາງດ້ານງົບປະມານ ແລະ ວັດຖຸປັດໃຈຈໍານວນໜຶ່ງໃຫ້ແກ່ຂະແໜງການຕ່າງໆ ທີ່ກ່ຽວຂ້ອງຕື່ມອີກ.
