ກາງເດືອນ ສິງຫາ ຜ່ານມານີ້, ກອງພົນທີ1 ໄດ້ເປີດກອງປະຊຸມສະຫຼຸບສັງລວມຂະບວນການກໍ່ສ້າງ ກົມກອງປອດໃສ ເຂັ້ມແຂງ ໜັກແໜ້ນ ປະຈໍາປີ 2022 ແລະ ວາງທິດທາງເປົ້າໝາຍກໍ່ສ້າງໃນປີ 2023 – 2024, ໂດຍໃຫ້ກຽດເປັນປະທານຂອງ ສະຫາຍ ພັນເອກ ວົງຈັນ ພັນຈັນທະມານ ເລຂາຄະນະພັກ ຫົວໜ້າການເມືອງກອງພົນທີ1, ໂດຍມີ ຄະນະນໍາແຕ່ລະອົງການ, ອະນຸກໍາມະການ, ກົມກອງຮາກຖານຕ່າງໆ ເຂົ້າຮ່ວມ.
ທັງນີ້ກໍ່ເພື່ອປະຕິບັດຕາມຄໍາສັ່ງເເນະນໍາຂອງຄະນະພັກກະຊວງປ້ອງກັນປະເທດ.ເລກທີ2622/ຄພກປທ ລົງວັນທີ 26/04/2018. ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຄຸນນະພາບຮາກຖານພັກ ແລະ ສະມາຊິກພັກໃນກອງທັບ. ອີງຕາມຄໍາສັ່ງແນະນໍາເພີ່ມເຕີມຂອງກົມໃຫຍ່ການເມືອງກອງທັບ ເລກທີ 3742/ກມທ ລົງວັນທີ 18/07/2018 ວ່າດ້ວຍການປຸກລະດົມ ຊຸກຍູ້ຂະບວນການກໍ່ສ້າງກອງຮາກຖານ ປອດໃສ ເຂັ້ມແຂງ ໜັກແໜ້ນ ໃຫ້ຟົດຟື້ນ ແຂງແຮງ ແລະ ຕໍ່ເນື່ອງ. ອີງຕາມທິດຊີ້ນໍາຂອງຄະນະພັກກອງພົນທີ 1 ໃຫ້ອະນຸກໍາມະການກວດກາ ກອງປອດໃສ ເຂັ້ມແຂງໜັກແໜ້ນ ສືບຕໍ່ເຄື່ອນໄຫວຕາມ ສິດໜ້າທີ່ຂອງຕົນ. ໂອກາດທີ່ມີຄວາມໝາຍສໍາຄັນນີ້ ໃນກອງປະຊຸມ ສະຫາຍ ພັນໂທ ຄຳພັດ ສີວິໄຊ ຮອງພະແນກຈັດຕັ້ງພັກ ຫ້ອງການເມືອງກອງພົນທີ1 ໄດ້ຂຶ້ນຜ່ານບົດສະຫຼຸບຕີລາຄາຄືນການເຄື່ອນໄຫວຕິດຕາມຊຸກຍູ້, ກວດກາ ແລະ ຕີລາຄາປະເມີນຜົນໄດ້ຮັບ ຈັດຕັ້ງປະຕິບັດ ກ່ຽວກັບຂະບວນການກໍ່ສ້າງກົມກອງ ປອດໃສ ເຂັ້ມແຂງ ໜັກແໜ້ນ ຂອງຄະນະພັກກອງພົນທີ 1 ແລະ ສະເໜີໃຫ້ຮູ້ເຖິງ ທີ່ຕັ້ງ, ພາລະບົດບາດ ໂຄງປະກອບຂອງຄະນະພັກກອງພົນ: ຄະນະພັກກອງພົນ ແມ່ນອົງການນໍາພາສູງສຸດຂອງກົມກອງ ເຊິ່ງຢູ່ພາຍໃຕ້ການ ຊີ້ນໍາ – ນໍາພາ ຂອງຄະນະພັກກະຊວງປ້ອງກັນປະເທດ, ເປັນເສນາທິການດ້ານວຽກງານພັກ, ວຽກງານການເມືອງ ໃຫ້ແກ່ຄະນະພັກຂັ້ນເທິງ, ມີພາລະບົດບາດໃນການຄົ້ນຄ້ວາເຊື່ອມຊຶມ, ກໍາແໜ້ນ, ຈັດຕັ້ງປະຕິບັດແນວທາງ, ມະຕິຄໍາສັ່ງ, ກົດລະບຽບຂອງພັກ, ກົດໝາຍຂອງລັດ, ຂໍ້ກໍານົດກົດລະບຽບຂອງກອງທັບ ແລະ ປັບປຸງກໍ່ສ້າງກໍາລັງໃຫ້ ເຂັ້ມແຂງຮອບດ້ານ,ຜ່ານການກວດກາຕົວຈິງຢູ່ບັນດາຮາກຖານພັກ ໃນທົ່ວຄະນະພັກກອງພົນ ຂອງອະນຸກໍາມະການ ເຊິ່ງສາມາດຕີລາຄາ ແລະ ຢັ້ງຢືນບັນດາກົມກອງ ແລະ ຮາກຖານພັກ ດັ່ງນີ້: . ໜ່ວຍພັກແຂງຮັກສາໄດ້ ແລະ ສະເໜີຮັບຮອງສະໄໝທີ 4 ມີ 21 ໜ່ວຍ; ສະເໜີຮັບຮອງສະໄໝທີ 3 ມີ 09 ໜ່ວຍ; ສະເໜີສະໄໝທີ 2 ມີ 13 ໜ່ວຍ; ສະເໜີຮັບຮອງໃໝ່ມີ 27 ໜ່ວຍ; ໜ່ວຍພັກກາງ 31 ໜ່ວຍ. ໃນນັ້ນໜ່ວຍພັກແຂງ 70 ໜ່ວຍ ເທົ່າກັບ 68,62%; ກາງ 31ໜ່ວຍ ເທົ່າກັບ 30,39% ແລະ ສະມາຊິກພັກແຂງ 1.635 ສະຫາຍ ເທົ່າກັບ 93,53%; ສະມາຊິກພັກກາງ 89 ສະຫາຍ ເທົ່າກັບ 5,09%.
ໂດຍ: ຕິກ ມູນຄໍາເຮືອງ.
